Johanes, Kapitel 18 – Numma 5

Toom Läsen:  Johanes 18:33-40
“Dan jinkj Pilatus wada em Rechthus nenn un leet Jesus komen un fruach am: Best du de Judenkjennich?
Jesus säd to am: Frajchst du dit ut die selfst, ooda haben aundre die von mie vetalt?
Pilatus säd: Sie ekj een Jud? Dien ieejnet Volkj un de Huagepriesta haben die hia no mie jebrocht. Waut hast du jedonen?
Jesus säd: Mien Kjennichrikj es nich von dise Welt. Wan mien Kjennichrikj von dise Welt wia, wudden miene Deena jekjamft haben, daut ekj von de Juden nich faust jenomen wort. Oba mien Kjennichrikj es nich von dise Welt.
Dan säd Pilatus to am: Du best dan oba een Kjennich?
Jesus säd: Du sajchst rajcht, ekj sie een Kjennich. Ekj sie doatoo jebuaren un en de Welt jekomen, daut ekj fa de Woarheit enstonen saul. Wäa daut met de Woarheit helt, horcht no mie.
Pilatus säd to am: Waut es Woarheit?
Un aus hee dit jesajcht haud, jinkj hee wada rut no de Juden un säd to an: Ekj finj kjeene Schult aun am. Oba jie haben je de Mood, daut ekj junt toom Passafast wäm loosjäwen doo. Saul ekj junt dän Judenkjennich loosjäwen?
Dan schrieejen see aula wada: Nich disen Maun, oba Barabas!
Barabas oba wia een Reiba.“
 
 
Vondoag läs wie woo Jesus, onen daut hee irjent Schult haud, wort toom Doot vesproaken; un woo dee waut haud sult stoawen, wort loosjeleest. Hia haben wie een gaunz kloaret Bilt, von de Oabeit waut Jesus Christus deed aum Kjriez, fa een jiedrem waut aun am jleeft. Wie seenen uk de Unjascheet, tweschen dise twee Kjennichrikjs, de Rikj von de Reema, un de Rikj von Jesus Christus.

Pilatus haft bat hiatoo noch nich kunt irjentwaut ut finjen, fa wuarom de Juden Jesus no am brochten, buta daut see daut ut Aufgonst hauden jedonen. Markus 15:9-10 sajcht, “Dan fruach Pilatus an, auf hee an sull dän Judenkjennich loosjäwen, wiels hee wist daut de Huagepriestasch am Jesus ut Aufgonst en de Henj jejäft hauden.“ Wiels Pilatus haft noch kjeene Auntwuat jekjräajen von de Juden, brinjt hee Jesus em Rechthus nenn, un frajcht am perseenlich äwa wäa hee es, un waut hee haft jedonen.

Ieeschte frajcht Pilatus Jesus auf hee de Judenkjennich es; un weet je, daut es intressaunt daut Pilatus dit daut ieeschte frajcht. De Reema wieren dee, waut äwa Israel de Macht hauden, to Jesus siene Tiet; un väle von de Juden wia daut gaunz jäajen aun. See wullen loos von de Reema sennen, un vesochten von de Reema frie to sennen. Fa soon Mensch aus Pilatus, dee een Reema wia, un von de Kjeisa hanjestalt wort, toom Israel rejieren, wudd daut sea trubblich sennen, wan een Jud sikj wudd aus Kjennich talen un väle Nofolja toop saumeln. Oba wan ekj dise Froagen läs, waut Pilatus Jesus hia frajcht, kjemt mie daut nich soo väa, daut Pilatus sikj wäajen Jesus oppräajcht.

Jesus frajcht am leewa, auf hee dit ut sikj selfst frajcht, ooda wäajen waut hee von aundre jehieet haft. Pilatus deit sikj hia aus wan dit nuscht met am to doonen haft; hee es je nich een Jud, un de Juden selfst haben Jesus no am jebrocht; waut haft Jesus jedonen, daut see am soo aus dit no am brinjen? Jesus oba sajcht bloos, daut sien Kjennichrikj es nich von dise Welt. Met dit steit hee daut too, daut hee een Kjennich es. Oba Jesus sien Rikj schauft nich soo aus aundre Kjennichrikjs doonen. Pilatus frajcht am dan noch eemol, auf dit meent, daut Jesus een Kjennich es; un Jesus steit daut aulwada too. Hee sajcht Pilatus, de Uasoak fa wuarom hee jekomen es; toom fa de Woarheit enstonen. Aul dee, waut met de Woarheit hoolen, horchen no am. Oba Pilatus siene Froag no dit, es sea intressaunt: Waut es Woarheit?

Pilatus es nich besorcht, daut Jesus sikj aus een Kjennich talt. Hee weet, daut de Juden haben Jesus rein bloos ut Aufgonst no am jebrocht; hee jeit dan rut, noch eemol de Juden weeten to loten, daut hee kaun kjeene Schult finjen aun Jesus. Pilatus es Weis jenuach toom seenen, daut Jesus es nich jefäadlich. Jesus es onen Schult! Pilatus selfst steit daut too. Oba de Juden froagen leewa fa Barabbas, aus fa Jesus. Barabbas haud Schult, un haud sult stoawen fa waut hee haud jedonen. Oba Barabbas woat loos jeloten, un Jesus woat bestroft un jekjriezicht; de Oschuldja fa de Schuldja. Jesus Christus storf em Plauz von de Sinda Barabbas. Oba dit es uk een Bilt von Jesus siene Leew, un siene Oabeit. Jesus es de Woarheit; hee es de Auntwuat, to Pilatus siene Froag! Oba de Woarheit es, daut jieda Mensch es soo aus Barabbas. Jieda Mensch haft jesindicht; jieda Mensch es schuldich bie Gott. Oba Jesus nemt de Plauz waut to ons jehieet, un tolt de Schult waut wie musten tolen. Hee jeef sikj selfst han, toom fa die un mie stoawen. De Kjennich, von Himmel un Ieed, wort jekjriezicht; un siene ieejne Menschen säden am auf. Oba hee leet dit aula passieren, soo daut wie kunn jerat woaren. Nu derch Gloowen sent wie frie, wiels Jesus haft onse Schult betolt.

​Ekj finj daut uk intressaunt, daut Pilatus nant am von hia wieda de Judenkjennich; Pilatus, een Reema, kunn daut seenen, waut de Juden selfst nich kunnen seenen. Jesus es werkjlich de Kjennich, un sien ieejnet Volkj kunn daut nich seenen. Äa Aufgonst un Hot, haud äare Uagen toojeschmäat, toom de Woarheit nich mea seenen. Oba Pilatus, dee nich emol jleewd, kunn de Woarheit seenen. Oba daut es wichtich, daut wie nich bloos de Woarheit to seenen kjrieen, oba uk aun am jleewen. Wie kjennen nich bloos en woaren daut Jesus es de woara Kjennich von Himmel un Ieed; wie motten uk aun am jleewen fa de Radunk von Sind.