De Markus Breef, Numma 32

Toom Läsen:  Markus 6:45-52
          "Doaropp schekjt Jesus siene Jinja fuaz en de Lomm to stieen un veropp äwa de Läacht no Betsaida to foaren, wäarent hee vom Volkj Aufscheet neem.  Aus dee ieescht wajch wieren, jinkj hee en de Boaj, bäden.  Aus daut Owent wort, wia de Lomm medden opp däm See, un hee wia auleen oppem Launt.  Un hee sach, daut de Jinja sikj biem roodlen kjwälden, wiels see dän Wint von väaren hauden.  Jäajen Morjen kjeem Jesus oppem Wota no an opptoo jegonen.  Aus hee bie an vebie gonen wull, sagen see am oppem Wota gonen, dochten see hee wia een Jeist, un vefieeden sikj soo, daut see ut Angst aunfungen to schrieen.  Hee oba räd to an un säd, see sullen mau jetroost sennen:  Dit sie ekj; fercht junt nich!
             Dan stieech hee bie an en de Lomm nenn un de Wint läd sikj.  See wisten blooss nich waut see denkjen sullen.  Wiels see daut noch nich vestonen kunnen, woo Jesus daut met daut Broot jedonen haud, wieren äare Hoaten noch veschloten."
 
 
          Dit es eene sea intressaunte Jeschicht.  Wäa wudd jejleeft haben daut et jinkj opp Wota to gonen?  Dise Jeschicht es buta jeweenlich, oba daut bewiest Jesus siene Macht, krakjt soo aus aul de aundre Wunda waut hee deed.  Dit es mau een von de väle Jeschichten waut bewiesen daut Jesus es Gott sien Sän.  Hee es Har äwa aules.
             Dise Jeschicht passieet fuaz no däm daut Jesus daut groote Volkj to äten jeef.  5,000 Mana, met äare Famieljes toop, hauden mea aus jenuach jekjräajen von 5 Bulkjes Broot un 2 Fesch.  Dit wia een Wunda von Gott, oba wie läsen vondoag daut de Jinja kunnen daut noch nich vestonen.  Fuaz aus dit passieet wia schekjt Jesus de Jinja trigj äwa daut Mäa no de aundre Sied, un hee bleef trigj, toom Aufscheet nämen von de Menschen, oba uk fa waut mea.  Jesus haud ver dit noch kjeen Tiet auleen jefungen, un nu wia siene Jeläajenheit.  Daut Volkj veleet, un dan kunn hee auleen sennen un sikj vereiwen.
           Hee es wada een goode Lekzion bennen fa ons.  Wan Jesus wull Tiet fa sikj haben, deed hee bäden.  Foaken wan wie denkjen aun Tiet nämen fa ons selfst, denkjen wie aun aules to sied lajen un blooss mol doonen waut ons jankat.  Nu doo wie waut ons scheen jeit.  Oba met Jesus wia daut nich soo.  Hee haud soone Leew fa sien Voda, daut fa am, Tiet auleen meend bäden.  Hee haud soon velangen no Gott daut hee bäd meist de gaunze Nacht!
         Wie aus Kjristen sullen Lia nämen von Jesus.  Daut waut ons jankat sull nich aundasch sennen aus daut waut Gott jankat.  Met Jesus wia daut daut selwje.  Gott well jieren Jemeenschoft haben met ons, un daut es wuarom hee Jesus schekjt.  De goode Norecht es de Norecht von woo Menschen kjennen wada Jemeenschoft haben met Gott!  Dit es woo Jesus kunn meist de gaunze Nacht derch bäden en eent.  Sien Wellen wia toom daut doonen waut Gott wull.  Wiels Gott well Jemeenschoft haben met ons, es daut wichtich daut wie aus Kjristen uk jieren wellen Jemeenschoft haben met Gott.  Daut hechste Jeboot enne Schreft es dit waut Jesus sajcht en Matäus 22:37-38,  "Hee säd to am:  'Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken'.  Dit es daut jratste un ieeschte Jeboot."
             Aul de Woakjen waut Jesus deed, aul de Wunda, kjeemen von sien Jemeenschoft met sien Voda.  Jesus rät to de Farisäa en Johanes 8:28-29, wua daut sajcht, "Jesus säd to an:  Wan jie dän Menschensän ieescht woaren doot jemoakt haben, dan woa jie seenen, daut ekj dee sie, un daut ekj nuscht ut mie selfst doo, oba daut ekj dit soo räd, aus de Voda mie jelieet haft.  Un dee wäa jie jeschekjt haft, es met mie.  De Voda haft mie nich auleen jeloten, un ekj doo emma daut, waut am jefelt."  Jesus deed blooss daut waut hee von sien Voda wist to doonen.
          Daut es wundaboa daut Jesus deed opp Wota gonen, un daut beweess noch eemol daut Jesus werkjlich Gott sien Sän es.  Dit beweess daut hee Krauft haud äwa aules, mol rajcht de Natua.  De Jinja äare Hoaten wieren noch too; see kunnen nich mol vestonen woo Jesus daut grootet Volkj jefoodat haud; woo wudden see daut vestonen wan hee dan opp Wota jinkj?  Kjeen Wunda see ferchten sikj!  Ekj wudd mie uk jeenjst haben.  Jesus oba räd to an un weess daut doa wia nuscht toom ferchten, wiels see kjanden am.  Soo aus hee enne Lomm nenn stieech, soo wort daut Wint stell.  Wan wie Jesus kjanen, dan es doa nuscht mea toom ferchten.  Wie haben Jemeenschoft met de aulahechsta Gott!  Woo wudd wie dan Angst haben fa irjent sestwaut?  Well doaraun denkjen daut näakjstet mol wie Angst haben äwa irjent waut.  Wan wie de Angst wellen looss woaren, dan mott wie iernstlich Jesus nofoljen, un gooda Jemeenschoft haben met Gott ons Voda.