De Markus Breef, Numma 11

​Toom Läsen:  Markus 2:23-28
            "Eenen Sabat jinkj Jesus derch de Jeträadflekja; un siene Jinja fungen aun Oaren to plekjen un uttorublen.  Dan säden de Farisäa to am:  Kjikj doch waut diene Jinja aum Sabat doonen.  Daut es nich rajcht.
            Hee säd to an:  Hab jie niemols jeläst, waut David deed, aus hee un dee, dee met am wieren, hungrich wieren un nich to äten hauden.  Hee jinkj don, aus Abjatar Huagapriesta wia, em Gotteshus nenn un eet daut Broot, daut Gott jeweit wia un sest kjeena aus de Priesta äten durf.  Un jeef dan uk no dee, waut met am wieren?
            Dan säd hee to an:  De Sabat es doa wäajen de Menschen, un nich de Menschen wäajen dän Sabat.  Un doawäajen es de Menschensän uk Har äwa dän Sabat."
 
 
            Wan wie hia läsen finj wie daut de Farisäa jleichten Jesus nich sea, wiels opp jieda Jeläajenheit waut see hauden stalden see am oppe Proow.  Daut Jesaz waut Moses an jeef veboot Menschen aum Sabat to schaufen; oba wäa wudd nich Oaren plekjen toom äten?  De Farisäa wieren soo beduat äwa Jesus siene Jinja daut see kloagden to am äwa siene ieejne Jinja!  See hilden sikj soo faust aun daut Jesaz, daut dee nich jebroaken sull, daut see vebooden Menschen meist to läwen.  Jesus sajcht opp eene aundre Städ äwa de Schreftjelieede un Farisäa:  "See binjen aundre Menschen schwoare Lausten opp de Schulren, dee schia nich to droagen sent.  Oba see selfst woaren nich een Finja rieren, dee droagen to halpen," (Matäus 23:4).
            Wan wie doa aun denkjen daut Jesus Gott sien Sän es, un haft Weisheit von Gott, waut hee de Menschen lieet, daut es daut schia fonnich daut de Farisäa am wudden beschuljen fa waut siene Jinja deeden.  Doa es kjeena waut de Schreft bäta vesteit aus Gott selfst!  Aulemol, de Farisäa komen Jesus entjäajen, un Jesus auntwuat an von de Schreft.  De Farisäa wieren soo faust aun Jesazen hoolen daut see hauden de Uasoak vejäten wuarom Gott de Jesazen muak.  Gott muak de Jesazen toom siene Heilichkjeit wiesen, oba uk daut Menschen kunnen een goodet Läwen fieren.  Daut Jesaz es doa fa Menschen, nich Menschen fa daut Jesaz.
            Well wie hia eene Lekzion lieren von de Farisäa, daut wie nich daut doonen waut see deeden.  Jesus wia met siene Jinja toop; daut meent hee wist goot waut see deeden aus see derch de Jeträajdflekja jinjen.  De Farisäa wieren soo beduat om aundre Menschen daut see proowden Jesus uttogrunzen fa waut siene Jinja deeden.  See muaken sikj gaunz drock met waut aundre Menschen deeden.  Een Dinkj waut mie Tus wort jelieet es daut ekj saul fa mie selfst opp paussen, daut ekj rajcht läw, un nich mie om aundre Menschen äare Sachen om kjemren, wiels daut jeit blooss no de Pludarie.  Well wie dan no ons selfst opp paussen, un onse Famieljes, daut wie rajcht läwen, leewa aus daut doonen waut de Farisäa deeden.
            Jesus sajcht:  "De Sabat es doa wäajen de Menschen, un nich de Menschen wäajen dän Sabat," (Markus 2:27).  Dit es eene besondre Bemoakjunk.  Dän Sabat hoolen es Poat von de Tieen Jebooten, en daut Jesaz waut Gott to Moses erkjläad.  De Juden hilden daut Jesaz sea huach aun, wiels daut sent Gott siene Jebooten.  Jesus dreit daut Bilt oba om, un sajcht eefach daut daut Jesaz es doa fa Menschen; daut Jesaz es jejäft worden soo daut Menschen kunn seenen woo heilich Gott es, un sträwen toom rajcht läwen.  Oba kjeen Mensch kaun daut Jesaz hoolen.  Doawäajen kjeem Jesus, daut hee daut Jesaz kunn erfellen, soo daut wie nich mea aun daut Jesaz motten aunjebungen sennen, oba aun Gott siene Jnod derch Christus kjennen frie sennen.  Paulus sajcht daut onen daut Jesaz, kjenn wie nich weeten waut Sind es (Reema 7:7).  Wiels kjeena kaun daut Jesaz hoolen, schekjt Gott sien Sän Jesus Christus, daut wie kunnen jerat woaren.
            Gott haft soone Leew fa Menschen, daut maurajcht wan wie nich kjennen soo läwen aus hee velangt, kjennen wie doawäajen jerat woaren.  Gott sien Jesaz es heilich, jo, oba hee haft uk Leew fa Menschen.  Hee well nich haben daut irjent eena saul veloaren gonen (2 Petrus 3:9).  En Leew muak Gott siene Jebooten, un haft uk Jedult, daut nich aulemaun to Dood kjemt, oba daut wie uk kjennen vom Doot jerat woaren.  Dit es wuarom Jesus sajcht daut Jesaz es doa wäajen de Menschen, un nich de Menschen wäajen daut Jesaz.
            Daut latste Dinkj waut Jesus sajcht es daut de Menschensän es uk Har äwa dän Sabat.  Jesus wist wäa hee wia, un to waut hee jekomen wia.  "Menschensän" es een Tietel jenomen von daut Buak Daniel, em Oolen Testament, waut Gott sien jewälda Deena bedied.  Daut Jesus dis Nomen brukt meent daut hee nand sikj selfst Gott sien jewälda Deena, dee Gott sien Sän es.  Doa es kjeen Twiewel daut Jesus Gott sien Sän es, wiels hee steit daut selfst too.  Wan hee Har es, dan well wie daut uk nich toch loten, waut hee sajcht.  Well wie dan no am horchen, un am aunnämen aus Har.