De Markus Breef, Numma 34

Toom Läsen:  Markus 7:1-13
            "Dan kjeemen de Farisäa un eenje von de Schreftjelieede, dee von Jerusalem jekomen wieren, un saumelden sikj om am.  See sagen daut eenje von siene Jinja met orreine Henj daut Broot eeten, daut meend see hauden sikj nich de Henj jewoschen.  De Farisäa, un äwahaupt de Juden, äten nich aundasch, aus sikj no äare Eltestasch äare Väaschreften de Henj to wauschen;  un wan see vom Moakjtplauz komen, äten see nich onen sikj ieescht to wauschen.  Soo hoolen see sikj aun väl aundre Väaschreften, soone aus Kuffels, Kaunen, un Jefässa von Koppa wauschen.  Dan fruagen de Farisäa un Schreftjelieede Jesus:  Wuarom hoolen diene Jinja sikj nich aun onse Eltestasch äare Väaschreften, un äten daut Broot onen sikj de Henj to wauschen?
          Hee säd to an:  Jie Heichla!  De Profeet Jesaja haft von junt gaunz rajcht verut jesajcht, soo aus jeschräwen steit:  "Dit Volkj ieet mie met de Leppen, sajcht Gott; oba em Hoat sent see wiet auf von mie.  See deenen mie vejäfs, wiels see lieren sest nuscht aus Menschen Väaschreften."
       Jie haben Gott siene Jebooten veloten, om Väaschreften von Menschen to hoolen; soowaut aus Kuffels un Kaunen utwauschen, un noch väl mea biesied.
      Un wieda säd Jesus:  Sea fein hab jie Gott siene Jebooten oppjehowen, om june Väaschreften to hoolen.  Moses säd:  "Du saust dienen Voda un diene Mutta ieren" un:  "Wäa Voda ooda Mutta flieekjt saul dootjemoakt woaren."  Jie oba lieren:  Eena kaun to Voda ooda Mutta sajen:  De Help dee jie von mie hauden haben kunt, es Korban.  Korban meent:  Daut es Gott jejäft.  Dan lot jie eenem nuscht fa sienen Voda ooda siene Mutta doonen, un soo moak jie Gott sien Wuat to nuscht derch de Väaschreften, dee jie oppjestalt haben.  Un soo moak jie daut met väle Dinja."
 
 
​        Dise Schreftstäd vondoag jeft mie väl äwa to denkjen.  Woo foaken doo wie aus Menschen nich soont aus dit?  Wie haben aula Trubbel daut wie onse ieejne Jebooten wellen doonen, enne Städ von daut doonen waut de Bibel sajcht.  Jesus sajcht eefach daut de Schreftjelieede muaken Gott sien Wuat to nuscht met äare Eltestasch äare Väaschreften doonen.
        Jesus sajcht hia besondasch daut de Schreftjelieede muaken Gott sien Wuat to nuscht, en daut waut see säden äwa eenem siene Elren ieren.  De Bibel sajcht gaunz kloa, daut wie onsen Voda un onse Mutta sellen ieren, un nich an flieekjen.  2 Mose 20:12 sajcht, "Ieet june Elren, dän Voda un de Mutta soo daut jie noch lang en daut Launt, woont de Har jun Gott junt jeft, wonen kjennen."  Un 2 Mose 21:17 sajcht, "Wäa sienen Voda ooda Mutta veacht, dee saul stoawen."  Dit sent de Varzh waut Jesus brukt.  En jane Tiet deed jieda Famielje sikj aun de elre Menschen to kjemren, wiels see hauden nich Aultenheims dan.  Daut meend daut wan de Elren ieescht oolt wieren, musten de Kjinja vesorjen fa an, daut see to äten hauden, un aules waut an wudd fälen toom läwen bliewen.
           Oba de Farisäa un Schreftjelieede säden, daut de Kjinja kunnen leewa daut Jelt to Gott jäwen, un dan durwen de Kjinja sikj nich om de Elren kjemren.  Dit es krakjt daut Jäajendeel von waut Moses säd, un oba de Schreftjelieede talden daut soo aus wan see deeden Moses horchen.  Menschen doonen noch emma soont aus dit.  Wie moaken aulahaunt Räajlen fa ons selfst waut wie nie nich enne Schreft finjen, oba wie talen daut soo aus tru sennen to Gott, wan wie uk krakjt daut Jäajendeel doonen waut de Bibel sajcht.  Toom Biespell, eenje sajen, daut Musikj es orrajcht, un see jleewen daut wan see Musikj gaunz aufsajen daut see bliewen Gott tru.  Oba de Bibel sajcht ieremol, daut wie sellen Musikj moaken un Gott ieren doa met.  Psalm 150:1 sajcht, "Loft dän Harn! Loft Gott en sien Heilichtum; loft am en siene jewaultje Macht em Himmel!" un en Varsch 4, "Loft am met drommeln un daunzen; loft am met Seidenspell un Fleeten!"  Daut sajcht uk em Nieen Testament, en Efeesa 5:19, "Rät eena toom aundren met Psalmen un sinjen un jeistliche Leeda.  Sinjt un spält em Hoat däm Harn to ieren."  Woont es nu wichtja?  Daut waut Menschen sajen, ooda daut waut de Bibel sajcht?
            Doa sent uk väle aundre Wäaj woo Menschen sikj aulahaunt dietlich moaken waut de Bibel niemols sajcht.  Wie motten opp paussen, daut wie nich onse ieejne Räajlen hecha schazen aus Gott sien Wuat.  Gott sien Wuat es daut no waut wie ons motten trajcht stalen.  Aule Menschen oppe Welt sent fleeschlich un schwak, oba Gott sien Wuat blift bestendich.  2 Timotäus 3:16-17 sajcht, "Aule Schreft von Gott jejäft, es wieetvoll ons to belieren, ons uttobätren, ons trajchttowiesen, un ons to unjarechten, woo rajcht to läwen, soo daut een Gottesmensch em Staund es en goode Woakjen jeschekjt to sennen."  Well wie iernstlich utforschen, woone Jebooten von Gott komen, un woone von Menschen komen, un dan Gott siene Jebooten hecha schatzen un doonen, leewa aus menschliche Jesazen.