De Markus Breef, Numma 23

Toom Läsen:  Markus 5:11-20
              "Doa dicht bie aum Boajch grosd eene groote Häad Schwien.  Dan prachaden de orreine Jeista am, an en de Schwien nenn foaren to loten.  Jesus jeef an de Frieheit, un de beese Jeista kjeemen rut un fuaren en de Schwien nenn.  Un de Häad von 2,000 Schwien moaragd em Mäa nenn, un dee vesoopen.  Un de Schwienshoad randen un vetalden en de Staut un uk opp daut Launt, waut jeworden wia.  Un de Menschen kjeemen han to seenen, waut passieet wia.  Un aus see no Jesus kjeemen, sagen see dän, dee von de orreine Jeista wia besäten jewast, veninftich un jekjleet setten, un see ferchten sikj.  Un dee, dee daut jeseenen hauden, vetalden de Menschen, waut met däm Maun passieet wia, dee von beese Jeista besäten jewast wia, un uk woo sikj daut met de Schwien romjenomen haud.  Dan fungen de Menschen aun Jesus drinjent to prachren, äare Jäajent to veloten.  Aus Jesus en de Lomm nenn stieech, prachad dee Maun, dee von beese Jeista wia besäten jewast, auf hee metkomen kunn.  Jesus leet daut nich to, oba säd hee sull no Hus, no siene Famielje gonen un an vetalen, woo de Har met am Metleet haud un waut hee am en siene Jnod fa eenen grooten Jefaulen jedonen haud.  Un hee jinkj looss un funk aun en de tieen Städa to vetalen, waut Jesus aules fa am jedonen haud.  Un aulemaun wundad sikj."


              Dise Jeschicht es eene sea besondre Jeschicht fa mie.  Ekj wunda, waut wudd ekj doonen wan ekj haud jrod jeseenen waut dise Menschen aula sagen?  Jesus leet de orreina Jeista en eene groote Häad Schwien nenn foaren, un plazlich vesoopen dee Schwien aula.  De Schwienshoad motten sikj haben sea jeenjst; nu wia äare Ennom gaunz vekomen!  Oba wie motten doa aun denkjen, daut een Mensch es väl mea wieet aus irjent eene Häad Tieren.
En 1 Mose 1:27 sajcht daut soo aus dit, "Un muak Menschen, dee soo wieren aus hee, no sienem Plon.  Hee muak Maunsmensch uk Frumensch."  Aule Menschen opp de Ieed sent en Gott sien Bilt jemoakt, aula no sienem Plon no.  Doa es kjeen Mensch waut nich Poat von Gott sien Plon es.  Jesus kjeem nich blooss fa eene besondre Grupp Menschen; hee kjeem fa jieda Mensch opp Ieed.  Jesus kjeem no de Juden, oba nich blooss fa de Juden; leewa, soo aus Paulus sajcht en Reema 1:16, "Ekj schäm mie nich met daut Evangelium von Christus.  Daut es Gott siene Krauft, aul dee seelich to moaken, dee doaraun jleewen, ieeschtens de Juden, dan oba uk de Griechen."  Jesus es fa aulemaun jekomen.
              Daut helt sikj jlikj wua wie wonen, ooda en woone Famielje wie sent nenn jebuaren wast, ons fält aule de Radunk waut Jesus deit aunbeeden.  Veleicht es daut met ons nich soo oajch aus met de Maun en dise Varzh en Markus 5.  Oba wan Jesus Krauft haft am frie to moaken, dan es siene Krauft uk stoakj jenuach fa ons.  Kjikj emol waut von een Unjascheet Jesus muak en disen Maun sien Läwen.  De Menschen en de Jäajent staunden sikj wan see disen Maun sagen veninftich un jekjleet setten.  De Schreft sajcht daut see ferchten sikj!  Dee hauden noch niemols soont aus dit jeseenen.  Wudd wie aundasch sennen aus dee?  Ut Angst fruagen see Jesus toom wajch foaren; wudd wie irjent sestwaut doonen?
             Soo aus mie daut sitt, de Menschen ferchten sikj soo sea daut see neem nich mol Tiet toom Gott lowen daut dis besätna Maun wort frie jemoakt.  Dee Maun, dee besäten jewast wia, wia ieescht vebungen von orreine Jeista, oba de Menschen en de Jäajen wieren vebungen von Angst.  An fäld krakjt soo väl Help aus dee Maun, dee besäten jewast wia!  Daut es noch krakjt soo met ons vondoag.  Foaken see wie blooss woo aundre Menschen Trubbel haben, un wie vejäten daut met ons es daut nuscht bäta.  Wie seenen aul de Fäla waut aundre Menschen moaken, un stonen daut nich too daut wie selfst uk Fäla moaken.  Well wie nich soo sennen!
              Daut es intressaunt, daut aus de Menschen Jesus fruagen toom veloten, deed hee nich jäajen aun strieden; hee deed waut see no fruagen, un veleet de Jäajent.  Oba de Maun, dee besäten jewast wia, kjeem doch ieescht no am un stunt daut too daut am Help fäld.  Kjeene von de aundre Menschen deeden daut.  Jesus deit blooss ons halpen wan wie doano froagen.  Well wie nich ons too groot doonen toom Jesus siene Help aunnämen!  Well wie daut toostonen, daut ons Help fält.  Un wan wie Jesus siene Help ieescht jekjräajen haben, well wie dan uk doonen waut dee Maun wäm Jesus frie muak deed, un aundre vetalen von waut Jesus haft fa ons jedonen.