De Markus Breef, Numma 35

​Toom Läsen:  Markus 7:14-23
            "Jesus roopt daut Volkj wada no sikj un säd:  Horcht emol aula no mie un vestot dit!  Doa es nuscht, waut eenen Mensch veorreinicht daut von buten en am nenn kjemt; een Mensch woat derch daut orrein, waut ut am rut kjemt.  (Wäa Uaren haft toom hieren, däm lot hieren.)
            Aus hee de Menschen veleet un trigj em Hus jinkj, fruagen siene Jinja am, waut daut Jlikjnis bedied.  Hee fruach an, auf see uk noch soo stomp wieren:  Kjenn jie daut nich seenen, daut een Mensch nuscht veorreinjen kaun, daut von buten en am nenn kjemt?  Daut jeit am nich em Hoat nenn, oba en de Moag, un dan ut däm Kjarpa rut.
            Doamet säd Jesus daut aulet Äten rein wia.  Hee säd noch wieda:  Waut ut eenem Mensch rut kjemt, moakt am orrein; wiels von bennen ut eenem Mensch sien Hoat komen schlajchte Jedanken, Huararie, Stälsucht, Mort, Ehebruch, Jiez, schlajcht sennen, Schuftarie, Lost, Aufgonst, Lastren, Stolt, un aule Domheit.  Aul dit schlajchte kjemt von bennen un veorreinicht eenen Mensch."
 
 
            Noch mol haben Menschen de Iedee, daut Menschen sent em Derchschnett goode Persoonen, un daut wan wie sindjen, daut wie dan blooss haben een Fäla jemoakt.  Oba em Hoat sent wie doawäajen goot.  Menschen gaunz äwa de Welt jleewen dit, oba daut es gaunz orrajcht.  Jesus moakt daut hia gaunz kloa daut Menschen äa schlajchtet kjemt von bennen, em Hoat.  Wie sent aula Sinda, un wie haben aula schlajchtet en ons, un blooss derch Jesus kjenn wie jerat sennen von de Sind.
            De Juden en de Bibel hauden Räajlen äwa waut see kunnen äten, un fa an, wieren doa veschiedne Sorten äten waut an orrein muak no de Bibel no.  Daut Buak, 2 Mose, haft en veschiedne Varzh väl Räajlen äwa waut de Juden kunnen äten, un waut see nich kunnen äten.  De Juden, besondasch de Schreftjelieede un Farisäa, wieren sea Iernst met dise Räajlen aula hoolen.  Oba see hauden daut wichtichste Poat vejäten.  Aul de Räajlen worden jejäft toom Israel, un uk de Welt, wiesen woo heilich Gott es.  Jo, de Juden sullen de Räajlen hoolen, oba doa wia kjeena waut daut kunn.  Daut es wuarom see musten tieren opfren ver Gott.  Daut Jesaz beweess daut Menschen kjenn niemols heilich jenuach sennen, ooda goot jenuach sennen, toom Gott jefaulen.  Daut es ommäajlich.
            Jesus sajcht opp eene aundre Städ waut daut Probleem werkjlich es.  Hee sajcht en Lukas 11:42, "Wee junt, Farisäa!  Jie jäwen vom Päpament un Dell un aulet Kjäakjenkrut dän Tieenden oba om Leew to Gott un Jerajchtichkjeit kjemma jie junt nich.  Daut latste sull jie jedonen haben, un daut ieeschte nich unjaloten haben."  Dit sent strenje Wieed, oba dit es de Woarheit.  De Judische Leidasch wieren soo besorcht om de Jesazen hoolen daut see kjemmaden sikj nich om werkjlich Gott Leew haben.  Wie sent noch mol aula soo aus dit.
            Wie sent aula Menschen, un daut meent wie sent aula Sinda.  De Sind brukt kjeenem jelieet; daut passieet gaunz fa selfst.  Un wiels wie aula Sinda sent, es daut ommäajlich daut wie derch fein sennen kjennen de Seelichkjeit vedeenen.  De Schreft sajcht en Psalm 14:3, "Oba dee sent aula wajch jegonen, dee sent aulatoop vekomen.  Doa es kjeena dee goodet deit, uk nich eena."  Jesus sajcht daut äten kaun ons nich orrein moaken, wiels wie sent aul orrein derch onse Sind.  De Sind en ons moakt ons orrein.
            Oba doa es dan noch Hopninj.  De Goode Norecht von Jesus es daut hee muak een Wajch fa ons daut wie kjennen Seelich woaren, nich derch onse Woakjen, oba derch Gloowen en am.  Hebräa 11:6 sajcht, "Oba onen Gloowen es daut ommäajlich, Gott to jefaulen.  Wäa no Gott komen well, mott jleewen, daut hee es, un daut hee dee beloont, dee am iernstlich sieekjen."  Jesus läwd onen to sindjen, un hee jeef sikj han aus een Opfa, fa ons, onse Sindenschult to betolen.  Hee stunt opp vom Grauf dree Doag lota, un haft äwa de Sind un äwa dän Doot jewonnen.  Doaderch, wan wie nu aun am jleewen, aus Gott sien Sän, dan reinicht hee ons von onse Sinden, un dan droag wie de Schult nich mea met ons.  Dan woa wie rein!
            Jesus sajcht daut et es nich äwa fiesische Dinja waut wie ons sullen kjemren, oba ieeschte no de Seelichkjeit.  Ieeschte sellen wie Gott leewen, un no siene Jerajchtichkjeit sieekjen.  Jesus sajcht, "...du saust dän Harn, dienen Gott, von gaunzem Hoaten, met gaunze Seel, met aule Jedanken un aul diene Krauft goot sennen," un uk wieda, "...Du saust dienen näakjsten soo goot sennen, aus die selfst," en Markus 12:30, 31.  Aul de Räajlen waut de Juden wort jejäft, wieren toom bewiesen, daut Menschen sullen Gott goot sennen, un daut onen siene Vejäwunk es daut ommäajlich am to jefaulen.  Well wie daut nich vejäten!  Wan wie aun Jesus jleewen, dan haft hee ons von onse Sindenschult jereinicht.  Dit meent nich daut wie nu fälalooss sennen, oba leewa daut Gott ons onse Fäla vejeft derch sienen eensjen Sän Jesus Christus.  Preist däm Harn!