De Markus Breef, Numma 28

Toom Läsen:  Markus 6:14-20
            "Dan kjrieech uk Kjennich Herodes von Jesus to hieren; wiels Jesus sien Nomen wia aul sea bekaunt jeworden.  Hee säd:  Johanes de Deepa es vom Doot oppjestonen; un daut es wuarom dise wundawirkjende Krauft en am es.
               Eenje säden:  Hee es Elia.
               Aundre säden:  Hee es een Profeet, soo aus eena von de oole Profeeten.
             Oba aus Herodes doavon hieed, säd hee:  Johanes, dän ekj dän Kopp aufhaken leet, es vom Doot oppjestonen.
              Herodes haud selfst jeschekjt Johanes fausttonämen un entostoppen, om Herodias, siene Brooda Filippus siene Fru äat haulwen, dee hee sikj jefriet haud.  Johanes haud to Herodes jesajcht:  Daut es nich rajcht, daut du dienen Brooda siene Fru hast.
             Dan wia Herodias schwierich äwa am jeworden un wull am doot moaken.  See kunn oba nich, wiels Herodes fercht Johanes un bewoad am.  Hee wist, daut Johanes een fromma heilja Maun wia.  Hee horcht jieren no Johanes, wan am daut uk sea beorruijd, waut hee säd."
 
 
             Kjennich Herodes wia een intressaunta Mensch.  Dise Varzh sajen daut hee läwd en Sind, met sien Brooda siene Fru, oba hee jleicht toom no Johanes de Deepa horchen, wiels hee wia een Profeet, un säd am de Woarheit.  Herodes wia intressieet met de Woarheit, oba hee wia nich werkjlich wellens toom horchen no waut Johanes am säd.  Hee haud uk angst fa shoden doonen aun Johanes, wiels hee wist daut Johanes wia een Profeet, un een heilja, fromma Maun.
             Noch mol see wie soont aus dit em vondoagschen Dach uk.  Foaken sent Menschen intressieet en Kjristen, un en de Bibel, un dee horchen wellich no Bootschoften un horchen uk wellich wan Menschen von Jesus räden, oba dee sent werkjlich nich wellich toom äare Sinden oppjäwen.  See jleichen toom horchen no waut de Bibel sajcht, oba nich werkjlich daut to doonen.  Kjennich Herodes wia krakjt soo aus dit.
            Noch een Dinkj waut wie seenen vondoag es daut Menschen wieren nich kloa aun wäa Jesus wia.  See dochten veleicht daut Jesus wia Elia, ooda een von de oole Profeeten, ooda veleicht Johanes de Deepa oppjestonen vom Doot.  Jesus sien Nom' wia aul wiet un breet bekaunt, wiels hee prädijd met jewault un deed väle Wunda.
            Waut bie mie soo intressaunt es von dise Jeschicht es daut Kjennich Herodes wull kjeen schoden doonen aun Johanes.  Daut sajcht hee bewoad dän Profeet, un leet siene Fru, Herodias, nich am doot moaken soo aus see wull.  Oba enne leng leet hee Johanes doot moaken, un nu ploagd am sien Jewessen, wiels hee sajcht en Varsch 16:  "Johanes, dän ekj dän Kopp aufhaken leet, es vom Doot opjestonen."  Dit wia aus hee von Jesus hieed, daut hee prädijd un deed väle Wunda.
               Kjennich Herodes es een Aufbilt von waut woat wan wie met de orrajchte Menschen toop sennen.  Ieeschtens, hee haud sien Brooda siene Fru, Herodias, un daut wia am nich too oajch.  Dan, aus Johanes de Deepa doa jäajen räd, muak daut Herodias schwierich äwa am, un Kjennich Herodes leet Johanes faustnämen.  Näakstetmol see wie woo Herodias dan eene paussende Jeläajenheit funk toom Johanes doot moaken, un Kjennich Herodes leet daut too, wiels hee wia too schwak en sien Jewessen toom jäajen ar stonen.  Dit es eene Lekzion fa ons.  Wan wie met de orrajchte Menschen toop sennen, loken dee ons veleicht en Sind nenn, un dan met eemol hab wie waut schoden jedonen un daut jeit nich trajch to moaken.  Wan Kjennich Herodes nich haud sien Brooda siene Fru jenomen, wudd dit nich senn jeworden, un dan wudd sien Jewessen am nu uk nich haben jeploacht.
            Soo es daut met Sind.  Wan wie uk mau aunfangen met kjliene Sinden, dee leiden ons wieda un wieda bat wie soo deep enne Sind sent daut wie nich een wajch doa rut finjen.  Kjennich Herodes sien Sind von sien Brooda siene Fru nämen leid am gaunz bat doa wua hee een heilja Maun doot muak.  De Schreft sajcht en Jakobus 1:15, "Wan de beese Lost sikj ieescht faustjesat haft, woat de Sind jebuaren.  Un wan de Sind jedonen es, brinjt see dän Doot."  Wie motten opp paussen daut wie de Sind nich loten äwahaunt nämen, un wie motten de beese Lost aufsajen ea daut ons kaun faustbinjen enne Sind.
             Oba weet je, dit es krakjt wuarom Jesus kjeem to Welt.  Hee kjeem, wiels met onse ieejne Krauft, kunnen wie nienich de Sind un de beese Lost aufsajen.  Onen Gott siene Jnod sent wie aula faustjebungen en Sind!  Oba Jesus kjeem, toom sien Läwen jäwen, toom onse Sindenschult betolen, daut wie derch Gott siene Jnod kjennen frie sennen von Sind un von dän eewjen Doot.  Pries dän Harn fa siene Jnod!