De Markus Breef, Numma 27

Toom Läsen:  Markus 6:7-13
            "Un hee foddad sikj de Twalw un schekjt dee poawies ut un jeef an Krauft äwa de orreina Jeista.  Un hee befool an:  Opp june Reis nämt sest nuscht met aus eenen Gonstock, kjeen Broot, uk nich eene Reistausch, uk nich Jelt em Biedel.  Trakjt junt Schoo aun, oba nämt nich twee Rakj met.
            Hee säd uk to an:  Un wuaemma jie en een Hus komen, blieft doa, bat jie de Staut veloten.  Un wuaemma see nich junt oppnämen un nich no junt horchen, un jie dan von doa wajchgonen, dan scheddat junt dän Stoff von de Feet; daut woat fa an eene Woarnunk sennen.
            Dan jinjen dee un prädijden, daut de Menschen omkjieren sullen.  See dreewen väl beese Jeista ut un aun väl kranke brukten see Eelj om dee to heelen."
 
 
            Vondoag see wie noch een Poat von de Uasoak wuarom Jesus kjeem, un daut wia toom siene Kjoakj buen.  Hee schekjt de Twalw rut aus Missionoaren toom en de Darpa nenn gonen un prädjen daut Menschen sikj sullen omkjieren.  Jesus deed selfst dise Oabeit von prädjen fa de dree Joa waut hee siene Oabeit deed opp Ieed, un hee haft aul ernoa väl Tiet jenomen toom siene Jinja lieren derch Jlikjnisen un derch de Wunda waut hee deed.  See haben aul väl jelieet von Jesus, jenuach toom aunfangen met prädjen.  See weeten noch nich aules, oba daut waut see weeten kjennen see aul bekaunt moaken.
          Hia es eene Lekzion bennen fa ons.  Wee sent uk aula soo aus de Jinja, blooss jeweenelje Menschen.  See wieren doa wua Jesus wia; see horchten no siene Wieed, un see sagen de Wunda waut hee deed, un saden äa Gloowen opp am.  Doaderch kunn Jesus an lieren von sien Rikj, daut see nu uk kunn rut gonen un prädjen.  Wan wie uk doonen waut de Jinja deeden, un doonen ons Gloowen opp Jesus saten, un Tiet nämen toom sien Wuat läsen, dan woat hee ons uk lieren.  Wie brucken nich aules weeten toom metdeelen; wie brucken blooss daut metdeelen, waut wie aul weeten.
          Dise Jinja en onse Schreftstäd vondoag wisten noch lang nich aules waut sull passieren, oba see wisten daut Jesus haud an jeschekjt.  Aules waut see nu musten doonen wia horchen no waut Jesus haud jesajcht.  Soo es daut uk met ons.  Eenje Menschen jleewen daut eena kaun nich prädjen wan dee nich haft School jehaut, oba daut es nich soo.  Eena mott blooss een velangen haben toom daut Wuat Gottes vestonen, un Gloowen haben, un daut es dan jenuach toom aunfangen met metdeelen.  Eena sull oba emma biem lieren bliewen von de Schreft, soo daut wie emma mea kjenn vestonen waut de Bibel to ons sajcht.
                Daut sajcht uk daut Jesus jeef an Krauft toom beese Jeista utdriewen.  See brukten sikj nich ferchten wan Menschen ooda beese Jeista proowden an to stieren, wiels Jesus haud an de Krauft jejäft toom jewennen äwa dee.  Waut fa eene Krauft jeef Jesus siene Jinja?  Ekj jleew de Krauft waut see hauden wia een Tieekjen von de Krauft, dee aule Kjristen wudden lota kjrieen, un daut es de Krauft von de Heilja Jeist.  De Heilja Jeist wia noch nich jekomen aus Jesus de Jinja rut schekjt, oba Jesus jeef an von siene Krauft, daut see daut kunnen doonen waut hee an fruach toom doonen.  Noch een Dinkj toom äwa denkjen es daut de Bootschoft selfst haud Krauft, wiels daut es daut Evangelium von Jesus Christus.  Paulus sajcht en Reema 1:16, "Ekj schäm mie nich met daut Evangelium von Christus.  Daut es Gott siene Krauft, aul dee seelich to moaken, dee doaraun jleewen, ieeschtens de Juden, dan oba uk de Griechen."  Daut sajcht daut daut Evangelium von Christus es Gott siene Krauft, Menschen seelich to moaken.  Dit es de Krauft waut de Jinja uk hauden, un de Krauft waut aule Kjristen haben.  Wie haben aula de Krauft von daut Evangelium, wan wie Kjristen sent.
              Oba daut wichtichste Poat von aul dit es woo Jesus de Jinja muak rut gonen.  Hee säd to an daut see sullen sest nuscht met brinjen oppe Reis aus de Kjleeda, dee see aun hauden, een Gonstock, un Schoo opp de Feet.  Mea aus dit sullen see nich met brinjen, nich mau een beskje Jelt!  See sullen sikj gaunz opp Gott veloten fa aules waut an wudd fälen.  Dit es uk eene goode Lekzion fa ons vondoag.  Wan Gott ons beroopt haft to eene besondre Oabeit, dan woat hee uk aules jäwen waut ons fält toom de Oabeit doonen.  Jesus woat niemols ons wua han roopen, wua hee nich uk woat ons aulen too jäwen, waut doa fält, toom de Oabeit volbrinjen.  De Jinja jinjen met nuscht rut, un see hauden doch aules waut an fäld, un see prädijden daut Wuat, heelden väle Kranke, un dreewen väle beese Jeista ut.  Wan Jesus ons roopt fa irjent eene Oabeit, dan sell wie blooss Gloowen haben daut hee aules woat too jäwen waut ons fält, daut daut Evangelium vekjindicht woat un sien Nomen woat jeloft.