De Markus Breef, Numma 33

Toom Läsen:  Markus 6:53-56
            "Aus see en Genezaret aunkjeemen, ankaden see sikj doa faust.  Un sooboolt aus see ut de Lomm stieejen, kjanden de Menschen Jesus un randen en de gaunze Omjäajent un druagen de kranke opp äare Madrauzen no Jesus, wuaemma see hieeden, daut hee wia.  Un wuaemma hee en de Städa, un Darpa ooda oppem Launt kjeem, läden see de kranke oppem Moakjtplauz un prachaden em, daut hee an blooss sull loten dän Soom aun siene Kjleeda aunschieren; un aule dee am aunschieeden worden jesunt."
 
 
          Ekj jleich waut daut latste Poat von onse Schreftstäd sajcht vondoag:  "Un aule dee am aunschieeden worden jesunt."  Daut es soone scheene Woarheit daut Menschen worden jeheelt von äare Krankheiten, un daut es soon gooda Bewies von Jesus siene Leew fa de Menschen.  Wie haben aul ieremol jeläst von Jesus sien Metleet, un woo am daut jaumad äwa de Menschheit, un wie seenen foaken enne Schreft daut wan Menschen no Jesus komen em Gloowen, un prachren fa de Heelunk, daut Jesus deit waut see no froagen.
         Jesus wia aul wiet un breet bekaunt jeworden, un daut kjenn wie seenen wan wie läsen, wiels wuaemma Jesus han foat kjanen de Menschen am boolt un brinjen aul äare kranke no am.  De Menschen wisten daut see kunnen Heelunk finjen wan see no Jesus kjeemen.  Daut es noch emma soo vondoag, oba dit haft nich blooss met fiesische Krankheiten to doonen.  Hia es noch eene deepre Lia bennen.
            Wie haben aul jeseenen daut Jesus haud Metleet fa Menschen.  Am jaumad daut äwa Menschen wan see musten lieden, un hee kjeem toom am frie moaken.  Oba wuarom lieden Menschen äwahaupt?  De Auntwuat es de Sind.  En 1 Mose 3 kjenn wie läsen von woo Adam un Eva onjehuarsom wieren to Gott.  Dit es wua de Sind aunfunk, un de Strof fa de Sind es dän Doot.  Aul daut lieden un aul de Weedoag waut Menschen haben kjemt von de Sind.  Dit meent nich onbedinjt daut wan een Mensch Weedoag haft, daut daut een Tieekjen es von eene besondre Sind waut janem Mensch haft jedonen, oba leewa, em grooten gaunzen, wie haben Weedoag wiels Adam un Eva sikj hauden vesindicht jäajen Gott, wiels de Schreft sajcht, en Reema 5:12 soo aus dit:  "Soo aus derch eenen Mensch de Sind en de Welt nenn kjeem un derch de Sind de Doot, soo haft sikj de Doot äwa aule Menschen jespreet, wiels see aula sindijden."
            Daut sent nich blooss Adam un Eva waut schuldich wieren ver Gott, nä, wie sent aula schuldich.  Dise Schreftstäd moakt daut gaunz kloa daut aun Menschliche Krauft es daut ommäajlich Jerajcht to sennen ver Gott, wiels wie sent aula Sinda.  Dit es wuarom Jesus kjeem:  Hee kjeem toom äwa de Sind un de Doot jewennen, daut wie kjennen doavon frie sennen.  Daut sajcht wieda en Reema 3:23-25a, "Doa es kjeen Unjascheet:  Aulemaun haft jesindicht un kjemt doarenn too kort, waut hee bie Gott sennen saul, schenkjt Gott an de Rajchtfoadjunk ut Jnoden, derch de Radunk dee en Christus Jesus es.  Dän haft Gott rut jewält aus een Jnodenstool, wua, derch Christus sien Bloot, Vejäwunk fa onse Sinden to haben es, wan wie aun Christus jleewen."
        Wan wie läsen von woo de Menschen aula no Jesus kjeem, un daut aul de kranke worden jeheelt, well wie denkjen aun woo de fiesische Heelunk en dise Schreftstäd bewiest de Jeistliche Heelunk waut jieda Mensch kaun haben derch Jesus.  Wan wie no am komen, woa wie jeleest von onse Jeistliche Krankheit, waut ons Jemeenschoft met Gott deit stieren.  De Sind steit ons em Stich, un Jesus nemt daut wajch.  Wan wie aun Jesus jleewen, kaun daut jratste Probleem waut wie haben gaunz jeleest sennen.
          Aul de Wunda waut Jesus deed wieren toom bewiesen wäa hee wia, daut Menschen kjenn weeten daut hee Gott sien Sän es, un daut hee sien Läwen jeef toom onse Sindenschult betolen.  De Heelunk waut hee dise kranke jeef wia een bewies von de jratre Heelunk waut hee aulemaun jeft von de Sind, oba krakjt soo aus de kranke, mott wie no am komen toom daut aunnämen.  Well wie daut nich auf schuwen!  De Heelunk es doa, well wie daut aunnämen!  Jesus deit noch aule dee heelen, dee no am komen.