De Markus Breef, Numma 58

Toom Läsen:  Markus 11:27-33
           
“Dan kjeemen see wada no Jerusalem.  Un aus hee em Tempel romjinkj, kjeemen de Huagepriestasch, de Schreftjelieede un Eltestasch, un säden to am:  Derch waut fa eene Macht deist du dit?  Ooda wäa haft die daut rajcht jejäft dit to doonen?
           
Jesus auntwuad un säd to an:  Ekj woa junt uk waut froagen; jäft mie eene Auntwuat, un dan woa ekj junt uk sajen, wäa mie daut rajcht jeft dit to doonen.  Sajcht emol:  Wia Johanes siene Doop vom Himmel, ooda von Menschen?
           
See hauden mank sikj eene Berodunk un säden:  Wan wie sajen:  Vom Himmel, dan woat hee sajen:  Wuarom jleewd jie am dan nich?  Oba wan wie sajen:  Von Menschen?
           
Doatoo ferchten see de Menschen, wiels dee hilden Johanes fa eenen grooten Profeet.  Un soo säden see to Jesus:  Wie weeten nich.
           
Dan säd Jesus to an:  Dan saj ekj junt uk nich, wäa mie daut rajcht jeef dit to doonen.“
 
 
           
Ekj finj daut emma intressaunt woo Jesus sikj behaundeld met de Juden Leidasch.  See proowen emma wada am en siene Wieed faust to binjen, oba Jesus weet sikj emma, un daut sent emma de Leidasch waut bat aum Enj komen met äare Wieed.  See proowen foaken Jesus faust to schnalen en siene Wieed, oba see sent emma dee waut faust jebungen woaren.  Dit passieet noch eemol vondoag.
           
Waut wie vondoag jeläst haben passieet fuaz no daut waut wie väajetmol deeden läsen, wua Jesus siene Jinja lieed äwa bäden un eena dän aundren vejäwen.  Krakjt dän väajen Dach haud Jesus aul de Jeltwakjsla un Tierenhendla von dän Tempel rut jejoagcht, un ekj jleew daut dit es de Uasoak wuarom de Schreftjelieede, Eltestasch, un Huagepriestasch am entjäajen komen vondoag.  See sent dee waut Veauntwuatunk haben äwa dän Tempel, un Jesus oba schmeet aules om un funk em Tempel aun to lieren.  Nu wellen see weeten derch waut fa eene Macht kaun Jesus Menschen vom Tempel rut driewen; ekj jleew see wieren vedrislich äwa am.  Derch daut waut Jesus haud jedonen, met de Jeltwakjsla un Tierenhendla von dän Tempel rut joagen, deed Jesus de Leidasch von de Juden beschuldjen, daut see de Menschen deeden orrajcht leiden.  Denkjt doaraun, daut de Huagepriestasch wieren dee waut em Tempel deenden; Jesus kjeem en äare Woakjplauz nenn un schmeet aules om.
           
Krakjt hia kjenn wie seenen, wua de Juden Leidasch äare Jedanken wieren.  See wieren besorjcht om an selfst, un woo de Menschen äwa an dochten, oba Jesus wia besorjcht om Gott sien Nomen.  Dit es wuarom Jesus an nich sajcht, derch waut vonne Macht hee dit deit; wiels see sent aulemol nich besorjcht äwa Gott un sien Rikj.  Daut wudd kjeen unjascheet jemoakt haben, en äare Jedanken äwa Jesus, wan hee an haud jesajcht, wiels see dochten bloos om an selfst.  Wan äare Jedanken wieren werkjlich aun Gott ieren, dan wudden see daut niemols haben jeloten, daut de Tempel to een Reibaheel wort jemoakt.
           
Jesus weet dit aula, un hee weet uk waut see denkjen äwa Johanes de Deepa.  Hee stalt an eene Froag aun, nich wiels hee well äare Auntwuat weeten, oba toom an stell moaken.  Doaderch bewiest hee uk äare Jedanken, daut see denkjen dolla aun woo de Menschen äwa an denkjen, aus woo toom Gott ieren.  Jesus siene Froag fa an es gaunz eefoch.  Hee frajcht en Varsch 30:  “Sajcht emol:  Wia Johanes siene Doop vom Himmel ooda von Menschen?“  To dise Froag haben see nich eene Auntwuat, wiels see weeten selfst daut see sent orrajcht.  Wan see sajen vom Himmel, dan hauden see sult doano horchen, oba see horchten nich no am.  Oba wan see sajen von Menschen, dan woaren de Menschen an doll sennen, wiels de Menschen hoolen daut Johanes de Deepa een Profeet wia.  Nu haft Jesus an faust jebungen, un see kjennen doa nich rut; doawäajen sajen see daut see nich weeten.
           
Wie weeten oba woo daut met Johanes de Deepa stunt, wiels Jesus sajcht selfst daut hee een Profeet wia.  En Lukas 7:26 sajcht Jesus äwa Johanes de Deepa soo aus dit:  “Oba no waut jinkj jie kjikjen?  Een Profeet?  Jo, un ekj saj junt:  Noch mea aus een Profeet.“  Un dan sajcht daut wieda en Lukas 7:28-30, “Wiels ekj saj junt, daut Johanes de Deepa een jratra Profeet es aus irjent sest wäa, von een Frumensch jebuaren; un doch es de kjlansta en Gott sien Rikj jrata aus hee.
           
​Un aule Menschen, soogoa de Takskollakjta, dee Jesus hieeden, jeewen Gott rajcht, wiels see hauden sikj met Johanes sienen Doop deepen loten.  Oba de Farisäa un Schreftjelieede deeden Gott sien Rot fa an selfst veachten, un leeten sikj nich von am deepen.“  Wie läsen hia, daut de Juden Leidasch deeden Gott sien Rot fa an veachten, un dit es wuarom see daut nich kjennen too stonen, daut Johanes sienen Doop vom Himmel kjeem.  Jesus sajcht selfst, daut Johanes de Deepa een Profeet wia; dit meent daut see hauden aula sult no am horchen.  Oba nich bloos daut; Johanes de Deepa kjeem toom een Zeichnis sennen von Jesus!  Doa wia nu eena, noch jrata aus Johanes de Deepa, un see wullen uk nich no am horchen.  Well wie nich soo sennen aus dise Juden Leidasch wieren.  Jesus es Gott sien Sän, un hee kjeem toom ons raden von de Sind; well wie dan uk doonen waut hee sajcht!  Wie haben Gott sien Wuat, un daut Wuat deit von Jesus zeien; well wie doano horchen, un Jesus aunroopen aus Heilant un Har, daut wie kjennen jerat woaren.