Moakt de Tung Tom

Toom Läsen:  Spricha 16:24
            "Frintelje Wieed sent honnichseet, dee treesten de Seel un freschen dän Kjarpa opp."

Spricha 16:27-28
            "Een Hollunk plont beeset, un siene Räden sent aus een brennendet Fia.  Een vekjieeda Mensch recht Striet aun, un een Pludasak ritt goode Frind uteneen."

Jakobus 3:1-12
            "Drenjt junt nich doano, Liera to woaren, miene Breeda.  Denkjt doaraun, wie Liera woaren strenja von Gott beuadeelt woaren.  Wie loten ons aula veschiednet to schulden komen.  Wäa en aul sien räden nuscht faulschet sajcht, es een volkomna Maun un kaun sienen gaunzen Kjarpa beharschen.  Wan wie de Pieed oppteemen, daut ons dee horchen motten, dan hab wie dee doaderch gaunz en onse Jewault.  Kjikjt emol no de groote Schäp, dee vom stoakjen Wint jedräwen woaren.  Dee woaren vom Kapitän met een kjlienet Rooda doahan jestieet, wuahan hee well.  Soo es uk de Tung een kjlienet Jlett un kaun groote Dinja aunrechten.  Waut fa een groota Woolt kaun doch met een kjlienet Fia aunjestekjt woaren!  Un de Tung es een Fia.  De Tung es eene ojjerajchte Welt mank onse Jläda, dee dän gaunzen Kjarpa veorreinicht.  Dee sat onse gaunze Natua en Flaumen met Fia direkjt ut de Hal.  Menschen haben aulahaunt Tieren, Väajel, Kruptieren un Wotatieren kunt tom moaken, oba de Tung, daut orruje Dinkj voll dootbrinjendet Jeft, kaun kjeena unja Kontroll brinjen.  Met de Tung low wie Gott dän Voda, un met de Tung flieekj wie de Menschen, dee no Gott sien Bilt jeschaufen sent.  Ut eenem Mul kjemt lowen un flieekjen.  Miene Breeda, daut saul soo nich sennen.  Jeft eene Kjwal ut een Loch seetet un betret Wota tojlikj?  Kaun een Fiejenboom Oliewen ooda eene Wienrank Fiejen droagen?  Jrod soo ommäajlich kaun eene soltje Kjwal tojlikj seetet Wota jäwen."
 
 
            De Tung es mol een kjlienet Poat von dän natualichen Kjarpa, oba dee haft groote Macht.  Dee kaun Menschen uteneen deelen un Stried aunreeden, un dee kaun uk Menschen toop brinjen un Fräd moaken tweschen an.  Lang trigj kunn Wieed foaken Kjrich aunfangen tweschen Lenda; wan een Kjennich een aundra Kjennich utflieekjt met siene Wieed, dan hauden see Kjrich.  Denkjt emol woo väl Menschen sennen to Dood jekomen wiels twee Mana sikj nich lieeden kunn!
            Daut Buak Spricha stalt de Tung von een jerajchta Maun jäajen de Tung von een schlajchta Maun; eene es seet un dee aundre es Fia.  Eene stat Menschen un de aundre heelt Menschen.  Woone Tung hab wie?  Doo wie aundre heelen met onse Wieed, ooda doo wie dee steeten met waut wie sajen?  "Ut eenem Mul kjemt lowen un flieekjen.  Miene Breeda, daut saul soo nich sennen," (Jakobus 3:10).  Woo schuldich sent wie von dit?
            Daut späat sikj foaken soo fa mie, un ekj jleew uk fa väle aundre, daut de Tung rät gaunz ut sikj selfst.  Foaken hab ekj nich jedocht aun waut ekj saj ea ekj räden doo;  de Wieed komen blooss selfst rut.  Eene tome Tung haben es sea Schwoa, oba daut es wichtich toom Missions doonen un Gott sien Rikj buen.  Jesus jeef ons daut Evangelium un säd to ons, "Dan got nu no de Velkja von de Welt un moakt an to Lieelinja un deept an en dän Nomen von däm Voda, von däm Sän un von däm Heiljen Jeist.  Lieet an aules to doonen, waut ekj junt befolen hab," (Matäus 28:19-20).  Woo kjennen wie de Velkja lieren onen rajcht räden?  Doaderch kjennen wie seenen daut de Tung tom moaken es wichtich fa jieda Kjrist uk toom daut Evangelium wieda brinjen.
            Daut es uk wichtich woo wie aus Kjristen läwen doonen.  Wan wie sajen daut wie haben Gloowen, un oba niemols daut bewiesen met waut wie doonen, dan sent wie Läajna un wie haben ons selfst hinja daut licht jefieet.  Wan wie Gloowen haben, dan mott ons läwen uk doano loten; waut wie doonen mott too stemmen met waut wie sajen.  "Oba eenje woaren sajen:  Du hast Gloowen, un ekj hab Woakjen.  Wies mie dienen Gloowen onen Woakjen, un ekj woa die mienen Gloowen wiesen derch miene Woakjen," (Jakobus 2:18).  Hia see wie daut Woakjen un Gloowen paussen krakjt toop.  Eena onen dee aundra halpt nuscht.  Woakjen onen Gloowen halpt kjeena waut en Gott siene Uagen, wiels wie sent jerajcht derch ons Gloowen (Reema 5:1).  Un Gloowen onen Woakjen es eene Lieej, wiels woaret Gloowen woat emma jewäsen derch Woakjen.  "Soo es daut uk met een Gloowen.  Wan dee nich Woakjen haft, es dee doot," (Jakobus 2:17).
            Oba woo kaun eena de Tung tom kjrieen?  Von de Schreft kjennen wie seenen daut et es nich mäajlich blooss met menschlicha Krauft.  "Menschen haben aulahaunt Tieren, Väajel, Kruptieren un Wotatieren kunt tom moaken, oba de Tung... kaun kjeena unja Kontroll brinjen," (Jakobus 3:7-8).  Meent dit daut wie motten proowen toom soont doonen waut nich jeit?  Ooda woo schauft dit?  Wie sellen eene tome Tung haben, oba kjeen Mensch kaun dee tom moaken!  Dee auntwuat to dit Probleem es uk en de Schreft.  Daut es soo daut kjeen Mensch kaun de Tung tom moaken, oba aus Kjristen kjennen wie ons veloten opp de Heilje Jeist.  Blooss derch Gott siene Krauft kaun de Tung tom woaren.  Dit see wie en daut Buak von Jesaja, wua dee Profeet schrift, "Woo saul daut noch met mie!  Dit kunn mien Enj sennen.  Soo aus ekj räd, es nich rajcht, un ekj sie eena von een Volkj, dee nich daut rajchte sajen," (Jesaja 6:5).  Oba Gott lat am nich en sien Orreinet bliewen:  "Dan fluach eena von de Serafen no mie, un dee haud eene Tang enne Haunt, un en de Tang haud hee een jlieejendet Stekj Gloot, daut hee vom Aultoa jenomen haud.  Un dee Schieed met daut aun miene Leppen naun un säd:  Nu daut dit diene Leppen aunjeschieet haft, veschwinjt diene Schult von die, un diene Sinden sent vejäft," (Jesaja 6:6-7).  Dit es een Väabilt von dee Vejäwunk dee wie haben en Christus;  blooss derch siene Krauft woat Sind wajch jenomen.  Aus Paulus de Frucht von de Heilje Jeist beschriewen deit en Galata 5:22, hee sajcht daut een Tieekjen von de Jeist haben es Selfstbeharschunk.  Derch Gott siene Krauft hab wie de Selfstbeharschunk toom de Tung tom moaken un unja Kontroll brinjen.
            Wie motten ons gaunz veloten opp Gott siene Krauft, wiels daut Kjristliche Läwen es ommäajlich oppoat von Jesus Christus.  Well wie dan uk noch soo väl dolla ons opp am veloten, un aules wajchschmieten waut ons behindat un mucht ons wajchdreien.  Well wie nich mol proowen daut met onse ieejna Krauft to doonen, oba leewa toostonen daut wie sent schwak, soo daut wie met Paulus toop kjennen sajen, "Wiels wan ekj schwak sie, dan sie ekj stoakj," (2 Korinta 12:10), wiels Gott siene Krauft es en schwake Menschen stoakj (2 Korinta 12:9).