De Markus Breef, Numma 40

Toom Läsen:  Markus 8:22-30
          "See kjeemen no Betsaida.  Eenje Menschen brochten eenen blinjen Maun no am un bedden am dän auntoschieren.  Un hee foot dän blinjen aun de Haunt un leid am ut de Staut rut.  Un aus hee am ieescht en de Uagen jespäajen un de Henj oppjelajcht haud, fruach hee am auf hee irjentwaut seenen kunn.  Un hee kjikjt opp un säd:  Ekj see Menschen, oba dee sitt daut soo, aus wan Beem romgonen.
          Jesus läd am noch eemol de Henj opp de Uagen.  Dan jinjen am de Uagen op un hee kunn wada aules kloa seenen.  Dan schekjt Jesus am no Hus un säd, hee sull nich en de Staut nenn gonen un sull daut uk kjeenem sajen.
            Dan jinkj Jesus met siene Jinja no de Darpa, runt om Cäsarea Filippi.  Un hinjawäajes fruach hee siene Jinja:  Wäa sajen de Menschen, daut ekj sie?
        See säden:  Johanes de Deepa; oba eenje sajen, Elia; un aundre sajen, eena von de Profeeten.
            Hee säd to an:  Oba wäa saj jie, daut ekj sie?
            Petrus auntwuad un säd to am:  Du best de Christus!
            Jesus befool an strenj, daut kjeenem to sajen."
 
 
         Vondoag see wie noch eemol woo Jesus haud Krauft toom Menschen heelen, un uk wada woo, wan Menschen am fruagen toom an heelen, deed hee daut gaunz friewellich fa an doonen.  Wie seenen uk daut Jesus wia nich Ieajiezich, un hee wia nich besorcht met am selfst ieren ver de Menschen.  Hee wia gaunz deemootich un hanjejäft, un deend de Menschen romm am.  Es dit nich wundascheen?  De Heilant von de Welt, de aulmajchtja Gott, wia selfst deemootich jenuach toom een Deena sennen to de Menschen romm am.  Woo väl dolla sullen wie dan nich aus Kjristen de Menschen romm ons deenen, soo aus Jesus deed?
       Soo aus Jesus deed disen Maun siene fiesische Uagen op moaken, moakt hee uk Menschen äare jeistliche Uagen op.  Oba, krakjt soo aus met dis blinja Maun, passieet daut nich emma aules opp eemol.  Noch mol mott wie een Poa mol no Jesus gonen, ea onse Uagen op gonen.  Wie seenen dit met woo de Jinja Jesus siene Froag deeden auntwuaten.  Wan Menschen Tiet neemen toom met Jesus sennen, worden äare jeistliche Uagen sachelkjes op jemoakt, bat see ieescht bat doa wieren daut see jleewen kunnen daut Jesus werkjlich Gott sien Heilja wia.
            De Jinja wieren aul een Stoot lank met Jesus toop jewast, un wuaemma hee han jinkj, jinjen see uk han.  See hieeden am lieren, un see sagen de Wunda waut hee deed.  Wiels see väl met am toop wieren, wieren äare Uagen een bätje wieda op aus de aundre Menschen äare wieren.  Dit es wuarom, wan Jesus an frajcht wäa de Menschen sajen daut hee es, sajen see, daut de Menschen jleewen hee es een Profeet, ooda Johanes de Deepa, ooda Elia, un soo wieda.  Oba wan Jesus de Jinja frajcht, sajcht Petrus, "Du best de Christus!"  en Varsch 29.  Petrus siene Uagen wieren wieda op aus de Menschen äare, un daut es wuarom hee de Woarheit soo kloa wist.  De Jinja hauden noch nich een Vestentnis von waut daut meend de Christus to sennen, oba see wisten weens daut Jesus de Christus wia.
            Dit es woo daut uk schauft met ons.  Ea wie Jesus kjanen, sent onse Uagen gaunz too, un wie sent jeistlich Blint.  Dan, wan wie Gloowen haben, woaren onse Uagen op jemoakt, un dan fangen wie aun mea von Jesus to vestonen, oba wie kjenn dan noch foaken nich kloa seenen.  Wie motten bie Jesus bliewen toom daut onse Uagen gaunz op jemoakt woaren.  Je lenja wie met Jesus toop gonen, je mea kjennen wie seenen, un vestonen.  Je mea wie Gott sien Wuat studieren, je mea woa wie doavon lieren.  Wie motten em Gloowen bie Jesus bliewen wan wie wellen onse jeistliche Uagen op haben.
         Wie haben vondoag veleicht uk noch eene Froag.  Wuarom säd Jesus siene Jinja un dän blinjen Maun daut see kjeenem sajen sullen, waut see nu wisten?  Jesus säd dän blinjen Maun, waut nu seenen kunn, daut hee sull kjeenem daut sajen waut no am jeworden wia, un hee säd uk to siene Jinja daut see sullen kjeenem sajen daut hee de Christus wia.  Wuarom wudd hee dit sajen?
          Hee säd dit wiels daut wia noch nich Tiet fa am toom stoawen un oppjehowen woaren.  Hee haud noch väl waut hee siene Jinja must lieren, un hee kunn an nich lieren wan doa emma Menschen runt om wieren.  Jesus kjeem toom de Sindenschult betolen, soo daut aul dee wäa doa jleewen kjenn seelich woaren, un dit wia noch nich jeworden.  Näakjstet mol see wie woo Jesus deit aun fangen toom siene Jinja lieren von waut hee noch mott doonen, un woo see daut nich woaren vestonen.  Fa ons, es daut wichtich, daut wie nich stell sennen äwa waut Jesus haft jedonen, wiels daut es foadich.  Nu es daut onse Oppgow, aus Kjristen, toom aulemaun daut sajen, waut Jesus haft fa ons aula jedonen.