De Markus Breef, Numma 31

Toom Läsen:  Markus 6:35-44
             "Nu wia daut oba aul lot no Meddach, soo daut siene Jinja no am kjeemen un säden:  Dit es eene eensome Städ, un daut es aul sea lot.  Schekj de Menschen wajch, daut see en de Städa un Darpa en de Omjäajent gonen un sikj Broot kjeepen, daut see waut to äten haben.  Hee oba säd:  Jäft jie an to äten!
            See säden to am:  Daut wudd acht Moonat Loon brucken.  Sell wie soo väl aun Broot utjäwen, an to äten to jäwen?
              Un hee säd to an:  Woo väl Stekja Broot hab jie?  Got kjikjt emol!
              Un see jinjen un fungen ut un säden:  Fief, un twee Fesch.
             Dan befool Jesus an, daut see sikj aula en Gruppen opp daut jreene Grauss dolsaten sullen:  Soo saden see sikj dol en Gruppen von 100 un von 50.  Hee neem dee fief Brood un dee twee Fesch un kjikj nopp no däm Himmel un dankt doaväa un bruak daut Broot.  Dan jeef hee de Jinja daut, daut see de Menschen daut jeewen.  Hee vedeeld dee twee Fesch uk mank un aula.  See eeten aula un worden saut.  Dan lausen de Jinja noch 12 Kjarw voll Bietakjes Broot un Fesch toop.  Un jejäten hauden doa ojjefäa 5,000 Maun."
 
 
             Vondoag läs wie eene wundaboare Jeschicht von woo Gott deit aules vesorjen, fa dee waut am sieekjen.  Dise Maussen Menschen hauden Jesus jesocht un jefungen, un wieren am hinjaraun jekomen no de eensome Städ wua Jesus met siene Jinja toop han fua.  Jesus un de Jinja wieren meed, un wullen sest waut Tiet nämen toom vereiwen, oba aus Jesus de Menschen sach, jaumad am daut äwa an, un hee funk an fresch aun to lieren.
        Gott es sea besorcht om Menschen äare Seelen.  Dit es wuarom Jesus äwahaupt kjeem.  Siene Oabeit wia toom daut Evangelium prädjen, daut Gott een Wajch muak daut Menschen kunn frie sennen von äare Sinden, un daut see kunnen nu wada Jemeenschoft haben met Gott.  En dise Schreftstäd wia daut noch nich foadich, wiels Jesus wia noch nich jestorwen, oba dän Aunfank von daut Evangelium wia aul doa.  Jesus wia mank de Menschheit, un hee deed an lieren.
            Oba Gott es nich blooss besorcht om Menschen äare Seelen.  Hee es uk besorcht om daut Fiesischet em Läwen.  Gott muak Menschen gaunz no sienem Plon no, en sien Aufbilt, un Poat von daut es Fiesisch.  Wie seenen hia vondoag daut de Menschen wäm Jesus lieed kjriejen twee Sorten Äten, eene Sort fa äare Seelen, en de Lia waut Jesus an jeef, un eene Sort fa äare Kjarpasch, derch de Bieta Broot un de Fesch.  De Menschen wieren hungrich fa beides, un Jesus jeef an aules waut an fäld.
         Well wie trigj gonen enne Schreft no Matäus 6:31-33.  Daut sajcht, "Jie sellen nich sorjen un sajen:  Waut sell wie äten?  Waut sell wie drinkjen?  Waut sell wie auntrakjen?  Daut sent aules Sorjen, dee de Velkja sikj moaken.  Oba jun Voda em Himmel weet, daut jie daut aula brucken.  Oba sieekjt daut ieeschte no Gott sien Rikj un no siene Jerajchtichkjeit.  Dan woa jie daut aundre uk aula kjrieen."  Onse Schreftstäd vondoag es krakjt de Erfellunk von dise Varzh en Matäus.  Jesus haud jesajcht, daut Menschen sikj nich sullen sorjen om irdische Dinj, soo aus äten, un oba leewa daut ieeschte no Gott sien Rikj sieekjen.  De Menschen en de eensome Städ sochten werkjlich no Jesus, no siene Lia, un doaderch no Gott sien Rikj un siene Jerajchtichkjeit, un Jesus vesorjd fa an aul daut aundret.
             Well wie em denkj hoolen, waut Gott haft to ons jesajcht en sien Wuat.  Well wie daut ieeschte no Gott sien Rikj sieekjen, un no siene Jerajchtichkjeit, un dan woa wie daut aundret waut ons fält, uk aula kjrieen.  Dise Menschen kjriejen mau eene Moltiet, oba daut wia jenuach daut see von doa kunnen no Hus gonen lota.  Veleicht kjrie wie nich soo väl aus ons daut jankat, oba wie woaren doawäajen jenuach kjrieen.
          Well wie no noch een Dinkj kjikjen.  Jesus deed nich blooss de Menschen äten von Himmel jäwen.  Hee befool ieescht siene Jinja daut see de Menschen sullen to äten jäwen, wan daut uk gaunz ommäajlich wia fa an.  Doa wia kjeen Wajch woo de Jinja kunnen aul de Menschen to äten jäwen met daut waut see hauden, oba Jesus velangd daut doawäajen.  De Jinja staunden sikj, oba Jesus wull an waut lieren.  Hee fruach no daut kjlienet beskje waut see hauden, un von daut, muak hee jenuach fa de gaunze Grupp Menschen.  Soo es daut uk vondoag.  Gott velangt daut wie am ons kjlienet beskje jäwen, waut emma daut es, auf wie sinjen kjennen, ooda lieren kjennen, ooda soogoa fein utfäajen kjennen, un daut dan brucken toom am Iea brinjen.  Wan wie daut doonen, woat hee ons kjlienet beskje nämen, un waut wundaboaret doavon moaken, daut Menschen no am jetrocken woaren, un daut sien Rikj woat jebut.