Wie Sent Werkjlich Läwendich

Toom Läsen:  Efeesa 2:1-10
         "Jie wieren en june Sinden jeistlich doot, aus jie noch soo läwden aus dise Welt daut velangd, un de onsechtboare Macht, dee äwa dise Welt harscht, unjadon wieren, dän Jeist, dee en dee wirkjt, dee Gott nich jehorchen.  Wie läwden to eene Tiet uk aula soo aus ons Fleesch daut velangd un wuatoo onse Lost ons dreef, un wieren von Natua ut Kjinja unja Gott sienen Oaja, soo aus aule aundre.  Oba Gott es soo rikj aun Jnod, un hee es ons soo goot en siene Leew, daut hee ons met Christus toop wada toom Läwen brocht, wan wie uk doot en onse Sinden wieren.  Derch Jnod woa wie seelich.  Gott haft ons met Christus Jesus toop oppjewakjt un met am toop eenen Plauz em Himmel jejäft, daut hee en de tookjinftje Tieden ons en Christus Jesus bewiesen kunn, woo vetraflich rikj hee aun Jnod es, un woo sea goot hee ons es.  Jie sent derch Gott siene Jnod jerat, wiels jie jleewen.  Daut es nich derch june Woakjen.  Daut es een Jeschenkj von Gott.  Daut es nich ut Woakjen, soo daut kjeena Uasoak haft sikj selfst to lowen.  Doaderch, daut wie met Christus Jesus vebungen sent, haft Gott ons niejeschaufen un en eenen Staunt vesat, daut wie goodet doonen kjennen.  Nu sell wie uk doano läwen." (Efeesa 2:1-10)
 
 
            Woo scheen es daut toom weeten daut wie Läwen haben!  Nich blooss daut wie Odem un Bloot haben en onse Kjarpasch, oba daut ons wort läwendich jemoakt em Jeist, wua wie mol doot wieren.  Wie wieren gaunz oppoat, aufjeschnäden, un wiet auf von Läwen, oba Gott muak ons wada läwendich en Christus.  Adam wort derch siene Sind em Goaden Jeistlich doot, un hee haud dan nich mea Jemeenschoft met Gott; de Strof fa Sind wia toom Jeistlich un Fiesisch stoawen.  Oba aus Christus, dee tweeda Adam, kjeem, dan jewonn Hee äwa dän Doot, un muak daut soo daut onse Jeista wada kunn läwen haben derch sien Jeist.  Dit es de scheene Oabeit waut Christus deed aus Hee storf opp dän Kjriez un aus Hee oppstunt vom Grauf.
            Aus wie Jeistlich doot wieren en onse Sinden läwd wie soo aus de Schreft sajcht, "...to eene Tiet uk aula soo aus ons Fleesch daut velangd un wuatoo onse Lost ons dreef, un wieren von Natua ut Kjinja unja Gott sienen Oaja, soo aus aule aundre," (Efeesa 2:3).  Daut es woo wie wieren en onse Natua onen Gott.  Kjikj emol waut de Schreft sacht wäajen de natualicha Mensch:  dee es Jeistlich doot, un läft soo aus de Welt daut velangt; dee es de Macht von de Welt unjadon, un uk too de Jeist waut Gott nich jehorcht;  dee läft soo aus daut Fleesch velangt un wuatoo de Lost an drift, un es vonne Natua een Kjint unja Gott sienen Oaja (Efeesa 2:1-3, 5).  Dit jeft nich een scheenet Bilt von woo wie aus Menschen sennen.
            Paulus sacht oba uk noch dit:  "Derch Jnod woa wie seelich," (Efeesa 2:5).  Wie hauden kjeene Hopninj un kjeen Wajch jerajcht too woaren ver Gott, wiels aule Jedanken waut wie hauden wieren blooss toom schlajchtet doonen.  Doawäajen kaun blooss Gott, dee rikj aun Jnod es, ons raden von ons schlajchtet, wiels dee eensje Medizien fa Sind es Jesus Christus.  "Gott haft ons met Christus Jesus toop oppjewakjt un met am toop eenen Plauz em Himmel jejäft," (Efeesa 2:6).  Dise Wieed sullen ons sea dankboa moaken un eene deepe Leew en ons erwakjen fa ons Heilant un Rada.  Johanes schrift daut wie haben Leew "wiels hee ons aul verhäa siene Leew jeschonken haft," (1 Johanes 4:19).  Gott haft nich blooss onse Sind aufjelascht, oba Hee jeef ons uk eene Städ em Himmel!  Daut es blooss derch siene Jnod un Frintlichkjeit daut wie soon Vespräakjen haben aus dit.
            Nu daut wie dit haben jelieet mott wie toostonen daut wie kjennen de Seelichkjeit niemols vedeenen.  Doa es kjeen Wajch woo wie äwahaupt kjennen aunfangen toom Gott toom jefaulen läwen.  "Wiels derch Jesazeswoakjen, woat kjeen Mensch ver Gott jerajcht woaren," (Reema 3:20).  Onse Woakjen sent nuscht em vejlikjnis met Gott siene Jerajchtichkjeit.  Oba wiels wie aun Christus jleewen, hab wie onse ieejne Jerajchtichkjeit, dee derch Woakjen kjemt, jetuscht fa eene Jerajchtichkjeit waut derch Gloowen en Christus kjemt.  "Ekj well en am sennen un nich miene ieejne Jerajchtichkjeit haben, dee derch daut Jesaz kjemt.  Ekj sieekj dee Jerajchtichkjeit, dee derch dän Gloowen aun Christus kjemt.  Daut es eene Jerajchtichkjeit, dee Gott mie toosprakjt, wan ekj aun Jesus jleew," (Filippa 3:9).  Wan wie aun Christus jleewen, dan woa wie jerajcht derch Gott siene Jnod.  Aul dee Woakjen dee wie doonen aus Kjristen sent Bilda von dee Jnod dee wie jekjräajen haben.  "Jie sent derch Gott siene Jnod jerat, wiels jie jleewen.  Daut es nich derch june Woakjen.  Daut es een Jeschenkj von Gott.  Daut es nich ut Woakjen, soo daut kjeena Uasoak haft sikj selfst to lowen," (Efeesa 2:8-9).  Onse Woakjen kjennen niemols toorieekjen toom ons raden.  Dit es wuarom daut Evangelium soone goode Norecht es:  daut Gott, wiels Hee rikj aun Jnod es, deed nich Menschen äare Sinden jäajen an talen, oba muak leewa een Wajch an to raden derch sienen eensjen Sän, soo daut wie uk kunnen Gott siene Kjinja woaren.
            Waut dan?  Wan onse Woakjen woaren niemols goot jenuach sennen, sullen wie dan opphieren met goodet doonen?  Sea lang nich!  Goode Woakjen sent de Frucht von een Jeistlichet läwen.  Jakobus 2:14, 17 sajcht, "Waut halpt daut, Breeda, wan een Mensch sajcht, hee haft Gloowen, un haft oba kjeene Woakjen?  Kaun sien Gloowen am raden? ...Soo es daut uk met een Gloowen.  Wan dee nich Woakjen haft, es dee doot."  Denkjt doaraun, daut Gott erwakjd Jerajchtichkjeit en ons wan wie aun Jesus jleewen.  Lot ons dan noch soo sea schaufen toom daut Evangelium wieda brinjen.  No däm waut Paulus ons sajcht woo wie kjennen seelich woaren, sajcht hee uk woo Gott ons nu sitt en Jesus.  "Doaderch, daut wie met Christus Jesus vebungen sent, haft Gott ons niejeschaufen un en eenen Staunt vesat, daut wie goodet doonen kjennen.  Nu sell wie uk doano läwen," (Efeesa 2:10).  Well wie Gott ieren derch daut Goodet waut wie doonen.  Wie sent nich mea dee waut Gott nich jehorchen; de Heilje Jeist schauft en ons soo daut wie doonen waut Gott velangt.  Jesus säd, "Wäa mie goot es, woat miene Jebooten hoolen," (Johanes 14:15).  Well wie dan "en een nieet Läwen waundlen," (Reema 6:4), un aul dee goode Woakjen doonen waut Gott haft fa ons reed jelacht ut een dankboaret Hoat fa de Seelichkjeit, dee wie haben derch Christus.