De Markus Breef, Numma 12

​Toom Läsen:  Markus 3:1-6
            "Een aundret mol, aus Jesus en de Judenschool nenn jinkj, wia doa een Maun met eene vedrieejde Haunt.  Wiels eenje no eene Uasoak sochten Jesus to beschuljen, pausten see opp auf hee dän aum Sabat heelen wudd.  Jesus säd to dän Maun met de vedrieejde Haunt:  Sto opp un komm häa!
            Dan fruach hee an:  Waut derw wie däm Jesaz no aum Sabat doonen, goodet ooda schlajchtet?  Daut läwen raden, ooda ombrinjen?
            Oba kjeena säd waut.  Jesus kjikj an aun, un oajad sikj doaräwa, daut see soo hoat un stieekoppich wieren.  Hee säd to dän Maun:  Strakj diene Haunt ut!
            Hee strakjt dee ut; un dee wia soo jesunt aus de aundre.  Dan jinjen de Farisäa rut un beroden sikj met Herodes siene Aunhenja, woo see Jesus äwatsied brinjen kunnen."
 
 
            Latst kjikjt wie no woo Jesus erkjläad to de Menschen daut dän Sabat hoolen wia nich mea wieet aus Menschen halpen, un woo hee Har es äwa dän Sabat.  Vondoag läs wie noch eemol von dän Sabat, un waut Jesus to sajen haft doaräwa.
            Wie seenen hia vondoag noch eemol woo Jesus Jaumahoat haud fa doljedrekjte Menschen.  Hee wull soona halpen waut nich kunnen sikj selfst halpen.  En de Judenschool wua hee nenn jinkj wia een Maun met eene vedrieejde Haunt; am fäld Help wan hee wull soo läwen aus aundre deeden un kjennen sien läwen vedeenen.  Oba de Menschen doa jeewen nuscht romm om dän Maun, ooda waut am fäld.  See wieren soo hoat daut leewa aus een Mensch proowen to halpen, wudden see Jesus proowen äwatsied to brinjen.  Jesus deed blooss goode Dinja, un daut wia wesse Menschen nich goot.  Nich aulemaun proowd am äwatsied to brinjen, oba de leida kunnen am nich lieden.  See kunnen daut nich vedroagen daut de jeweenelje Menschen Jesus soo sea jleichten.
            Daut sajcht doa wieren eenje waut no eene Uasoak sochten Jesus to beschuljen.  Jesus wist dit goot, un daut de Menschen äare Hoats wieren hoat, wiels hee stald an eene Froag väa:  "Wat derw wie däm Jesaz no aum Sabat doonen, goodet ooda schlajchtet?  Daut Läwen raden ooda ombrinjen?" (Markus 3:4).  Well wie doaraun denkjen daut Jesus haud an aul verhäa jesajcht, opp eene aundre Tiet, daut hee de Har wia äwa dän Sabat.  Kjeena auntwuad am, wiels see wisten daut hee wia rajcht, oba see wullen daut nich toostonen.  Jesus oajad sikj, un aus een bewies daut hee werkjlich de Har wia äwa dän Sabat heeld hee de Maun met eene vedrieejde Haunt.
            De Farisäa jinjen dan rut, un deeden krakjt daut waut Jesus nich deed.  Jesus deed goodet aum Sabat, un de Farisäa deeden schlajchtet.  Jesus kjeem aundre to raden, un de Farisäa sochten een wajch toom am ombrinjen.  See wieren krakjt daut Jäajendeel von waut Jesus es, un wie motten uk opp paussen, daut wie nich uk soo aus daut sennen.  Wan wie nich am haben aunjenomen aus Har, dan sto wie jäajen am en onse Hoaten.  Dan sent wie uk krakjt soo hoat un stieekoppich aus see wieren to dee Tiet.  Well wie nich soo sennen.  Well wie daut leewa aunnämen, daut Jesus es Har, soo daut wie nich brucken onse Sinden schult met droagen wua emma wie gonen.  Wie sent aula soo aus de Maun met eene vedrieejde Haunt.  Ons fält daut aula daut Jesus ons deit heelen un jesunt moaken.  Veleicht sent wie em Kjarpa gaunz jesunt, oba em Hoat hab wie aula Krankheit.  Wie sent aula een bät vekjräpelt ennalich.  Jesus es de eensja Wajch woo wie kjennen de Krankheit looss woaren.  Wan hee ons deit heelen, dan sent wie nich mea soo hoat.  Dan woaren onse Hoaten bandich, un dan kjennen wie met feelen met soone waut Help fält, wiels wie haben de Help aul jekjräajen.  Well wie nich stieekoppich sennen jäajen Gott sien Wuat, ooda jäajen de Heilje Jeist; well wie leewa blooss met Freiden dee Heelunk un Radunk aunnämen waut Gott ons jeft, derch Jesus Christus.