De Markus Breef, Numma 24

​Toom Läsen:  Markus 5:21-34
            "Aus Jesus wada met de Lomm no de aundre Sied Mäa jefoaren wia, saumelden sikj doa biem Wota wada väl Menschen om am.  Un Jairus, eena von de Leidasch von de Judenschool, kjeem uk, un aus hee Jesus sach, foll hee ver am dol un prachad am sea un säd:  Miene kjliene Dochta es aum stoawen; komm doch un laj ar diene Henj opp, daut see kaun jesunt woaren un läwen.
            Un hee jinkj met am met.  Doa kjeemen väle met un drenjden sikj no am opptoo.  Un doa wia eene Fru, dee aul 12 Joa jeblat haud.  Dee haud aul väl jeläden derch een deel Doktasch un aules utjejäft, waut see haud.  Oba daut wia met ar en de Städ bäta, blooss emma oaja jeworden.  Aus see von Jesus hieed, kjeem see derch daut Volkj von hinjen aun am naun un schieed siene Kjleeda aun.  See haud sikj jesajcht:  Wan ekj am blooss aun de Kjleeda aunschieren kunn, wudd ekj jesunt woaren.
            Äa bleeden hieed fuaz opp, un see kunn daut em Lief feelen, daut see von äare Ploag jeheelt wia.  Un Jesus späad fuaz aun sikj, daut eene Krauft ut am jegonen wia, un dreid sikj mank daut Volkj om un fruach:  Wäa haft miene Kjleeda aunjeschieet?
            De Jinja säden to am:  Du sitst, daut daut Volkj die drenjt, un dan frajchst du noch, wäa die aunjeschieet haft?
            Un hee kjikj sikj om, to seenen, wäa daut jedonen haud.  De Fru wia angst daut ar flautad, wiels see wist je waut met ar jeworden wia.  See kjeem un foll ver am dol un säd am de volle Woarheit.  Un hee säd to ar:  Miene Dochta, dien Gloowen haft die jeholpen.  Go en Fräd!  Du best von diene Ploag looss."
 
 
            Wie seenen hia noch eemol vondoag daut Jesus haud daut drock met de Menschen.  Wua emma hee han jinkj wieren Menschen wäm Help fäld.  Nu daut hee jrod trigj wia von de Gadarena Omjäajent, wieren doa aul wada väl Menschen romm.  Mank aul dise Menschen kjemt eena am entjäajen un prachat am toom siene Dochta heelen, un Jesus jeit met am.  Jesus deed Menschen nich aufsajen wan an Help fäld un see doano fruagen.
            Dit näakjste Poat es fa mie intressaunt.  Jesus wia oppem Wajch toom een aundra Mensch halpen, un oba hinjawäajes kjeem doa waut mank.  Wan ekj irjent wua oppe Reis sie, un doa dan waut mank kjemt, es daut leicht fa mie toom vedrislich woaren, oba Jesus deit nich soont.  Hee bewiest Jedult un Metleet, un ekj jleew wie kjennen aula doavon lieren.
            Dise Fru haud aul 12 Joa jeblat, un soogoa kjeene Doktasch hauden ar kunt halpen, un nu wia aul äa Jelt aula.  See wia bat aum Enj jekomen.  See docht wan see blooss siene Kjleeda kunn aunschieren, wudd see jeheelt woaren.  Wua go wie han wan wie bat aum Enj komen?  Ekj jleew wie sullen uk Lia auf nämen von dise Fru, wiels en äare Noot jinkj see no Jesus, un daut es krakjt waut wie sullen doonen.  En aule Tieden, wan ons daut schwoa jeit, sullen wie no Jesus gonen met Gloowen daut hee ons doa kaun rut halpen.
            Äwa un äwa en de Schreft woat jesajcht daut Gloowen es de Uasoak wuarom Dinja passieren.  Wan Jesus Menschen äa Gloowen sitt, deit hee an halpen.  Krakjt soo es daut met dise Fru.  Em Gloowen schieet see Jesus siene Kjleeda aun, un see woat jeheelt.  Krakjt soo haustich es äa Krankheit gaunz wajch.  Jesus späad dit fuaz un fruach wäa am haud aunjeschieet, un dise Fru flautat sikj met Angst.  See kjemt ver Jesus un vetald am de gaunze Woarheit, woo daut met ar jewast wia.  Hia sajcht Jesus to ar daut äa Gloowen haft ar jeholpen, un nu es see von äare Ploag looss.  Daut es wichtich daut wie Gloowen haben wan wie no Jesus komen en Jebäd.
            Noch een Dinkj waut mie wichtich es en dise Varzh es daut Jesus wia aul oppem Wajch no eene aundre Städ; hee wia aul drock!  Un doch ut siene Drockichkjeit neem hee noch Tiet toom dise Fru Moot too spräakjen.  Gott es niemols too drock toom ons halpen; hee es niemols too drock toom onse Jebäda auntwuaten.  Noch mol kjrie wie nich de Auntwuat waut wie no froagen, oba hee haft emma Tiet fa die un mie.  Well wie blooss Gloowen haben, un en siene Tiet, woat hee auntwuaten.