De Markus Breef, Numma 36

Toom Läsen:  Markus 7:24-30
            "Dan veleet Jesus doa un jinkj no de Omjäajent von Tierus.  Hee jinkj doa en een Hus nenn un wull nich daut et irjentwäa weeten sull, oba hee kunn sikj nich vestäakjen.  Eene Fru, dee een Dochtakje met eenen orreinen Jeist haud, haud von am jehieet, un kjeem un foll ver am han.  Daut wia eene griechische Fru un staumd von Sierien Feenizien.  Dee prachad am, dän Soton ut äare Dochta rut to driewen.
            Oba Jesus säd to ar:  Lot de Kjinja sikj ieescht saut äten; daut es nich fein, de Kjinja daut Broot wajch to nämen un de Hunj väatoschmieten.
             See säd to am:  Jo, Har; oba soogoa de Hunjkjes unja däm Desch, äten de Kjinja äare Kjreemels.
            Dan säd hee to ar:  Wiels du dit sätst, go dienen Wajch; de Soton haft diene Dochta veloten.  Un see jinkj trigj no Hus un funk äare Dochta em Bad, un de Soton haud ar veloten."
 
 
            Dise Jeschicht waut wie vondoag no kjikjen es intressaunt.  Daut lat eefach soo aus wan Jesus nich jieren well dise griechische Fru halpen!  Hee sajcht to ar, daut et nich fein es, de Kjinja daut Broot wajchtonämen un de Hunj väatoschmieten, en Varsch 27.  Waut meent dit?
            Wie kjenn dise Jeschicht uk en Matäus läsen, un hia sajcht Jesus noch een aundret Dinkj.  Hee sajcht en Matäus 15:24, "Ekj sie blooss no de veloarne Schop en Israel jeschekjt."  Waut dit meent es daut Jesus kjeem no de Israeliten wiels see wieren Gott siene jewälde Menschen.  Derch de Juden sull dän Säajen fa de gaunze Welt komen, un Jesus es dän Säajen.  Jesus wia oba uk een Mensch, un doaderch kunn hee nich aulawäajen sennen opp eemol; hee kjeem no Israel, daut hee siene Kjoakj doa kunn aunfangen, daut et von doa sull äwa de gaunze Welt spreeden.  Jesus sajcht niemols daut de Juden de eensje Menschen wieren waut kunnen en Gott sien Rikj sennen, oba blooss daut hee no de Juden jeschekjt wia.
         De Profeeten en dän Oolen Testament räden uk von dit.  En Jesaja 11:10 steit jeschräwen, "Wan de Tiet kjemt, woat de Aust dee von Isai woss, daut Tieekjen fa de Velkja sennen.  De Lenda woaren dan no dän nieen Leida froagen un doa, wua hee rejieet, woat daut groosoatich sennen."  Jesus es de Aust dee von Isai kjemt.  Hee es jekomen fa aule Velkja, toom an de Radunk brinjen von Sind.  Jesus kjeem no Israel, daut derch Israel kunn de gaunze Welt jesäajent woaren.  Dit es wuarom hee sajcht daut am wort no de veloarne Schop en Israel jeschekjt.
              Paulus steit dit uk too, daut Jesus ieescht no de Juden kjeem.  Hee sajcht en Reema 1:16, "Ekj schäm mie nich met daut Evangelium von Christus.  Daut es Gott siene Krauft, aul dee seelich to moaken, dee doaraun jleewen, ieeschtens de Juden, dan oba uk de Griechen."  Daut Evangelium von Jesus Christus kjemt derch Israel, to de gaunze Welt, daut wäaemma aun am jleeft, woat seelich woaren.
            Daut waut Jesus sajcht to dise griechische Fru, ekj jleew, es toom ar proowen.  Hee wull seenen, waut see fa Gloowen haud, ea hee ar wudd halpen.  Wan hee wia soo jewast aus de aundre Juden, wudd hee ar blooss haben wajch jeschekjt onen to horchen waut see wull.  De Juden hauden soo weinich to doonen met de Griechen aus mäajlich, oba Jesus räd noch met ar.
            Dise Fru äare Auntwuat es mie wieetvoll.  See wist, daut Jesus Har wia, un see wist, daut hee no de Juden jekomen wia.  See wia tofräd, met waut emma hee ar wudd jäwen, wan daut uk mau een Kjreemelkje wia.  Äa Gloowen wia stoakj un see haud een vetruen, daut hee ar wudd halpen, eendoont woo lang see must doano froagen.  Un wäajen äa Gloowen, deit Jesus ar halpen.
            Wie sellen Lia aufnämen von dise Fru.  Noch mol späat sikj daut soo aus wan Gott nich deit onse Jebäda auntwuaten, oba hee hieet dee dan noch.  Wie motten aunhoolent bliewen, un em Jebäd bliewen, soo aus dise Fru aunhoolent wia.  Noch mol sajcht Gott nä to ons, un wie motten daut uk aunnämen wan hee daut sajcht, oba noch mol, deit hee ons proowen, toom seenen auf wie woaren aunhoolent bliewen biem bäden.  Gott weet waut ons fält ea wie froagen.  Well wie aunhoolent sennen, un bäden fa daut waut am woat Iea brinjen, un ons woat opp buen em Gloowen.  Well wie soon Gloowen haben aus waut dise griechische Fru en onse Schreftstäd vondoag haud.