De Markus Breef, Numma 16

Toom Läsen:  Markus 3:31-35
           "Un siene Mutta un siene Breeda kjeemen bat ver de Däa, un leeten am roopen.  Doa sauten väl Menschen om am un dee säden to am:  Kjikj emol, diene Mutta un diene Breeda sent buten un sieekjen no die.
​            Hee auntwuad an:  Wäa sent miene Mutta un miene Breeda?
            Hee kjikjt om sikj no dee, dee romm am sauten, un säd:  Kjikjt emol, dit sent miene Mutta un miene Breeda!  Wäaemma daut deit, waut Gott velangt, es mien Brooda, miene Sesta un miene Mutta."
 
 
            Väajemol laus wie daut wesse Menschen dochten daut Jesus wia nich gaunz kloa em Kopp.  De Uasoak wuarom see dit dochten es wiels Jesus räd von Dinja waut see nich kunnen vestonen, un leewa aus aun strenjen toom daut proowen toom vestonen, leeten see daut blooss toch.  Leewa aus am froagen waut hee meend un proowen toom lieren doavon säden see blooss daut hee wia nich gaunz doa.  Jesus sajcht daut aul dee, waut doonen waut Gott jefelt, sent siene Famielje, un nich dee to wäm hee jebuaren wia.  Woo sullen de Menschen dit vestonen?
            Wie motten doa aun denkjen daut Jesus räd niemols blooss von fiesische Sachen.  Aules waut hee lieed haud met jeistliche Sachen to doonen, oba de Menschen romm am wieren Fiesisch jesonnen, krakjt soo aus wie meist emma sennen.  Daut wieren werkjlich Jesus siene Mutta un siene Breeda waut no am kjeemen, oba Jesus wia nich blooss jekomen fa siene Famielje.  Hee kjeem fa aulemaun.  Derch Jesus kjennen wie Poat sennen von Gott siene Famielje; dit es de Famielje von waut Jesus rät hia.  Fa de Menschen waut doa romm wieren, muak dit oba nich Senn.
            Jesus säd dit uk nich toom siene Mutta un Breeda steeten; hee säd dit toom de Menschen lieren daut doa es nuscht waut wichtja es aus Gott toom jefaulen läwen.  Wie kjennen soo väl doonen opp Ieed aus wie wellen, un soo rikj woaren aus mäajlich es, oba wan daut nich fa Gott es, dan es daut vejäfs.  Wan wie oba doonen waut Gott velangt, daut waut wichtichste es, dan kjennen wie en Gott siene Famielje sennen.
            Un waut es daut waut Gott velangt?  De Schreft jeft ons de Auntwuat en 1 Johanes 3:23-24.  "Un sien Jeboot es dit, daut wie aun sienen Sän Jesus Christus jleewen, un ons unjarenaunda goot sent, soo aus hee ons daut en sienem Jeboot jesajcht haft.  Wan wie Gott siene Jebooten hoolen, bliew wie en am un hee en ons.  Un daut weet wie derch dän Jeist, dän hee ons jejäft haft."  Daut hieet sikj soo eefach.  Wie motten jleewen aun Jesus Christus, un ons unjarenaunda goot sennen, un dan hool wie Gott siene Jebooten.  Aundatwäajen sajcht Jesus sea daut selwje.  "Hee säd to am:  "Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken".  Dit es daut jratste un ieeschte Jeboot.  Un daut tweede Jeboot es met dit jlikj:  "Du saust dienen Noba jrod soo goot sennen aus die selfst".  Opp dise beid Jebooten henjt daut gaunze Jesaz un uk de Profeeten," (Matäus 22:37-40).
            Daut waut Gott velangt es werkjlich eefach.  Wie sellen Gott leewen met aules waut wie sent, un ons Noba soo goot sennen aus ons selfst.  Wie sellen jleewen aun Jesus Christus, Gott sien Sän, un leew haben unjarenaunda.  Daut es eefach, oba sea schwoa.  De eensja Wajch woo wie dit kjennen doonen es derch Gott siene Krauft.  Wie kjrieen dee Krauft wan wie von onse Sinden wajcht dreien un Jesus doonen em Gloowen aunnämen.  Dan woa wie jereinicht von onse Sind, un Gott jeft ons sienen Jeist.  Dan wirkjt de Jeist en ons, un moakt ons nie, soo daut wie kjennen Leew haben fa Gott un fa aulemaun romm ons.  Daut es blooss derch Gloowen en Jesus Christus daut dit mäajlich es.  Wan wie aun Jesus Christus jleewen, dan sent wie Poat von Gott siene Famielje.