De Markus Breef, Numma 39

Toom Läsen:  Markus 8:11-21
         "De Farisäa kjeemen un fungen aun, am Froagen to stalen.  Om am to vesieekjen, fruagen see am no een Tieekjen vom Himmel.  Un deep bewäacht, säd hee:  Wuarom sieekjt dise Jennerazion no een Wundatieekjen?  Ekj saj junt de Woarheit:  Dee woat kjeen Tieekjen jejäft woaren.
              Dan veleet hee an, stieech trigj en de Lomm un fua äwa no de aundre Sied.
          De Jinja hauden vejäten, Broot mettobrinjen, buta een Broot daut see en de Lomm hauden.  Jesus woarnd an väasechtich to sennen, un säd see sullen sikj fa de Farisäa un Herodes äare Häw heeden.  See räden doavon unjarenaunda un säden:  Daut es, wiels wie nich Broot metjenomen haben.
            Jesus wist von waut see sikj unjahilden un säd:  Wuarom räd jie doavon, daut jie nich Broot haben?  Kjenn jie noch nich seenen ooda vestonen?  Sent june Hoaten noch soo veschloten?  Jie haben Uagen, un seenen nich; jie haben Uaren, un hieren nich.  Un denkj jie nich doaraun, aus ekj fa 5,000 Maun fief Bulkjes bruak, wooväl Kjarw voll Brocken jie doa oppjehowen?
             See säden:  12.
         Un aus ekj de säwen Bulkjes fa de 4,000 bruak, wooväl Kjarw voll Brocken laus jie toop?
             See säden:  Säwen.
             Hee säd to an:  Woo kjemt daut, daut jie nuscht vestonen?"
 
 
          Vondoag see wie toom aunfangen wada daut de Farisäa kjeemen Jesus entjäajen toom am vesieekjen.  See fruagen am no een Tieekjen vom Himmel, oba Jesus wist goot daut see wieren nich wellens toom dän Wunda jleewen.  De Farisäa wieren nich wellens aun Jesus to jleewen, mol rajcht wan hee aul väle Wunda jedonen haud; noch een Wunda doonen wudd kjeen Unjascheet moaken.
         Hia es uk eene deepre Lia bennen, wiels dit es noch emma soo vondoag.  Ekj hab foaken jehieet Menschen sajen, "Ekj wensch Gott wudd mau een Wunda doonen daut wie daut kunn neiw weeten daut hee läft un daut ekj kunn aun am jleewen."  Soo aus dit denkjen es gaunz orrajcht, wiels dit es nich woo Menschen sent jesonnen.  Wie jleewen foaken daut wan wie waut seenen, daut daut moakt daut leichta toom doaraun jleewen, oba daut es nich werkjlich woo daut schauft.
          Dit es woo daut schauft.  Gloowen kjemt von een Mensch sienen Hoat.  De Farisäa hauden aul väle Wunda jeseenen, un see hauden Jesus aul foaken hieet räden, un see wullen oba emma noch een Wunda, un noch eene Auntwuat, un daut wia niemols jenuach.  Menschen doonen nich jleewen blooss wiels see haben Wunda jeseenen.  Dit es wuarom Jesus nich een Wunda deit fa an; hee weet aul daut et woat nuscht halpen.  Menschen motten jleewen ut an selfst.  Foaken wan wie waut seenen, daut halpt ons dan bat doa komen wua wie dan jleewen kjennen, oba de Wunda selfst woat ons nich moaken jleewen.  Wan een Mensch nich well jleewen, dan woat hee nich jleewen, eendoont wan hee een Wunda sitt ooda nich.
             Kjikjt emol no de Jinja.  See hauden uk aul väle Wunda jeseenen, un oba ea see irjent een Wunda sagen deeden see aun Jesus jleewen un am uk nofoljen.  Äa Gloowen wia schwak, oba see hauden doawäajen een Gloowen.  De Wunda wieren een Tieekjen fa an daut äa Gloowen wudd stoakja woaren.  Dit es wuarom Jesus an must denkjen halpen wäajen de Wunda waut hee aul jedonen haud.  Ekj jleew dit es uk de Uasoak wuarom Jesus an woarnt wäajen de Farisäa äare Häw.  De Farisäa wieren nich werkjlich intressieet en noch een Wunda seenen; see sochten no een Wajch toom Jesus beschuljen.  Jesus woarnt de Jinja daut see sellen opp paussen, daut see nich soo doonen aus de Farisäa doonen.  De Farisäa äare Häw es, ekj jleew, een Bilt von Ongloowen.  De Farisäa wieren soo jäajen Jesus jestalt, daut eendoont woo sea hee beweess, daut hee Gott sien Sän wia, see wullen nich aun am jleewen.
            De Froag vondoag, wua wie motten aun denkjen, es auf wie Gloowen haben ooda nich.  De Farisäa äare Häw es de Ongloowen waut kjemt von selfst-jerajcht sennen.  See dochten sea huach von an selfst, un wiels Jesus jäajen äare selfst-Jerajchtichkjeit räd, kunnen see am nich lieden.  De Jinja oba, hauden Gloowen, un daut es wuarom Jesus an soo lieed aus hee deed.  Jesus deed Wunda toom wiesen wäa hee es, un uk toom dän Gloowen en Menschen stoakj moaken, oba wan eena kjeen Gloowen haft, dan woaren Wunda daut nich endren.  Dit es de Unjascheet tweschen de Farisäa un de Jinja.  De Jinja äa Gloowen wia schwak un kjlien, oba see hauden doawäajen Gloowen, wan Jesus an uk must noch mol denkjen halpen.  Soo sellen wie uk sennen.  Well wie nich soo sennen aus de Farisäa waut wullen Jesus eegol proowen, oba leewa Gloowen haben.  Well wie uk em Denkj hoolen waut Gott aul fa ons haft jedonen, daut dolste, daut Jesus kjeem toom onse Sinden wajch nämen.  Daut es daut jratste Wunda waut hee fa ons haft jedonen, un well wie daut nich vejäten.