De Markus Breef, Numma 20

Toom Läsen:  Markus 4:26-34
            "Un hee säd:  Met Gott sien Rikj es daut soo aus met eenem aun, dee Sot opp sien Launt streid.  Un auf hee de Nacht schlapt ooda äwadach romm es, kjient de Sot un waust, wan hee uk nich weet woo.  Wiels de Ieed brinjt ut sikj selfst ieescht dän Haulm, dan de Oaren, un dan dän vollen Weit en de Oaren verendach.  Wan daut Jeträajd ieescht riep es, lat hee daut fuaz aufheiwen; wiels daut es dan Tiet to eifsten.
            Un hee säd:  Met waut sell wie Gott sien Rikj vejlikjen, ooda derch waut fa een Jlikjnis sell wie ons daut väastalen?  Daut es soo aus een Sampkuarn; daut es daut kjlanste Kuarn waut en de Ieed jeplaunt woat; oba wan daut ieescht jeseit es, waust daut un woat jrata, aus aule aundre Plaunten em Goaden, un kjricht soone groote Asta, daut de Väajel von enne Loft sikj em Schauten äare Nasta buen.
            Derch väl soone Jlikjnisen prädijd hee daut Wuat, doano aus see am vestonen kunnen.  Un hee räd to an nich aundasch aus derch Jlikjnisen; oba siene Jinja muak hee aules kloa, wan hee met an auleen wia."
 
 
            Jesus prädijd daut Wuat wua emma hee wia, un vetald de Menschen de Woarheit von Gott sien Rikj.  De Jlikjnisen waut hee an vetald wieren von auldoagsche Dinja, soone met wäm aulemaun bekaunt wia soo aus seien un arnten.  Jesus wiest derch dise Jlikjnisen daut Gott sien Rikj es gaunz aundasch von irjent een aundra Rikj opp dise Welt.
            Daut ieeschte Jlikjnis vondoag es von een Maun waut deit Sot seien opp sien Launt.  Woo väl Foarma doonen dit nich aule Joa?  Dee doonen eene Oabeit, un daut es daut Sot enne Ieed nenn.  Von doa wieda deit Gott de Oabeit, wiels kjeen Mensch kaun Sot moaken waussen.  Daut es krakjt soo met Gott sien Rikj.  Oba waut meent daut?  Woo es een Rikj soo aus een Maun met Sot?
            Gaunz ieeschtet mott wie kjikjen no wäms Rikj daut es.  Wan daut Gott sien Rikj es, dan es hee uk Kjennich doa äwa.  Soo dan, aul dee waut en Gott sien Rikj sennen, sent am unjadon, wiels hee es Kjennich äwa an.  Wie aus Kjristen läwen opp dise Ieed, oba wie sent Poat von Gott sien Rikj.  Daut es nich een Fiesischet Rikj, wiels wie wonen aula en veschiedne Lenda met äare Rejierungs un Räajlen, oba doch sent wie Kjristen.  Wan wie Fiesisch hia wonen, dan es Gott sien Rikj nich een Fiesischet, soo aus wie doa von denkjen, oba Gott rejieet dan en onse Hoaten.  Gott sien Rikj woat en Menschen Hoaten beläft.  Gott sien Rikj woat jebut wan wie daut Evangelium wieda brinjen, un Menschen noda no am trakjen.  Daut es een Jeistlichen Rikj, waut onse Hoaten nie moakt derch Gott siene Jnod.
            Aus Jesus prädijd, horchten Menschen, un see dochten äwa waut hee säd.  Daut es soo aus daut Sot enne Ieed nenn, un daut doa loten, daut daut doa kjient.  Met de Tiet, waust daut, un wan daut ieescht reed es dan brinjt daut mea Sot äwadäl.  Gott sien Rikj fangt aun aus een Jedanken em Hoat, daut veleicht sullen wie horchen no daut Wuat.  Daut kjient en ons bat wie daut aunnämen, daut Gott ons Leew haft, un daut hee sien Sän schekjt toom ons Vejäwunk brinjen, un ons ut de Hal raden.  Von doa waust daut wieda bat wie aundre doavon vetalen, un soo brinjt daut mea Sot un Frucht äwadäl.  Daut es Gott sien Rikj, un siene Oabeit brinjt daut wieda.  Daut es nich waut wie doonen, oba waut Gott deit en ons.
            Jesus vejlikjt Gott sien Rikj uk met Samp.  Eene besondre Sort Sampkuarn kaun noch groot waussen, oba daut es mau sea kjlienet Sot ea daut waust.  Wan daut ieescht waust, kaun daut Schauten brinjen too aula Sorten Väajel un Tieren, un uk to daut äwaje Goaden.  Wan Gott sien Rikj en ons schauft, woat daut uk met de Tiet äwadäl komen.  Ons Läwen woat endren soo daut Gott woat jeieet doaderch, un Menschen woaren dan noda jetrocken no am.
            Well wie ons selfst beharschen, toom seenen aus wie werkjlich Frucht brinjen fa Gott.  Doo wie schaufen daut Gott sien Rikj woat jebut?  Wan nich, well wie daut dan endren, wiels doa es nuscht opp dise Ieed waut wichtja es aus daut Evangelium vekjindjen, daut Menschen kjennen jerat woaren.  Gott sien Rikj woat doaderch jebut.  Well wie uk emma dolla soo läwen daut wan Menschen no ons kjikjen, kjennen see seenen waut Gott haft en ons jedonen.
            Doa es noch een aundret Poat von Gott sien Rikj, waut noch nich jekomen es.  Wan Jesus trigj kjemt, woat daut Rikj nich blooss en onse Hoaten sennen, oba aulemaun woat seenen daut hee es Kjennich un Har.  Aules waut es woat dan nie jemoakt sennen, un doa es dan kjeen Trubbel.  Oba bat dän Dach kjemt, well wie schaufen daut Gott sien Rikj kaun spreeden un Menschen Hoaten endren, toom Menschen no am trakjen.