De Markus Breef, Numma 1

Toom Läsen:  Markus 1:1-8
            "Daut Evangelium von Jesus Christus, Gott sien Sän, funk soo aun:
            Em Profeeten Jesaja steit soo jeschräwen:  Ekj schekj eenen Met eene Norecht, dee fa mie woat dän Wajch reed moaken.
            Eene Stemm, dee en de Wiltnis lud roopen woat:  Moakt däm Harn eenen Wajch reed!  Moakt am eenen jlikjen Stich!
Doaropp kjeem Johanes de Deepa en de Wiltnis un prädijd, daut see omkjieren sullen un sikj deepen loten, daut an de Sinden vejäft worden.  Un daut Volkj von gaunz Judäa un aulemaun von Jerusalem jinkj han un leet sikj von am em Jordan deepen un bekjanden äare Sinden.  Johanes druach een Kjleet von Kameelenhoa, un eenen ladanen Gort om de Hoften, un hee eet Graushoppa un willen Honnich.
            Hee prädijd un säd:  No mie kjemt eena, dee stoakja es aus ekj, un ekj sie daut nich emol wieet, daut ekj mie ver am bekj, de Schoobenja optoleesen.  Ekj deept junt met Wota; dee oba woat junt met däm Heiljen Jeist deepen."
 
 
            Dise Varzh räden von "Daut Evangelium von Jesus Christus, Gott sien Sän," (1:1).  Hia steit jeschräwen de basta Norecht waut een Mensch kaun hieren:  daut Gott schekjt sien eensjen Sän toom Erleesunk volbrinjen fa aul dee waut am aunroopen.  Oba ea wie kjennen no Jesus kjikjen, mott wie vestonen daut dit wia vom Aunfank Welt aul jeplont, un daut stunt aul verhäa jeschräwen en de Schreft daut Jesus wudd komen.
            Ons woat hia vetalt von een Mensch dee heet Johanes de Deepa.  Dit wia een Profeet Gottes, un hee prädijd to de Menschen daut see sullen sikj omkjieren un deepen loten, soo daut see kunn von äare Sinden looss sennen.  Hee deed dit toom erfellen waut aul jeschräwen wia, en de Profeeten.  Hia rät daut nich von werkjlich een Wajch moaken, ooda een Stich uthaken von de Wiltnis daut doa jeit delenjd to gonen; dit rät von onse Hoaten trigj dreien no Gott.  Wan wie nich Gott tru sent dan sent onse Hoaten soo aus de Wiltnis, gaunz unjajewossen won Sind un Schaund, un wie weeten noch mol nich wua han.  Dan mott wie onse Sinden bekjanen un dee uk looss loten, daut daut Hoat jeit rein to moaken soo aus een glauta Wajch, ooda een jlikja Stich, wua ieescht eene groote Woolt stunt.  Johanes de Deepa muak de Menschen reed toom eene jeistliche Norecht aunnämen, daut wie kjennen won Sind Frie sennen.
            Siene Prädicht wia intressaunt, wiels daut sajcht daut gaunz Judäa un Jerusalem jinkj doahan un leet sikj von am em Jordan Riefa deepen en Varzh 5.  Oba daut wia nich blooss siene Prädicht waut intressaunt wia, wiels daut sajcht siene Kjleedie wia uk een bät Framd.  Hee trock sikj om met Kameelenhoa un een ladanen Gort om de Hoften.  Hee wond en de Wiltnis, soo wiet aus wie weeten, un eet Grausshoppa un willen Honnich!  Ekj sie mie secha daut väle Menschen kjeemen am horchen blooss ut Nieschia.
            Waut wia dan Johanes siene Bootschoft?  En dise Varzh waut wie lausen finj wie een Poat von siene Prädicht.  Hee prädijd daut Menschen sullen sikj omkjieren, un von Sind wajch dreien un sikj deepen loten fa Vejäwunk (1:4).  Hee vetald de Menschen von Eena dee wudd no am komen, dee stoakja wia aus hee.  Ver disen Mensch wia hee nich mol wieet siene Schoobenja optoleesen (1:7).  En Matäus 3 sajcht daut, "En dee Tiet kjeem Johanes de Deepa un säd:  'Kjieet om, daut Himmelrikj es dicht bie!' " (3:1-2).  Hee prädijd uk daut dee wäa no am kjeem wudd de Menschen scheeden soo aus Weit un Sprie (Matäus 3:12).  Oba daut wichtichste Punkt von siene Prädicht es daut dee wäa no am kjemt wudd de Heilje Jeist brinjen, un nich blooss met Wota deepen, oba met dän Jeist deepen (Markus 1:8).
            Waut meent dit aula soorajcht?  Johanes rät hia von jeistliche Sachen.  Gott haud een Plon em Senn toom Menschen Frie moaken von de Sind, un Jesus kjeem toom daut volbrinjen.  Johanes de Deepa siene Oabeit wia toom no Jesus wiesen, wiels Jesus wudd de Heilja Jeist brinjen un Menschen ennalich Frie moaken.  Gott kjikjt nich soo sea no woo een Mensch sitt aus no dän Mensch sienen Hoat.  Gott well han daut wie am vom Hoaten aunnämen.  Dee Markus Breef en de Bibel es de Jeschicht von Jesus Christus, Gott sien Sän, un dise Varzh wua wie vondoag no kjikjten moaken ons reed, aus toohorcha, toom Jesus aunnämen.  Jesus Christus es dee wäa stoakja wia aus Johanes de Deepa, un hee es vondoag uk noch stoakj.  Näakjstet mol well wie von hia wieda gonen em Markus Breef, soo daut wie een Bilt kjrieen von Jesus aus hee opp Ieed läwd.