De Markus Breef, Numma 37

Toom Läsen:  Markus 7:31-37
       "Un aus hee wada ut de Jäajent von Tierus un derch Sidon jinkj, kjeem hee nom galiläischen Mäa, medden en de Jäajent von Tieen Städa.  Dan brochten see eenem no Jesus, dee doof wia un schwoa räden kunn, un prachaden am, siene Haunt opp am to lajen.  Un hee neem am gaunz auleen fa sikj, läd am siene Finjasch en de Uaren un spieech un tukst am aun de Tung.  Dan kjikjt hee nopp no däm Himmel, un deep bewäacht, säd hee:  Hefata! daut meent:  Moak die op!
        Am wieren de Uaren plazlich op, un waut am de Tung bunk wia wajch, un hee räd dietlich.  Dan veboot Jesus an, daut irjentwäm to sajen.  Oba je mea an daut veboden wort, je mea räden see doavon.  Un see wundaden sikj äwa aule Moten un säden:  Hee haft aules goot jemoakt; hee moakt soogoa de doowe hieren un de Stomme räden."
 
 
         Mie es daut emma intressaunt wan ekj läs von woo Jesus deed Menschen heelen.  Eemol deit hee dit, näajkstet mol deit hee daut; noch mol brukt hee siene Henj un noch mol sajcht hee blooss.  Oba eendoont woo hee daut deit, daut kjemt emma soo ut, aus hee sajcht.  Dit es een wajch woo wie kjenn neiw weeten, daut Jesus es wäa hee sajcht daut hee es, wiels waut emma hee sajcht, woat.  Wan hee sajcht daut beese Jeista sellen ut Menschen rut komen, dan komen dee rut, un wan hee sajcht daut de kranke sellen jeheelt woaren, woaren dee jeheelt.  Dit see wie äwa un äwa enne Schreft.
            En onse Schreftstäd vondoag see wie woo Menschen doonen eenen Maun halpen, dee sikj selfst nich halpen kaun.  Dis Maun kaun nich hieren ooda räden, un see brinjen am no Jesus, un prachren daut hee disen Maun heelen saul.  Jesus nemt am biesied wua han un schieet am aun, un wada, met een Wuat, woat dän Doofstommen Maun jeheelt.  Plazlich wia aules op un schauft soo aus daut sull.
           Dit es een Väarajcht waut wie aula haben.  Wie haben noch mol aula de Jeläajenheit aundre Menschen no Jesus to brinjen, derch Jebäd, ooda derch met an räden.  Wie haben aula de Jeläajenheit toom de Menschen romm ons to vetalen waut Jesus haft fa ons jedonen, un waut hee fa an uk kaun doonen.  Doa sent foaken Menschen waut iernstlich sieekjen, un weeten oba blooss nich wua han.  Dan es daut bat ons toom an von Jesus vetalen, un fa an to bäden, daut see uk woaren Jesus kjanen lieren.  Dise Menschen vondoag fruagen Jesus fa Help fa dän Doofstommen Maun, wiels hee kunn selfst nich fa Help froagen.  Jesus deed am heelen, jo, oba de aundre Menschen musten am ieescht no Jesus brinjen, daut et kunn woaren.
           En dän Wajch es dise Jeschicht vondoag een Väabilt von daut Evangelium vekjindjen.  De Krankheit waut Jesus well daut dolste heelen es de Sind, un wan wie aundre vetalen von Jesus, daut es soo aus wan wie an no Jesus brinjen.  Dan mott wie an en Jebäd hoolen, un Gott froagen, daut hee an woat heelen von äare Krankheit, daut see uk kjennen Jemeenschoft haben met Gott.  Jieda Mensch mott oppoat dän Entscheidunk moaken; daut kaun kjeena doonen fa een aundren.  Oba wan wie bäden, dan es doa Jeläajenheit daut Gott an woat wieekj moaken, daut see daut woaren en seenen, daut an de Heelunk fält.  Wie motten ons Poat doawäajen doonen.
        Dit haft oba uk nich blooss met jeistliche Sachen to doonen.  De Bibel sajcht en Spricha 31:8-9, "Räd fa dee, dee nich fa sikj selfst räden kjennen; räd fa aul dee, dee eensom un veloten sent; halp dee, daut see rajcht jerecht woaren.  Moak dien Mul op un sto doaväa en daut de oame un Halploose rajcht jerecht woaren."  Jo, wie sellen Menschen von Jesus vetalen, wiels blooss Jesus kaun äare Sinden wajchnämen.  Oba, wie motten uk seenen daut see fiesisch daut han waut an fält toom läwen bliewen.  Wie sellen fa an räden, wan see selfst nich räden kjennen, krakjt soo aus dise Menschen fa disen Doofstommen deeden.  Hee wia halplooss, un see halpten am.  Jesus deed am heelen, jo, oba ieescht musten de aundre Menschen fa am räden un am doa han brinjen.
           Soone Menschen sullen wie uk sennen.  Wan wie seenen daut ons Noba haft Trubbel, dan halpt daut nich wan wie blooss räden un wenschen am een gooden Dach; woo halpt am daut ut sien Trubbel?  Veleicht sull wie ieescht gonen am von sien Trubbel rut halpen, un dan am vetalen von waut Jesus jedonen haft.  Dan kaun hee horchen onen sorjen wäajen siene Trubbels!  Onse Woakjen un ons Gloowen sull toopstonen, toom een foadjet Bilt jäwen.  Wan Menschen Help fält, well wie an dan halpen!  Wiels derch an halpen es doa veleicht eene Jeläajenheit an von Jesus to vetalen.  Daut es dan de baste Help waut see jeemols woaren kjrieen.