De Markus Breef, Numma 75

Toom Läsen:  Markus 14:43-52
           
“Un fuaz, wäarent hee noch räd, kjeem Judas, eena von de Twalw, un met am een schoof Mana met Schwieed un Kjneppels, dee von de Huagepriestasch un Schreftjelieede un Eltestasch jeschekjt wieren.  Un de Veroda haud an een Tieekjen jejäft un jesajcht:  Wäm ekj kussen woa, daut es dee; nämt am faust un hoolt am unja Oppsecht.
           
Judas jinkj fuaz no Jesus un säd:  Liera! un kust am.
           
Dan pakten see am un neemen am faust.  Dan neem eena von dee, dee doa dicht bie stunden, sien Schwieet un heiwd de Huagepriesta sienen Kjnajcht eent un hakt am een Ua auf.  Dan säd Jesus to an:  Sent jie no mie jekomen, aus wan jie met Schwieed un Kjneppels komen eenen Reiba fausttonämen?  Ekj wia aule Dach bie junt em Tempel un lieed junt, un jie neemen mie nich faust.  Oba daut mott soo romkomen aus de Schreft sajcht!
           
Dan veleeten see am aula un sagen daut see wajch kjeemen.  Doa kjeem een junga Maun met Jesus met, dee bloos een Loaken om sikj haud.  Aus see däm to hoolen kjrieejen, leet hee an met daut Loaken en de Henj un rand noaktich wajch.“
 
 
 
           
Vondoag läs wie woo Jesus faustjenomen woat, un uk wäa am veroden deit.  Väajetmol hieeden wie von woo Jesus deed en Getsemene bäden, un daut am daut soo schwoa jinkj daut sien Schweet wia soo aus groote Bloot Dreppen.  Jesus wist waut wudd noch to am passieren, un wie läsen vondoag daut Aunfank von Jesus sien grootet Lieden.
           
Jesus haft hia jrod foadich met bäden, un to siene Jinja räden, un wäarent hee vetalt, kjemt eene groote Häad menschen met Schwieed un Stekja Holt, doamet daut see Jesus met Jewault faustnämen woaren.  See komen am enjäajen aus wan hee een Reiba un Merda wia, oba hee haud sien gaunzet Läwen lank bloos goodet jedonen.  Daut oajchstet von dit aula, es daut de janja wäa dise Häad leiden deit, es eena von de Twalw, von Jesus siene ieejne Jinja, dee met am toop haud jewaundelt fa de latste dree Joa, ojjefäa.
           
Judas Iskariot haud met Jesus toop jejäten, un haud siene Lia jehieet von Jesus selfst; oba hee told Jesus trigj met am veroden.  Fa 30 Selwa Stekja vekoft hee Gott sien Sän, de Heilja vom Himmel, de Rada; un de Tieekjen von dit wia daut hee deed Jesus kussen.  Hee brukt soon Dinkj waut sull Leew bewiesen, un brukt daut toom Leew selfst veroden.  Doa es ekj jleew nuscht waut soo kloa bewiest woo vedreit dit aula wia aus daut.  Oba derch Gott siene Weisheit, weet wie daut dit wia uk aula Poat von Gott sien Plon.  Hee, Leew selfst, wia reed toom sikj loten verot to woaren, un faulsch beschuljcht to woaren, un to stoawen, om daut Menschen kunnen jerat woaren derch am.
           
Dit es de Sort Leew waut Gott haft fa de Welt.  Daut es eene Leew waut sikj lat veachten, un veroden, un jespot woaren, un noch mea aus daut, oba daut jeft nich opp.  Jesus läwd onen Sind, oba hee jeef sikj selfst opp, sien ieejnet Läwen, om aundre Menschen äare Sinden to vejäwen.  Dit es de Sort Leew waut Jesus haft fa de Menschen von de Welt, daut derch sienen Doot, kjennen Menschen am aunnämen un Gott siene Kjinja woaren.
           
Wie wellen uk een bät kjikjen no woo de Jinja daut behaundlen, wan Jesus faustjenomen woat.  Wie läsen hia daut eena von Jesus siene Jinja neem een Schwieet un hakt de Huagapriesta sien Kjnajcht sien Ua auf; oba daut sajcht ons nich wäa daut deed.  Johanes 18:1-11 vetalt uk waut hia passieed, un wie lieren hia daut ea de Mana deeden Jesus faustnämen, bewees hee toom latstet Mol noch siene Krauft, wiels en Varsch 6 sajcht daut, daut aus Jesus vetald, trocken de Mana aula trigj un follen opp de Ieed.  Soone Krauft haud Jesus, un hee leet sikj oba faustnämen von an.  Johanes sajcht ons uk daut Petrus dee wia, wäa daut Schwieet haud, en Varsch 10, un daut Jesus am deed beschwichten en Varsch 11.  Tolatst well wie uk no Lukas dreien, wiels doa see wie noch een Dinkj waut wort, jrod ea see Jesus deeden wajch leiden.
           
En Lukas 22:51 läs wie woo Jesus deed dee Maun heelen, wäms Ua wort aufjeschnäden.  Weet je dit bewiest bloos noch eemol de Leew waut Jesus haft fa aulemaun.  Dise Mana kjeemen toom Jesus faustnämen, un beschuljen un dootmoaken; un Jesus told an trigj met an heelen von äare Wunden.  Wie kjennen soone Leew nich bejriepen ooda vestonen.  Paulus sajcht en Reema 5:8 soo aus dit: “Oba Gott wees ons siene Leew doaren, daut Christus fa ons storf, aus wie noch Sinda wieren.“  Jesus storf fa dee Menschen waut am doot muaken; un onse Sinden sent de Uasoak wuarom Christus storf.  Hee storf nich bloos fa dee, oba fa ons uk!  Jiede Mensch opp de Welt haft Sindenschult, un oba derch Jesus sienen Doot aum Kjriez kjennen wie de Schult loos woaren.
           
​Daut latste Dinkj waut wie wellen no kjikjen vondoag es daut kjlienet aufschnett waut rät von woo de Jinja veleeten Jesus, un randen wajch; un uk von dee junga Maun waut bloos een Loaken om sikj haud, en Markus 14:50-52.  Daut sajcht ons nich wäa dis junga Maun es, oba väle Liera waut de Schreft studieren jleewen daut dis junga Maun es de Schriewa Markus selfst jewast; oba wie weeten daut nich veneiw.  Daut mucht sennen, daut doa wieren mea Jinja hia bie Jesus aus bloos de Twalw, un wiels daut soo lot denacht wia, haud dis junga Maun sikj bloos nich jescheit aunjetrocken, wiels hee wia aul eemol schlopen jegonen.  Oba daut weet wie uk nich neiw.  Oba een Dinkj waut mie oppfaulent es, es woo dis junga Maun een bewies es von aul de Jinja.  Noaktich sennen bediet ne Schaund, un aul de Jinja schämden sikj un randen von Jesus wajch; kjeena von dee bleef gaunz bie Jesus en sien Lieden.  Aus daut ieescht drupp aun kjeem, veleeten see am un leeten am auleen en sien Lieden.  See randen aula wajch to äare Schaund.  Oba dankt Gott, daut dise Schaund nich jenuach es toom Jesus siene Leew wajch nämen.  Aus Jesus ieescht opp stunt vom Doot, roopt hee wada aul siene Jinja toop, weinja Judas Iskariot, un jeef an de Oppgow toom siene Goode Norecht bekaunt moaken äwa de gaunze Welt.