De Markus Breef, Numma 76

Toom Läsen:  Markus 14:53-65
           
“Dan leiden see Jesus wajch no däm Huagenpriesta, wua aul de Huagepriestasch un Eltestasch un Schreftjelieede toopjekomen wieren.  Oba Petrus kjeem wiet hinjaraun, gaunz bat opp däm Huagenpriesta sienen Hoff.  Un hee sad sikj met de Deena toop aum Fia un woamd sikj.  Un de Huagepriestasch un de gaunza Rot sochten Uasoak Jesus doottomoaken, oba fungen kjeene.  Doa wieren väle met äa Zeichnis; oba dee räden nich de Woarheit un stemden uk nich.  Un eenje kjeemen met äare Onwoarheit opp jäajen am un säden:  Wie hieeden, daut hee säd:  Ekj woa disen Tempel, dee met de Henj jebut es, dolbräakjen un en dree Doag onen Henj eenen aundren buen.
           
Oba äa Zeichnis stemd uk noch nich.  Dan stunt de Huagapriesta medden mank an opp un fruach Jesus:  Jefst du kjeene Auntwuat opp daut, waut dise jäajen die to sajen haben?
           
Jesus oba bleef stell un jeef am kjeene Auntwuat.  De Huagapriesta fruach noch eemol un säd to am:  Best du de Christus, dän Huachjelowden sien Sän?
           
Un Jesus säd:  Ekj sie dee; un jie woaren dän Menschensän bie däm Aulmajchtjen to rajchte Haunt setten seenen, un am seenen en de Himmelswolkjen komen.
           
Dan vereet de Huagapriesta sikj daut Kjleet un säd:  Wuarom bruck wie noch mea Zeijen?  Jie haben daut Jelasta jehieet.  Waut denkj jie?
           
Un see vedaumden am aula toom Doot.  Dan fungen eenje aun, am to bespieen un bungen am de Uagen too un schluagen am met de Fusten un säden to am:  Profeet, saj wäa die schluach!  Dan schluagen de Kjnajchts am met de Henj en daut Jesecht.“
 
 
 
           
Vondoag läsen wie woo de Mana doonen Jesus wajch brinjen no däm Huagapriesta brinjen, wua aul de Juden Leidasch sent toopjekomen toom am rechten.  Dise Leidaschoft heet de Judischa Rot, un dise gaunze Rot wull Jesus doot jemoakt haben.  Dit wia de selwje Rot waut de Mana haud jeschekjt toom Jesus em Goaden faustnämen.  Wie wellen kjikjen no väle von de Dinja waut de Juden deeden, waut jäajen äare ieejne Jesazen wieren, bloos wiels see wullen Jesus doot moaken.
           
Dis Judischa Rot haud Jesazen äwa woo un wanea see kunnen toop komen, un hia toom Jesus beschuljen, bruaken see dee aula.  Ekj woa nich jieda Jesaz oppoat sajen hia, oba wie wellen no de wichtichste kjikjen.
           
Ieeschtens, de Judischa Rot must, en aule aundre Loagen, emma äwadach toop komen toom Rot schlussen, oba hia fa Jesus kjeemen see denacht toop.  Dinja musten äwadach un openboa jedonen, oba fa Jesus deeden see daut denacht, wan daut ieescht diesta wia.  Dit es een bewies daut waut see deeden wia onopprechtich.
           
Tweedens, see aus de Judischa Rot must iernstlich horchen no waut Menschen säden, äwa Jesus, beides goodet un schlajchtet, un dan eene Entscheidunk moaken, oba hia sajcht daut, daut see sochten urzhent no eene Uasoak toom Jesus doot moaken.  See horchten bloos no de Menschen waut schlajchtet hauden to sajen äwa Jesus.  Äa Vestaunt wia aul verhäa oppjemoakt, daut Jesus sull stoawen, un hia sochten see bloos no een Väajäwen daut see daut kunnen doonen waut see verhäa aul berät hauden mank sikj.
           
Dreddens, de Menschen waut Zeichnis jeewen deeden aula lieejen, soo väl daut äa Zeichnis stemd nich opp een Wajch toop!  Em Oolen Testament, sajcht daut, daut du saust nich lieejen, ooda faulsch Zeichnis jäwen, en 2 Mose 20:16, un daut sajcht soo aus dit:  “Rät nich de Onwoarheit jäajen junen Noba.“  Jesus wia uk een Jud, krakjt soo aus aul dise aundre Mana wieren, un see oba sochten no Uasoak toom am doot moaken, wan hee uk nuscht nich orrajcht jedonen haud.  See wullen soo jieren haben daut Christus sull stoawen, daut see wieren wellens Läajes to bruken toom Jesus moaken schuldich loten.
           
Oba tolatst, kunnen see nich emol de Läajes bruken, wiels de Menschen äa Zeichnis stemd bloos nich toop.  Schlieslich fruach de Huagapriesta Jesus, aus hee Gott sien Sän wia; un Jesus säd daut hee wia.  Dan säd de Huagapriesta daut Jesus deed lastren, un de gaunza Judischa Rot säd daut hee sull stoawen.  Ekj well bloos een Dinkj sajen hia äwa Jesus siene Wieed.  Wan een Mensch dit haud jesajcht, wudd hee jelastat haben, oba Jesus must dit too stonen, wiels hee es werkjlich Gott sienen Sän.  Hee es werkjlich de Messias!  Hee must dit too stonen, wiels irjent sestwaut doonen wudd de Onwoarheit sennen, un Gott kaun nich lieejen.  Dit wiest uk kloa, daut de Juden daut goot wisten, daut äa Messias wudd nich bloos een Mensch sennen, oba Gott sien Sän.  See wisten daut, un see beschuljen Jesus dan noch toom Doot, wiels see wieren fleeschlich jesonnen un kunnen daut rajchte nich lieden.  Dee wäa schlajcht sennen, kjennen Jerajchtichkjeit nich lieden, wiels daut ploacht an aum Jewessen; doawäajen deeden see Jesus bie diesta denacht faustnämen, un beschuljen, un velieejen un vespoten.  See beweesen derch dit aula äa ieejna Ojjerajchtichkjeit.
           
​Aus see Jesus ieescht toom Doot vedaumt hauden, beweesen see noch äare Hot fa daut goode met woo see am deeden wieda behaundlen.  Daut sajcht daut see schluagen am, un deeden am bespieen; wie wudden werkjlich kjennen sajen daut see wieren bees.  Derch äa beeset beweesen see daut see Merda wieren; un dit wieren de Menschen waut sullen de Juden jeistlich leiden!  See hauden sikj selfst vekoft aun äare Hot, un nu beweesen see wäa see werkjlich wieren.  Dit es waut passieet wan wie daut rajchte eegol aufsajen.  Wan ons Jewessen ploacht, un wie daut oba emma bloos doonen wajch schuwen, woat daut stella, un met de Tiet, rät dee nich mea to ons.  Wan dit passieet, dan sent wie gaunz äwajejäft toom beeset doonen, krakjt soo aus dise Juden Leidasch wieren.  Wie motten opp paussen, daut wie de Sind nich loten de Äwahaunt nämen.