De Markus Breef, Numma 30

​Toom Läsen:  Markus 6:30-34
            "De Apostel saumelden sikj om Jesus un säden am aules, waut see jedonen un jelieet hauden.  Wiels doa soo väl Menschen han un häa jinjen, säd hee to an:  Wie haben hia nich emol Jeläajenheit to äten.  Komt, well wie wua fa ons auleen gonen un ons een Stootje utreiwen.
            Un see fuaren en eene Lomm no eene eensome Städ, wua see fa sikj auleen wieren.  Un de Menschen sagen an wajch foaren, un väle kjanden am.  Un von aul de Städa randen de Menschen to Foot doahan un kjeemen doa ea han aus see.  Un aus hee aun de Kaunt Mäa jinkj, sach hee de groote Maussen von Menschen; un am jaumad daut äwa an, wiels dee wieren soo aus Schop onen Hoad.  Un soo funk hee wada aun, an to lieren."
 
 
         Wie seenen vondoag daut mol rajcht Jesus must noch mol Tiet nämen toom sikj vereiwen, ooda leewa daut hee uk een velangen haud doatoo.  Hee wia jekomen aus een Mensch, un daut meend daut am wort uk meed, krakjt soo aus wie aula.  Am hungad uk!  Hee must uk met aule Sorten Schwakheiten lieden, krakjt soo aus irjent een aundra Mensch.
          En dise Schreftstäd vondoag, komen de Jinja trigj von de veschiedne Darpa en de Jäajent, wiels Jesus haud an rut jeschekjt poawies toom prädjen en de Darpa.  Nu komen de trigj un vetalen Jesus aules waut see jedonen un jelieet haben.  Jesus haud an Krauft jejäft, daut see Menschen heelen kunn, un daut see kunn beese Jeista utdriewen.  Nu daut see trigj wieren, räden dee von aules waut jeworden wia derch äare Prädicht.
            Jesus reisd väl romm met siene Jinja toop toom prädjen, un daut hieed nich opp aus hee siene Jinja rut schekjt.  An fäld uk tweschen en een bätje Tiet toom vereiwen.  De Menschen leeten an blooss nich toch, wiels daut sajcht daut see hauden nich emol Jeläajenheit to äten.
        See fuaren dan no eene eensome Städ, daut see wudden sikj kjennen en beskje vereiwen, en mol een bät Tiet nämen toom äten, oba de Kaussen Menschen wieren soo aunhoolent daut see randen to Foot doahan wua de Jinja wieren, daut see ea bat doa wieren aus Jesus un siene Jinja!  Noch mol woa wie meed von emma met aundre Menschen toop sennen, un dan well wie blooss no Hus foaren, un mol een bät auleen sennen.  Dit es uk waut Jesus un de Jinja wullen.  De Jinja wieren meed von äare Missions Reis, un Jesus wia meed von een Tiet äwa met väle Menschen toop sennen.  Wan ekj en äare Städ wia jewast ekj jleew ekj wudd an aula haben no Hus jeschekjt, oba daut es nich waut Jesus deit.
            Ekj lot daut uk doa bie, daut Jesus sea mäajlich von Johanes de Deepa sienen Doot haft jehieet, un daut daut noch eene Uasoak es wuarom hee wull wua auleen sennen.  Johanes de Deepa haud Jesus jedeept em Jordan Riefa, un see wieren uk noch mol rajcht Frintschoft.  Jesus siene Mutta, Maria, wia de Nicht von Elisabet, Johanes de Deepa siene Mutta.  Johanes de Deepa deed uk zeijen von Jesus, daut hee wudd Menschen äare Sinden wajch nämen en Johanes 1:29, un en aundre Schreftstäden uk.  See kjanden eena dän aundren, un ekj jleew daut Jesus hieed von Johanes sien Doot, un am wia daut schwoa.  Dit wia veleicht uk eene Uasoak wuarom Jesus wull en eene eensome Städ sennen.
           Oba, wan Jesus de Maussen von Menschen sitt, velangt hee nich daut see veloten.  Leewa, am jaumat daut äwa an, wiels daut sajcht daut see wieren soo aus Schop onen Hoad, un hee deit an wada lieren.  Mol rajcht wan hee meed wia deed hee nich Menschen wajch schekjen.  Dit es fa mie een wundaboaret Bilt von Leew.  Jesus wia meed, un hungrich, un sea mäajlich uk bedrekjt wäajen Johanes wia jestorwen, oba hee schekjt de Menschen nich wajch.  Hee deed wautemma hee kunn toom Menschen lieren.
          Wan wie Jesus nofoljen, daut es wichtich daut wie uk soon Jaumahoat haben aus waut Jesus haft.  Well wie aula Dach dän Selfst aufsajen, un aundre Menschen hecha schazen aus ons selfst.  Daut es woo wie kjenn an Leew wiesen.  Well wie nich stell sennen, un dise goode Norecht von Jesus siene Jnod un Leew to ons selfst hoolen, oba leewa daut met deelen met de Menschen romm ons.  An fält dise Bootschoft soo needich, wiels wan dee aun Jesus jleewen, woaren dee uk seelich.  Well wie bäden, daut Gott ons woat een Jaumahoat jäwen, soo aus wie vondoag sagen von Jesus en dise Schreftstäd, daut wie uk woaren de goode Norecht met deelen met de Menschen romm ons.