De Markus Breef, Numma 38

Toom Läsen:  Markus 8:1-10
           "Aus doa dan wada väl Volkj vesaumelt wia, un wiels dee nuscht to äten hauden, roopt Jesus siene Jinja no sikj un säd:  Mie jaumat daut äwa dise Menschen.  Dee sent nu aul dree Doag bie mie jewast un haben nuscht to äten.  Un wan ekj dee hungrich wajch schekjen wudd, wudden see hinjawäajes omkomen; wiels eenje sent von wiet auf jekomen.
          Siene Jinja säden to am:  Wua kjrie wie hia en de Wiltnis jenuach Broot häa, dee saut to kjrieen?
           Jesus fruach an wooväl Bulkjes see hauden.  See säden:  Säwen.
       Hee säd de Menschen, see sullen sikj oppe Ieed dolsaten, un hee neem de Bulkjes, dankt doaväa, bruak dee, un jeef de Jinja dee, daut Volkj väatolajen; un dee deeden daut.  Dee hauden uk een poa kjliene Fesch.  Hee dankt uk doaväa un jeef de Jinja, dee uk daut Volkj väatolajen.  De Menschen eeten aula un worden saut.  Nohäa lausen de Jinja säwen Kjarw voll Brocken toop, dee noch äwajebläwen wieren.  Doa wieren bie 4,000 dee jejäten hauden; un dan leet hee dee gonen.  Hee stieech wada en eene Lomm nenn met siene Jinja un see fuaren no de Dalmanuta Jäajent."
 
 
       Doa sent miere Dinja waut wie kjennen lieren von dise Schreftstäd vondoag.  Daut ieeschte Dinkj es woo Jesus daut wada jaumad äwa de Menschen.  See wieren soo hungrich fa Jesus siene Lia daut see wieren wellens onen Äten to gonen bloos toom am hieren lieren.  Dit es eene Lekzion uk fa ons; kjenn wie sajen daut wie sent wellens onen Äten to gonen toom Jesus bäta kjanen lieren?  Dise Menschen vondoag kjeemen wada no Jesus toom jeistliche Noarunk kjrieen, un hee jeef an daut, un dan noch aul daut Fiesischet waut an fäld biesied daut.  Dise Menschen hauden daut needich toom äten, oba see hauden daut noch needja toom jeistlich oppjebut woaren.  Derch Jesus kjrieejen see beides.
        Jesus bewiest hia wada gaunz kloa daut hee besondre Krauft haft.  Aus hee ieescht jedankt haud, bruak hee daut Broot, un jeef soo väl daut aulemaun jenuach haud.  Hee neem wada daut beskje waut de Jinja am kunnen aunbeeden, un muak väl mea doavon.  Hee muak mea aus jenuach fa aul de Menschen, äwa 4,000, von blooss säwen Bulkjes un een poa Fesch!  De Jinja hauden meist nuscht, oba Jesus haud aules waut an fäld.  Soo es daut uk met ons.  Wie haben soo to sajen nuscht waut wie Gott aunbeeden kjennen, oba derch Jesus, nemt hee ons Beskje un moakt waut wundascheenet doavon.
        Noch een Dinkj waut wie kjennen seenen es daut de Jinja wundren wua see woaren jenuach Äten kjrieen daut aul de Menschen to äten haben.  See hauden aul ea jeseenen woo Jesus deed äwa 5,000 Menschen äten jäwen von sea weinich, en Kapitel 6:30-44, un oba daut es soo aus wan de Jinja hauden gaunz doavon vejäten.  Woo kjemt daut?  Eena wudd jleewen see wudden daut kloa haben em Denkj jehoolen, wiels daut soon groota Wunda wia aus daut wort.
           Wan wie opp aundre Städen enne Schreft läsen woa wie en daut Menschen haben dän Trubbel daut see leicht waut vejäten.  Em Oolen Testament läs wie foaken von woo de Israeliten hauden Gott vejäten, un randen aundre Jetta hinjaraun, un woo Gott an dan must strofen toom daut see wada trigj no am kjeemen.  En daut Buak 5 Mose, woarnt Moses de Menschen äwa un äwa toom nich Gott vejäten, ooda de Wunda waut hee haft jedonen, daut see nich brucken jestroft woaren.  5 Mose 8:19 sajcht, "Vejät däm Harn junen Gott nienich, un got nienich no aundre Jetta, om dee to deenen un auntobäden.  Wan jie daut wudden, daut kaun ekj junt vondoag secha sajen, dan woa jie omjebrocht woaren."
          Met ons, krakjt soo aus met de Jinja, es doa ne Mäajlichkjeit daut wie woaren vejäten waut Gott aul fa ons jedonen haft.  Wie denkjen nich aun aul de Säajnungen dee wie haben, ooda woo hee ons aul jeleit haft, un dan woa wie ojjeduldich un vedrislich un daut Läwen fangt aun schlajcht to gonen.  Oba, wan wie daut trigj no Gott jäwen, dreit hee daut Bilt om, un moakt wada waut goodet doavon.  Well wie emma wada ons Beskje no Jesus jäwen, daut wie nich vejäten waut hee jedonen haft.  Wie kjenn seenen woo Truhoatich un Leeftolich Gott es wan wie trigj kjikjen no aul daut waut hee verhäa jedonen haft; well wie dan uk jleewen daut hee daut noch eemol woat doonen!  Wie haben nu twee mol jeläst von woo Jesus de Menschen aules jeef waut an fäld.  Dis selwja Jesus jeef ons aules waut ons fält toom seelich woaren, derch sienen Doot aum Kjriez, un sienen oppstonen vom Grauf.  Hee jeft ons väl mea aus blooss Broot un Fesch toom äten; hee jeft ons eewjet Läwen!  Well wie aun am jleewen un nich vejäten, waut hee fa ons haft jedonen.  Krakjt soo aus Jesus daut jaumad äwa de Menschen vondoag, haft hee een Jaumahoat fa dee waut no am komen.  Wan du no am kjemst, un satst dienen Gloowen aun am, kaust du weeten daut hee die woat eewjet Läwen jäwen, wiels hee es Truhoatich.