De Markus Breef, Numma 65

Toom Läsen:  Markus 13:1-8
           
“Aus hee ut däm Tempel rut jinkj, säd eena von siene Jinja to am:  Liera, kjikj emol waut hia fa Steena un fa Jebieda sent!
           
Jesus säd to am:  Sitst du dise groote Jebieda?  Dee woaren soo doljebroaken woaren, daut hia nich een Steen opp däm aundren bliewen woat.
           
Aus hee opp däm Oliewen Boajch jäajenäwa von däm Tempel saut, fruagen Petrus, Jakobus, Johanes un Andreas gaunz stell, auf hee an sajen wudd, wanea daut woaren wudd, un waut doa wudd fa een Tieekjen komen, wan daut ieescht passieren sull.  Un Jesus funk aun to an to sajen:  Seet doano, daut junt kjeena veleiden woat!  Väle woaren en mienem Nomen komen un sajen:  Ekj sie dee, un see woaren väle veleiden.  Un wan jie von Kjrich un Kjrichsjeschrech hieren woaren, doawäajen fercht junt nich.  Daut mott aula komen.  Oba daut es noch nich daut Enj.  Een Volkj woat jäajen daut aundre oppstonen un een Kjennichrikj jäajen daut aundre.  Doa woat opp veschiedne Städen Ieedbäben sennen.  Doa woat Hungaschnoot un Forcht sennen.  Oba dit es noch mau wua daut Trua aunfangt.“
 
 
 
           
Vondoag läs wie, woo eena von Jesus siene Jinja sikj wundat äwa de jewaultje Steena waut worden jebrukt toom dän Tempel buen en Jerusalem.  Daut wieren opp iernst groote Steena,  un de Tempel wia stoakj un groot jebut.  De Tempel von waut see hia räden es dee waut Kjennich Herodes bud, de selwja Kjennich Herodes waut aul de Junges twee Joa oolt un jinja doot muak en Betlehem, no däm daut Jesus jebuaren wia.  De Jeschicht jeit en Matäus 2:16-18.  Enne Schreft sajcht daut nich wäa disen Tempel en Jerusalem haud jebut, oba aundre Bieekja von Jesus siene Tiet sajen ons daut.  Dis Tempel wia nich bloos von onjefäa jebut.  Dee wia groot un stoakj jemoakt, un haud väl Golt bennen, toom bewiesen woo Rikj Gott sien Hus wia.  Dit es wuarom Jesus sien een Jinja sikj tieet äwa de groote Steena un Jebieda waut doa sent.
           
Oba Jesus sajcht hia daut nich eent von dise Steena woat opp däm aundren bliewen; dee woaren aula doljebroaken woaren.  Jesus rät hia wada von soont waut to siene Tiet noch nich passieet wia.  Ojjefäa 40 Joa no Jesus sien Doot aum Kjriez, kjeem de Reema met äare Armeeien un neem Jerusalem met Jewault äwa, un bruaken de gaunze Staut dol.  De Tempel wort gaunz twei jemoakt, soo daut nich een Steen opp däm aundren bleef; vondoagschen Dach noch es bloos daut Fundament waut von de Tempel äwa blift.  Dit waut Jesus säd hia en Varsch 2 wia een Profezeiunk von waut noch wudd woaren, un en Joa 70 no Kjristus wort daut.  Dit bewiest noch eemol, daut Jesus een Profeet wia, un uk mea aus een Profeet.
           
No dit, froagen siene Jinja am wäajen een Tieekjen von wanea dise Dinja passieren woaren, un Jesus jeft an nich eene kloare Auntwuat.  See froagen wäajen dän Tempel, oba Jesus rät nich bloos von de Tempel hia.  Hee rät uk von daut Enj, wan de Welt ieescht woat to Enj komen.  Hee sajcht to de Jinja daut see nich sellen sikj veleiden loten, wiels väle woaren komen un sajen, daut see de Christus sennen, un see woaren väle Menschen veleiden.  Dise Menschen woaren komen aus een Tieekjen von daut Enj, un von Jesus siene Tiet bat vondoagschen Dach, sent doa aul väle Menschen jekomen, waut säden daut see de Christus wieren.  Un väle Menschen jinjen de hinjaraun!  Doa sent vondoagschen Dach väle Relijionen, waut gaunz faulsch sent, un faulsche leidasch haben.
           
Jesus sajcht uk daut doa woat väl Kjrich sennen, un Hungaschnoot, un Forcht, un molrajcht Ieedbäben sennen; aul dise Dinja aula toop sent Tieekjens von daut Enj; oba Jesus sajcht uk daut et noch nich daut Enj es.  Aul dise Dinja sent mau de Aunfank von de Trua; waut meent dit aula?  Un waut kjenn wie lieren von waut Jesus hia sajcht?
           
Een Dinkj waut wie sellen lieren von aul dit, es daut wan wie Jesus kjanen, dan brucken wie ons nich enjsten fa irjent von dise Dinja.  Jesus sajcht to siene Jinja, daut see sellen sikj nich enjsten!  Daut es uk soo fa ons vondoag.  Un nich bloos daut, oba Jesus sajcht daut dise Dinja motten aula komen; de sent aul bestemt von Gott, daut de passieren woaren.  Dit meent daut Gott es noch emma Majchtich, un daut dit woat aula passieren soo aus Gott daut well.  Wan wie een Vetruen haben aun Gott, dan brucken wie ons nich ferchten fa irjentwaut, waut doa passieet, wiels Gott es äwa aules.
           
​Aul dise Dinja waut Jesus sajcht woaren passieren, sent soone Dinja wua wie ons leicht kjennen äwa sorjen.  Un daut jeit uk to vestonen.  Oba wan wie onse Hopninj en Jesus haben, un een Vetruen haben aun Gott, dan brucken wie ons nich enjsten.  Jesus säd daut dise Dinja wieren mau daut Aunfank von de Trua, oba daut passieed aul ojjefäa 2000 Joa trigj.  Ekj weet nich woo lang dise Welt noch woat stonen, ooda woo lang noch ea Jesus trigj kjemt, oba ekj kaun mie gaunz opp Gott vetruen, daut hee mie nich auleen lat en aules waut doa woat.  Gott es tru, un hee woat siene Kjinja nich auleen loten derch schwoare Tieden gonen.  Hee es emma doa krakjt biesied ons, wan wie Trubbel haben, un wie kjenn ons gaunz opp am veloten.  Doa sent väle, molrajcht enne Kjoakj, waut sikj groote sorjen moaken äwa de Welt un aules waut aun jeit, un doa sent uk väle waut sikj gaunz en enjsten fa veschiedenste Rejierunks un woo schlajcht dee sent.  Un jo, doa sent väle schlajchte Rejierunks oppe Welt, un see stalen sikj jäajen Gott opp, oba kjeena kaun jäajen Gott jewennen.  Wan Jesus sajcht, daut wie ons nich sellen enjsten, woo kjenn wie dan ojjehuarsom sennen un ons enjsten doawäajen?  Well wie leewa ons bloos gaunz opp am vetruen, daut waut hee sajcht, woat woaren.  Hee haft aules unja siene Macht, un doa es nuscht nicht waut sikj kaun jäajen am oppstalen, un jewennen.  Wan wie dan uk derch Trubbel gonen, un ons daut aula toop schwierich sitt, well wie daut dan aula em Jebäd to Gott brinjen, un ons opp am vetruen vom gaunzen Hoaten.  Dan woaren wie Fräd finjen fa onse Seelen.