De Markus Breef, Numma 3

​Toom Läsen:  Markus 1:14-20
            "Un aus Johanes ieescht faustjenomen wia, kjeem Jesus no Galiläa un prädijd daut Evangelium vom Rikj Gottes, un säd:  De Tiet es jekomen, un daut Rikj Gottes es hia.  Kjieet om un jleeft aun daut Evangelium!
            Aus Jesus aum galiläaschen Mäa velenjd nikj, sach hee Simon un sienen Brooda Andreas äare Nats em Wota schmieten, wiels daut wieren Fescha.  Un Jesus säd to an:  Komt un folcht mie no; ekj woa junt to Menschenfescha moaken!
            Un fuaz oppe Städ veleeten see äare Nats un jinjen met am.  Un aus hee een bät wieda jinkj, sach hee Jakobus, Zebedäus sien Sän, un Johanes, waut dän sien Brooda wia, woo see en eene Lomm äare Nats flekjten; un hee siemd nich dee uk to roopen.  Un dee leeten äaren Voda Zebedäus met äare aunjenomne Mana en de Lomm un jinjen met am."
 
 
            En de Schreftstäd fa vondoag läs wie daut Jesus funk aun met prädjen en de galiläaschen Omjäajent, un hee prädijd wieda waut Johanes de Deepa haud jesajcht ea am wort faustjenomen.  Johanes prädijd daut daut Gottesrikj wia bat aun de Däa; nu sajcht Jesus de Tiet es hia.  Jesus es de Goode Norecht fa aul dee waut mootlooss sent.  Daut Evangelium sajcht daut Gott kaun die frie moaken von aul dien Sind, un rein wauschen von aul dien Ojjerajchtichkjeit.  Johanes de Deepa muak de Wajch reed daut Menschen kunn Jesus siene Bootschoft aunnämen.
            Oba Jesus haud nich blooss Prädjen em Senn.  Hee wull besondre Menschen haben bie am waut wudden siene Wunda seenen, un siene Wieed hieren, un dee wieda vekindjen wan hee ieescht wajch wia.  Doaropp funk hee aun Menschen to roopen toom am nofoljen.  Hee roopt vea Fescha, Andreas, Simon, Jakobus, un Johanes, toom siene Jinja sennen, met dän Vespräakjunk daut hee wudd dee to Menschenfescha moaken.  Daut es intressaunt toom läsen daut see veleeten aules plazlich un jinjen met am.  Woosoo wort dit?
            Wan wie em Johanes Breef läsen woa wie en daut Andreas, Simon sien Brooda, wia een von Johanes de Deepa siene Jinja ea Jesus am roopt.  "Eena von dee beid, dee Johanes räden hieed un met Jesus metjinkj, wia Andreas, Simon Petrus sien Brooda.  Andreas funk daut ieeschte sienen Brooda Simon un säd too am:  'Wie haben dän Messias jefungen, daut meent:  dän Christus!'  Un hee brocht am no Jesus," (Johanes 1:40-42).  De Uasoak wuarom dee soo plazlich aules veleeten toom Jesus nofoljen wia wiels see wisten aul wäa dit wia:  dän Messias.  Johanes de Deepa haud Andreas aul jesajcht daut Jesus wia daut Gotteslaum, dee wäa wudd dee Sinden von de Welt wajch nämen (Johanes 1:29).
            Weetst du wäa Jesus es?  Weetst du daut hee kaun diene Sinden wajch nämen?  Daut Evangelium es noch soo vondoag.  Jesus roopt Menschen noch emma, un sajcht:  Komt, folcht mie no!  Hee deit vondoag uk noch Menschen to Menschenfescha moaken.  Wan wie am aunnämen aus Christus un aus Har, un wie jleewen daut hee es jekomen toom ons raden von de Sind, dan woa wie uk Seelich.  Jesus nemt onse Sinden wajch un roopt ons toom am nofoljen eendoont waut aundre doonen.  Daut baste Dinkj waut du kaust doonen es toom een aundra Mensch no Jesus brinjen.  Dit waut wie vondoag deeden läsen wia daut Aunfank von Jesus siene Oabeit oppe Ieed, un näakjstet mol woa wie seenen daut Hee haft werkjlich de Macht toom Menschen äare Sinden wajch nämen.  Hee wia nich blooss een Mensch waut mol to eene Tiet läwd;  hee es Gott sien Sän, un hee kaun die uk raden.