De Markus Breef, Numma 79

Toom Läsen:  Markus 15:6-15
           
“Pilatus haud daut soo daut hee an opp däm Fast een faustjenomnen loosjeef; un see kunnen sikj dän wälen.  See hauden dan jrod eenen Maun, Barabas, faust, dee met aundre toop en eenen Opprua eenen Mort begonen haud.  Dan kjeem eene maussen Menschen no Pilatus un fruagen doano, daut hee wada soo doonen sull aus hee emma deed.  Dan fruach Pilatus an, auf hee an sull dän Judenkjennich loosjäwen, wiels hee wist daut de Huagepriestasch am Jesus ut Aufgonst en de Henj jejäft hauden.  Oba de Huagepriestasch hizten daut Volkj en, daut hee an väl leewa sull Barabas loojäwen.  Pilatus fruach an:  Waut saul ekj dan met dän doonen, dän jie dän Judenkjennich nanen?
           
See schrieejen:  Doo am kjriezjen!
           
Pilatus fruach:  Wuarom?  Waut haft hee fa een vebräakjen begonen?
           
Oba see schrieejen bloos soo väl dolla:  Doo am kjriezjen!
           
Wiels Pilatus daut Volkj tofräd stalen wull, jeef hee an Barabas loos un leet Jesus vepitschen un jeef am han, jekjriezicht to woaren.“
 
 
           
Wie läsen vondoag von woo Jesus woat äwajejäft toom doot jemoakt woaren.  Wie seenen uk woo Pilatus weet, daut Jesus haft nuscht orrajcht jedonen, oba wiels de Juden daut soo jieren wellen, jeft hee bie un lat Jesus doot jemoakt woaren.  Hee haft Angst, daut de Menschen woaren sikj oppräajen un Trubbel moaken, un doawäajen lat hee Jesus doot jemoakt woaren, wan hee uk gaunz oschuldich es.
           
Daut ieeschte Dinkj waut wie wellen no kjikjen, es daut Pilatus wist goot wuarom de Juden am hauden Jesus jebrocht.  Hee wist daut see daut bloos ut Aufgonst deeden, wäajen hee selfst kunn kjeene Uasoak finjen toom Jesus doot moaken.  Pilatus wia nich een feina Maun, un wie finjen von veschiedne Schriewa to siene Tiet daut hee deed foaken Dinja sea schlajcht behaundlen.  Hee haud aul miere Mol de Reemasche Soldoten jäajen de Juden jeschekjt, wiels see sikj deeden oppräajen; hee jeef nich väl romm om de Juden äa Gloowen.  Daut hee nich wull Jesus doot jemoakt haben sajcht väl von woo oschuldich Jesus wia; soo oschuldich daut molrajcht een Sindvolla Gowernia daut kunn seenen.
           
Oba, wie lieren noch een Dinkj von Pilatus vondoag, un daut es daut hee wia schwak em Senn.  Hee wist waut hee sull doonen, oba hee wia nich wellens jäajen de Menschen to stonen, un hee leet an äa Wajch haben.  Wie lieren uk wada, woo groot de Huagepriestasch äare Hot fa Jesus wia, wiels wie läsen daut see hizten de Menschen en soo daut see aula schrieejen, daut Jesus sull jekjriezicht woaren.  De Menschen wieren uk schwak, wiels see leeten sikj soo leicht enjehitzd von äare Leidasch, wan mol eene Wäakj ver dit lowden see Jesus aus de Messias, en Markus 11:1-11.  Dit wia dan aus Jesus en Jerusalem nenn rieden deed, un de Menschen spreeden äare Waninkjs han ver Jesus, un deeden am preisen aus Kjennich.
           
Daut poat waut wie wellen dollste no kjikjen vondoag, es daut Pilatus leet Barabas gonen, oba hee leet Jesus doot jemoakt woaren.  Dit es een wundascheena Bewies, von woo Jesus de Sinda sienen Plauz neem opp daut Kjriez.  Barabas wia dee, waut haud sullt stoawen; hee wia een Merda!  Oba Barabas wort frie jemoakt, un Jesus wort hanjejäft toom doot moaken, wan Jesus uk gaunz oschuldich wia.
           
Wie aula sent soo aus Barabas.  Wie han nich aula Mort begonen, un wie talen ons veleicht soo aus wan wie goode Menschen sent, oba kjeena es heilich opp dise Ieed, nich een Mensch.  Jieda Mensch haft jesindicht, un daut es jenuach toom vedaumt sennen.  Gott kaun nich Sind lieden, un hee mott daut strofen.  Jieda Sind es jenuach toom ons vedaumen, un jieda Mensch waut jeemols haft jeläft es een Sinda.  Bloos Jesus läwd onen to sindjen.
           
Jesus neem de Plauz waut Barabas haud sult haben, un soo deit Jesus uk fa jieda Mensch waut aun am jleeft.  Wie aula, soo aus Barabas, haben eene Sindenschult to betolen.  De Strof fa de Sind es dän Doot.  Oba Jesus nemt onsen Plauz, un wie gonen frie.  Barabas kjrieech hia noch eene Jeläajenheit toom läwen; fa am wia daut fiesisch, daut Jesus sienen Plauz neem, oba fa ons es daut jeistlich.  Dit passieed aula no Gott sienem Plon no, wiels wie hauden kjeene Hopninj onen daut Jesus de Strof fa ons deed tolen.
           
​Wie woaren näakjstet mol kjikjen no woo Jesus vepitscht un vespot wort, wiels doa es noch väl mea waut see no Jesus doonen aus waut wie vondoag deeden läsen.  Oba ekj well bloos noch dit froagen:  Hast du Jesus aul aunjenomen aus dien perseenelja Har?  Hee haft de Sindenschult gaunz betolt.  Wan du aun am jleefst, dan es diene Sind aufjelascht, un dan kaust du ver Gott stonen aus soona waut nie nich jesindicht haft.  Dit es nich wiels wie kjennen heilich sennen, oba wiels Jesus wia heilich, un hee steit en fa ons, wan wie aun am jleewen.  Dan kaust du uk loosjesat sennen von de Sindenschult.  Wie brucken bloos ons Gloowen opp am saten.  Lot dit nich toch!  Doo vondoag die hanjäwen no Jesus, wiels du hast veleicht nich mea Jeläajenheit.  Jesus luat fa die toom aun am jleewen, un hee woat die dan aunnämen.