De Markus Breef, Numma 47

​Toom Läsen:  Markus 9:38-41
 
            “Dan auntwuad Johanes am un säd:  Meista, wie sagen wäm en dienen Nomen beese Jeista utdriewen, un wie vebooden am daut, wiels hee nich eena von ons wia.
            Oba Jesus säd:  Daut sull jie däm nich vebeeden.  Wäa en mienem Nomen Wunda deit, kaun nich soo boolt doaropp schlajchtet von mie räden.  Wäa nich jäajen ons es, es opp onse Sied.
            Ekj saj junt de Woarheit:  Wäa junt en mienen Nomen, un doawäajen wiels jie Christus aunjehieren, eenen Drunk Wota jeft, däm woat daut nich onbeloont bliewen.“
 
 
 
            Vondoag see wie noch eemol daut de Jinja wieren uk blooss jeweenelje Menschen, krakjt soo aus wie aula sennen.  See, krakjt soo aus wie aula, hauden eene schwoare Tiet Menschen aunnämen waut nich poat von äare Grupp wieren.  Wie haben uk dis Trubbel.  Wie seenen dit äwa de gaunze Welt, daut Menschen strieden sikj un zanken eena met däm aundren blooss wiels see von veschiedne Städa sent.  Wan wie wudden een kjlienet bät wieda un deepa doa nenn kjikjen, wudd wie seenen daut wie sent nich soo veschieden aus wie jleewen.  Waut Jesus de Jinja hia sajcht, es daut doa sent mau twee sieden.  Wie jehieren Jesus Christus, ooda wie jehieren am nich.  Doa sent kjeene aundre Sieden aus dee beid.
            Johanes vetalt Jesus hee daut see sagen eenen aundren waut en Jesus sienen Nomen deed beese Jeista utdriewen, un blooss wiels hee nich too de Jinja äare Grupp jehieed, vebooden see am daut to doonen.  Jesus oba sajcht daut hauden see nich sult doonen, wiels kjeena waut met an steit es dan jäajen an.  Hee sajcht, “Wäa nich jäajen ons es, es opp onse Sied,“ en Varsch 40.  Wan wie doaraun denkjen, enne Eewichkjeit, sent doa blooss twee städen:  de Himmel, un de Hall.  Doa es kjeene aundre Städ wua Menschen kjennen sennen.  Ekj jleew dit es eene Uasoak wuarom Jesus dit säd.
            Daut es vondoag uk noch soo.  Wan Menschen fa Jesus läwen, un aun am jleewen, dan sent see opp onse Sied.  Wie brucken ons nich emma strieden met aundre Menschen bloos wiels see een Poa Dinja aundasch haben aus wie; well wie leewa daut finjen waut ons toop binjt, un dan toop schaufen aus Gott siene Kjoakj toom de Menschen rieekjen waut veloaren no de Hall gonen.  Dit es de Kjoakj äare Roop!  Wie haben eene Veauntwuatlichkjeit toom Menschen von Jesus vetalen.  Well wie leewa daut doonen aus met aundre Kjristen strieden.  Well wie doaraun denkjen, waut Jesus säd, daut dee wäa nich jäajen ons es, es opp onse Sied.
            Jesus nemt dit uk noch wieda.  Hee sajcht, daut wan irjentwäm eena ut halpt, wiels see Kjristen sent, woat janem Mensch nich onbeloont bliewen.  Daut kaun mol rajcht soon kjlienet sennen, aus een Kuffel Wota aunbeeden, oba daut es jenuach toom een Loon kjrieen.  Wie kjenn nich weeten waut en een Mensch sien Hoat es, oba Gott weet, un fa jieda Woakj woat hee een Loon jäwen.  Well wie uk doaraun denkjen fa ons selfst.
            Ekj well noch een kjlienet bät mea sajen äwa de twee Sieden.  Wie sullen doa nich aun denkjen, daut Menschen aula onse Fienden sennen, wan see uk jäajen ons sennen.  Jesus sajcht en Matäus 5:44-45 soo aus dit:  “Oba ekj saj junt:  Siet june Fiend goot, un säajent dee, dee junt flieekjen; doot goots fa dee, dee schlajcht to junt sent; bät fa dee, dee junt beleidjen un vefoljen, soo daut jie jun Voda em Himmel siene Kjinja kjennen sennen, wiels hee lat siene Sonn oppgonen äwa de goode un de schlajchte, un lat daut räajnen äwa jerajchte un ojjerajchte.“  Jo, doa sent mau twee Sieden, oba onse Oppgow es toom Menschen von Jesus vetalen, soo daut see kjennen vom Diestren rut komen un en Jesus sien Licht nenn komen.  Wie sent beroopen toom äwa de gaunze Welt daut Evangelium vekjindjen.  Wie kjennen dan nich schlajchtet doonen to onse Fiend soo aus de Welt deit.  Wie motten aundasch sennen.  Wan daut Kjristen sent, dan sell wie an oppbuen, un wan daut nich Kjristen sent, sell wie an proowen to rieekjen met daut Evangelium.  En jieda Loag doo wie noch emma goodet.  Wan wie Kjristen sent, dan hab wie nich de Frieheit toom Menschen schlajcht behaundlen, eendoont auf daut Fiend sent ooda Frind.
            Kjikjt emol no waut Jesus deed fa ons.  Reema 5:10 sajcht, “Aus wie noch Gott siene Fiend wieren, word wie derch sienen Sän sien Doot met am veseent.  Un nu daut wie jerat sent, wooväl sechra kjenn wie ons de Radunk doch sennen, wiels hee en ons läft!“  Jesus jeef sien Läwen han fa ons, aus wie noch siene Fiend wieren.  Nu daut wie jerat sent, woo kjenn wie dan aundre Menschen schlajcht behaundlen, wan Jesus ons soo goot es?  Wan Jesus en ons läft, dan sull wie aundre uk soo behaundlen, aus hee ons deit.  Well wie dan en Leew gonen un buen onse Breeda un Sestren em Harn opp, un well wie toop schaufen, toom daut Evangelium vekjindjen un Menschen Gott sien Wuat brinjen, daut see uk kjennen Poat von Gott sien Rikj sennen.