De Markus Breef, Numma 14

​Toom Läsen:  Markus 3:13-19
              "Un Jesus jinkj en de Boaj un roopt sikj, dee woone hee bie sikj haben wull, un dee kjeemen no am.  Un von dee stald hee 12 aun siene Apostel to sennen, daut dee bie am sennen sullen, un daut hee dee utschekjen kunn, to prädjen, un daut dee Macht haben sullen, kranke to heelen un beese Jeista uttodriewen.  Un hee stald dee 12 aun:  Simon, dän hee Petrus nand, Jakobus, Zebedäus sienen Sän, un Johanes, sien Brooda, dee nand hee nohäa Boanerges, daut meend:  Jewittakjieedels, Andreas, Filippus, Bartolomäus, Matäus, Tomas, Alfäus sienen Sän Jakobus, Tadäus, Simon von Kana, un Judas Iskariot, dee am nohäa veroden deed."
 
            Wie haben aul foaken jerät von de Uasoak wuaromm Jesus no Ieed kjeem, un daut wia toom een Wajch moaken daut Menschen kunnen jerat sennen von äare Sind.  Oba daut wia nich de eensja Uasoak; hee kjeem uk toom Menschen wiesen, woo toom rajcht Jemeenschoft haben met Gott, un een heiljet Läwen fieren.  Noch een Uasoak wuaromm hee kjeem wia toom siene Kjoakj aunfangen.
            Aus hee romm jinkj un Menschen lieed, hauden see noch kjeene Jedee waut noch wudd woaren.  See wisten nuscht von Gott sien Plon toom Menschen raden, ooda daut Jesus must lieden un stoawen, soo daut wie kunnen frie sennen.  See wisten nich daut hee wudd wada oppstonen, un trigj nom Himmel foaren, wiels see wieren soo vetieft met irdische sachen.  Hee erkläad to an aules waut must noch passieren, oba see wieren blint doatoo.  See hauden kjeene Jedee daut met Jesus waundlen wudd an, un uk de gaunze Welt, endren fa emma.
            Jesus funk aun met siene Kjoakj buen aus hee siene Jinja roopt.  En veschiedne Wäaj troff hee Menschen un roopt an toom am no foljen, toom von am lieren.  Bat nu haud hee aul een Schoof nofolja waut am emma hinjaraun jinjen.  Aul de Menschen wäm hee haud aul ea jeroopt, roopt hee nu uk toop, un wäld von mank an 12 Mana wäa sullen emma dichtbie am sennen.  Hee nand dee siene Aposteln, un dise 12 deed hee besondasch oppoat noch lieren.  Hee wäld dee soo daut hee dee kunn rut schekjen to prädjen, un toom Macht haben, toom Menschen heelen un beese Jeista utdriewen.  Dit wia waut sea besondret.  Jesus haud aul opp väle Wäaj sien iejna Krauft jewäsen, oba nu jeef hee krakjt de Krauft no siene Jinja, daut see uk sullen doonen waut hee deed.
            De Numma 12 es uk wichtich, wiels doa sent 12 Staum von Israel.  Jesus deed met fliet 12 Jinja aunstalen aus Apostel wiels daut wia een bewies daut daut niee Israel es nu hia, dee heet de Kjoakj.  Daut wudd noch lang sennen ver Menschen dit vestunden, oba Jesus wist dit aul lang em verut.  Gott sien Plon von don aus hee Abram roopt wia daut siene Nokomenschoft sullen een Säajen sennen fa de gaunze Welt.  "De Har säd to Abram:  Velot dien Launt, diene Lied, un dien Voda sien Hus un go no een Launt daut ekj die wiesen woa.  Ekj woa von die een grootet Volkj moaken, un ekj woa die säajnen.  Ekj woa dien Nomen wiet bekaunt moaken, un du woascht een Säajen sennen.  Ekj woa dee säajnen dee die säajnen, un ekj woa eenen Fluch opp dee brinjen, dee eenen Fluch opp die brinjen, un derch die woaren aule Velkja oppe Ieed jesäajent," (1 Mose 12:1-3).  Lang lota, aus Jesus oppe Ieed wia, wort dit woa, un Jesus muak een Wajch daut wie, de Velkja, kunnen frie sennen von onse Sind.
            Dan woaren de 12 Apostel jeschräwen, wäa dee wieren, un gaunz tolatst es waut sea intresaunt.  Judas Iskariot, waut lota Jesus wudd veroden, wort een Apostel.  Jesus wist daut goot waut Judas wudd doonen, wiels hee wist waut hee must lieden toom daut doonen waut Gott velangd, un hee wäld Judas dan noch.  Jesus lieed am un weess am Leew, soogoa wan hee wist waut Judas wudd doonen.  Daut es een bewiess von woo hee ons uk leeft.  Wie haben aula jäajen am jesindicht, un hee leeft ons uk noch emma.  Dit es een wundaboaret Tieekjen von de Leew waut Gott haft; wie kjennen daut niemols vedeenen.  En siene Leew schekjt hee sien Sän, toom stoawen, soo daut wie kunnen frie sennen, un toom oppstonen, soo daut siene Kjoakj kunn jebut woaren, un daut funk hia en dise Schreftstäd aun.  Well wie am lowen fa waut hee jedonen haft, un ons freien daut wie kjennen poat sennen von siene Kjoakj.