De Markus Breef, Numma 19

​Toom Läsen:  Markus 4:21-25
            "Jesus säd:  Woat eene Laump nenn jebrocht om unja eene Komm ooda unja daut Bad to stalen?  Woat dee nich jebrocht om opp eenem Laumpenhoola to stonen?  Doa es nuscht vestoaken, daut nich openboa woat, un nuscht jeheem, daut nich verendach kjemt.  Wäa Uaren haft toom hieren, däm lot hieren!
            Un hee säd to an:  Siet väasechtich no waut jie horchen!  Doano aus jie aundre toomäten, saul junt toojemäten woaren, un junt saul bowenenn mea jejäft woaren.  Wäa doa haft, däm woat mea jejäft; un wäa nuscht haft, däm woat daut noch wajchjenomen, waut hee haft."
 
 
            Onen Licht kjennen wie nich läwen.  Daut moakt de Welt romm ons dach, un openboa daut läwen leichta es.  Wan wie eene Laump brucken, daut es toom daut diestret aufwäaren, daut wie enne Nacht seenen kjennen.  Daut wudd gaunz ondietlich sennen eene Laump aun moaken un dan vestoaken unja eene Komm ooda een Bad.  Licht halpt ons nuscht wan daut vestoaken es.  Daut es uk soo met de Woarheit.  Daut schauft uk soo aus een Licht.  Wan wie de Woarheit ieescht weeten, dan woat aules openboa jemoakt.
            Ekj jleew dit es von waut Jesus hia rät.  Hee sajcht, "Doa es nuscht vestoaken, daut nich openboa woat, un nuscht jeheem, daut nich verendach kjemt," (Markus 4:22).  Wan de Woarheit woat bekaunt jemoakt, dan met eemol gonen aul de Läajes kloa to seenen.  De Woarheit brinjt Kloarheit, un aules waut Faulsch es woat verendach jebrocht.
            Jesus must foaken siene Jlikjnisen erkjläaren to siene Jinja, wiels see hauden eene schwoare Tiet vestonen waut dee meenden.  Äare Uagen, soo aus aule Menschen äare, wieren too un em diestret, oba Gott haud an von daut diestret rut jewält, soo aus hee aul dee haft, dee am aunroopen.  Jesus muak äare Uagen op soo daut see kunnen vestonen von waut hee räd.  En Johanes 1 woat Jesus vejlikjt met daut Licht, wuarenn doa Läwen wia fa de Menschen.  "En am wia Läwen, un daut Läwen wia daut Licht fa de Menschen.  Daut Licht schient em diestren, oba daut diestre haft daut nich vestonen," (Johanes 1:4-5).  Aule Menschen waundlen em diestren bat an woat rut jeholpen.  Jesus wia daut Licht waut de Jinja äa Vestentnis opdakjt, oba daut dieed lang, un daut wort nich foadich bat de Heilje Jeist kjeem.
            Jesus sajcht hia noch eemol daut wäa Uaren haft toom hieren, däm lot hieren en Markus 4:23.  Jesus kjeem de Woarheit to prädjen, un daut Gottesrikj bekaunt to moaken.  Hee wist daut doa wieren Menschen waut daut wudden jieren aunnämen, un uk soone waut daut nich wudden.  Hee leet an de Entscheidunk moaken.  De Goode Norecht waut hee brocht mott met Gloowen aunjenomen woaren, un daut es wuarom soo väl neemen daut nich aun.  De Juden wullen een fiesischa Kjennich haben waut an wudd frie moaken von de Reema, un äa Launt oppbuen soo aus daut lang trigj mol wia.  Jesus oba brocht eene Bootschoft von Jnod, un von Vejäwunk.  Äare Sind kunn aufjelascht woaren!  Dit es waut hee too siene Jinja äwa un äwa must erkjläaren.
            Hee sajcht uk daut wie aus Menschen sellen opp paussen woo wie aundre behaundlen un no waut wie horchen.  Wie motten seenen daut wie de Woarheit aunnämen, un nich Läajes, wiels orrajchte Lia brinjt väl schoden em Läwen.  Well wie tru bliewen no waut de Bibel sajcht.  Dan woa wie aundre soo behaundlen aus wie sellen.  Soo aus wie aundre toomäten, saul ons toojemäten woaren.  Dit es een sea wichtjet Teema.  Wan wie nich Jnod haben fa ons Brooda ooda Sesta, woo woaren wie dan Jnod kjrieen?  Wan wie nich Leew haben fa aundre, woo jleew wie dan daut wie woaren Leew kjrieen von aundre?  Soo aus wie aundre Menschen behaundlen, woat ons de mieeschte Tiet behaundelt.  Oba dan sajcht Jesus uk daut ons saul bowenenn mea jejäft woaren.  Wan wie ieescht ver Gott stonen, un hee ons deit rechten, kjrie wie een Loon fa daut waut wie jedonen haben.  Galata 6:8 sajcht, "Wäa doa seit sien Fleesch to jefaulen, woat von däm Fleesch vedoawen arnten.  Wäa oba seit dän Jeist to jefaulen, woat vom Jeist daut eewje Läwen arnten."  Ekj jleew dit es von waut Jesus näakjste rät.  Hee sajcht, "Wäa doa haft, däm woat mea jejäft; un wäa nuscht haft, däm woat daut noch wajchjenomen, waut hee haft," (Markus 4:25).  Toolatst, wan wie ons Läwen haben to Gott jejäft, un haben Jesus aunjenomen, dan hab wie aul Läwen jekjräajen derch dän Jeist, oba ons woat dan noch eewjet Läwen jejäft woaren, un wie woaren een Loon kjrieen en Himmel.  Wäa oba haft fa sikj selfst jeläft, un haft Gott aufjesajcht, däm woat dän Doot jejäft, un aules waut hee haft woat wajchjenomen, wiels daut es sien Loon.
            Doa es dan eene groote Oppgow fa Kjristen dan, daut wie läwen toom Gott jefaulen, soo daut de Menschen romm ons wäa Gott nich kjanen eene Jeläajenheit haben am auntonämen.  Jesus, daut Licht von de Welt, haft ons uk to Lichta jemoakt, soo daut wie een bewies sennen von Gott siene Jnod.  Jesus sajcht to siene Jinja, "Jie sent daut Licht fa dise Welt.  Daut es ommäajlich eene Staut to vestäakjen, dee opp däm Boajch licht.  Kjeen Mensch stekjt eene Laump aun un bestelpt dee dan unja eenen Ama.  Dee woat doch opp eenen Laumpenhoola jestalt, daut doa fa aulem em Hus Licht es.  Soo lot uk jun Licht ver de Menschen schienen, daut see june goode Woakjen seenen un jun Voda em Himmel doaväa lowen," (Matäus 5:14-16).  Daut es onse Oppgow aus Kjristen.  Krakjt soo aus een Licht woat oppjehowen opp een Laumpenhoola, wort Jesus oppjehowen ver Gott fa aule Menschen.  Daut Licht dacht äwa de gaunze Welt, oba Menschen kjenn sikj noch emma wälen aus see daut wellen aunnämen ooda nich.  Wäa daut Licht aunnemt, nemt uk eewjet Läwen aun, un kjricht uk de Woarheit, wiels Jesus sajcht:  "Ekj sie de Wajch, de Woarheit un daut Läwen, kjeena kjemt nom Voda buta derch mie," (Johanes 14:6).  Wan du am hast aunjenomen, dan goot!  Frei die!  Du hast daut eewje Läwen jekjräajen.  Dan lot uk dien Licht dachen ver Menschen, met een goodet Läwen utfieren, waut Gott Iea brinjt.  Oba wan du nich hast Jesus aunjenomen, dan doo daut vondoag!  Veleicht hast du nich noch eene Jeläajenheit.  Sat dien Gloowen opp am, un froag am em Jebäd fa Vejäwunk, un hee woat die daut jäwen