De Markus Breef, Numma 13

​Toom Läsen:  Markus 3:7-12
            “Jesus jinkj met siene Jinja oppoat nom Mäa, un von Galiläa kjeemen am een grootet Schoof hinjaraun.  Aus see hieeden, waut hee aules deed, kjeemen väl Menschen no am von Judäa, Jerusalem, Idumäa, von hinja däm Jordan un von Tierus un Sidon.  Wiels doa soon Schoof kjeemen, säd hee to siene Jinja, see sullen eene kjliene Lomm fa am reed haben, daut see am nich bedrenjen kunnen.
            Hee haud väle jeheelt, un de kranke drenjden sikj doaropp no am, daut see am aunschieren wullen.  Un emma, wan de beese Jeista am sagen, follen dee ver am dol un schrieejen:  Du best Gott sien Sän!
                 Hee oba veboot an strenj to sajen wäa hee wia.”
 
 
            Wan wie enne Schreft kjikjen, besondasch en Matäus, Markus, Lukas, un Johanes, see wie daut doa wieren dree Wäaj woo Menschen Jesus aunkjikjten.  Wesse Menschen neem daut fuaz aun daut Jesus wia een besondre Mensch, un see wieren fuaz reed toom am aunnämen aus Gott sien Sän.  Wesse Menschen horchten jieren no waut hee säd, oba wieren blooss nieschierich wiels see hopten blooss toom een Wunda seenen.  Dan wieren doa soone waut am vom Aunfank jäajen aun wieren, soo aus de mieeschte von de Farisäa, un de Saduzäa, un mieeschte von de Schreftjelieede.
            Wie kjennen kloa seenen vondoag daut Menschen wieren sea nieschierich wäajen Jesus, un see kjeemen von wiet un breet toom no am horchen.  Daut wort soo oajch daut Jesus must en eene Lomm stonen wajch von de Kaunt Wota blooss soo daut Menschen nich kunnen am bedrenjen!  Daut wieren besondasch dee waut krank wieren un waut beese Jeista hauden waut daut dolste deeden.  See hopten sea daut Jesus wudd an heelen un frie moaken.  Wie kjennen daut selfst vestentlich nämen daut Jesus leet an nich toch; hee wudd niemols een Mensch tochloten wan dee no am kjeem fa Help.
            Aum Aunfank, en Varsch 7, wia Jesus blooss met siene Jinja toop; de Menschen wieren noch nich bat doa.  Daut sajcht hee jinkj oppoat nom Mäa, un väle von Galiläa kjeemen hinjaraun.  De Menschen wieren soo nieschierich daut Jesus kunn meist niemols Tiet auleen finjen.  Doa wieren emma Menschen romm am.  Eendoont wua hee han jinkj, kjeemen Menschen emma hinjaraun.  Oba Jesus dreid an niemols wajch.  Hee velangd de Menschen niemols to veloten, oba heeld an von äare Krankheiten, un halpt an met aul äare Trubbels.  Kjenn wie sajen daut wie halpen Menschen emma wan see ons no Help froagen?  Ekj denkj foaken aun dit.  Jesus deed aules waut needich wia, toom de Menschen halpen.
            Daut sajcht uk daut de beese Jeista schrieejen ut daut Jesus es Gott sien Sän, uk daut Jesus veboot an strenj toom sajen wäa hee wia.  Wie haben uk aul ea von dit jerät, oba wuarom deed Jesus dit?  Sullen de Menschen nich weeten daut hee Gott sien Sän wia, un es?  Jesus kjeem toom Gott sien Wellen volbrinjen.  Hee kjeem toom Menschen de Woarheit wiesen, daut Gott haft Leew fa Aulemaun un well nich haben daut irjent eena saul veloaren gonen.  Gott schekjt Johanes de Deepa toom Jesus bekaunt moaken to de Menschen; Gott schekjt nich de beese Jeista.  Doa es nuscht bäta aus de Woarheit hieren von Jesus selfst, wiels hee es de Wajch, de Woarheit, un daut Läwen (Johanes 14:6).  De Menschen sullen to dee Tiet, krakjt soo aus vondoag, selfst äwa Jesus siene Wieed denkjen, un de Entscheidunk selfst moaken, nich daut von beese Jeista aunnämen.  Daut eensje Dinkj waut de beese Jeista kunn de Menschen wiesen es daut Jesus haud Krauft äwa an un kunn an fuat driewen.
            Waut vonne Menschen sent wie?  Sent wie soone Menschen waut Jesus wellen aunnämen?  Ooda sent wie blooss nieschierich?  Blooss een intressaunt haben fa Jesus es nich jenuach; wie motten am gaunz aunnämen aus Har.  Ooda sent wie am gaunz jäajen aun?  Leewa Frint, unjasieekj dien Hoat, un lot daut nich toch.  Jesus luat toom die uk frie moaken.  Hee luat toom dien läwen uk raden von Sind.  Sieekjt de Schreft fa die selfst.  See waut Jesus deed, un waut hee vondoag uk noch deit aunbeeden fa Aulemaun.