De Markus Breef, Numma 26

​Toom Läsen:  Markus 6:1-6
           "Jesus veleet doa un jinkj met siene Jinja no siene Staut, wua hee tus hieed.  Un aus de Sabat kjeem, funk hee en äare Judenschool aun to lieren.  Un väle, dee am hieeden, staunden doaräwa un fruagen:  Wua haft dis Maun dit häa?  Waut es dit fa eene Weisheit, dee am es jejäft worden, daut hee soogoa Wunda doonen kaun!  Es dit nich de Holtoabeida?  Es dit nich Maria äa Sän un de Brooda aun Jakobus, Joses, Judas, un Simon?  Sent siene Sestren nich uk hia mank ons?
            Un see stieeden sikj äwa am.  Jesus säd to an:  Een Profeet woat emma jeieet, buta en siene Staut wua hee tus jehieet, un mank siene ieejne Famielje.
            Un hee kunn doa kjeene Wunda doonen, buta een poa kranke Menschen de Henj opplajen, daut dee jesunt worden.  Un hee wundad sikj äwa äaren Ongloowen.  Un hee jinkj en de Darpa un lieed."


              En een Wajch, es daut leichta fa ons vondoagschen Dach toom Jesus aunnämen aus daut to dee Tiet wia fa de Menschen en Jesus siene Staut, wua hee tus hieed.  Daut es soo daut wie haben am niemols jeseenen, un wie haben nich am jehieet perseenlich räden, oba wie haben de Oppwies von siene Lia un Woakjen, en de Schreft, un uk aul daut waut de Apostel nohäa jeschräwen haben wäajen am en de Niee Testament.  En dän Wajch kjenn wie kloa seenen daut Jesus Gott sien Sän es.
            Oba to de selwje Tiet, wie haben nich kunt aul de Wunda seenen waut hee deed, un jane Menschen to dee Tiet kunnen oba.  See sagen daut wan Jesus deed de Kranke heelen, un woo hee de beese Jeista kunn met een Wuat utdriewen, un dee jehorchten am; de Menschen dan kunnen am hieren räden, met eene Weisheit un met Krauft, daut see sikj staunden äwa siene Wieed.
             En jieda Faul, es daut Wichtich daut Menschen Gloowen haben.  Wie haben am nich jeseenen, oba wan wie Gloowen haben, kjenn wie daut dan noch aunnämen, daut Jesus es Gott sien Sän, un daut hee jekomen es toom de Sindenschult betolen.  Menschen musten to dee Tiet krakjt soo sea Gloowen haben.  See kunnen am seenen, un oba onen Gloowen halpt an daut nuscht, blooss met de Uagen seenen.  De Menschen en Jesus siene tus Staut wisten daut hee kunn Wunda doonen, un daut hee jewaultich lieed, un see hauden dan noch kjeen Gloowen aun am.  See fruagen aulahaunt Froagen, auf see nich siene Famielje kjanden un aus see nich am hauden jekjant von aus hee een Kjint wia.  Wia hee nich uk blooss een jeweenelja Holtoabeida?  De Auntwuat es je gaunz kloa:  Jesus es nich blooss een Holtoabeida.  Un daut kunnen de Menschen uk kloa seenen.
           Noch mol sent Menschen aufjenstich wan eena von äa Darp woat huach aunjeseenen von aundre Menschen. See jleewen dan daut dit es je mau eena von ons hia, wuarom es daut met dän soo väl, un met ons oba mau soo weinich?  Un dan stieren see sikj äwa am.  Toom Biespell, wan mien Brooda nu wudd met eemol een beriemda Sinja woaren, ekj wudd mäajlich noch een bätje Trubbel haben daut auntonämen!  Wuarom sull daut met am nu soo väl mea sennen aus met mie?  Sie ekj nich uk eent von siene Jeschwista?  Oba daut es nich de rajchta Wajch doa nauntokjikjen.  De Menschen en Jesus siene Staut hauden sult daut met Gloowen aunnämen, waut Jesus doa prädijd, nich sikj stieren blooss wiels see am aul lang jekjant hauden.
Daut sajcht daut Jesus wundad sikj äwa äaren Ongloowen, un daut buta een Poa kranke heelen kunn hee doa en de Staut kjeene Wunda doonen, wäajen äaren Ongloowen.  Well wie nich soo sennen aus dee!  De Schreft sajcht, "Oba onen Gloowen es daut ommäajlich, Gott to jefaulen.  Wäa no Gott komen well, mott jleewen, daut hee es, un daut hee dee beloont, dee am iernstlich sieekjen."  Well wie ons Gloowen opp Jesus saten, wiels wie kjenn seenen von de Schreft daut hee werkjlich Gott sien Sän es.  Well wie nich soo sennen aus de Menschen en Jesus siene Staut, wäa sikj stieeden äwa am, oba leewa jleewen daut hee es wäa de Schreft sajcht daut hee es:  Gott sien Sän.