De Markus Breef, Numma 42

Toom Läsen:  Markus 9:1-10
           "Un hee säd to an:  Ekj saj junt de Woarheit:  Hia stonen eenje, dee dän Doot nich derchmoaken woaren, bat see daut Gottesrikj haben seenen en Krauft komen.
            Om sas Doag neem Jesus Petrus, Jakobus un Johanes met sikj opp eenen huagen Boajch nopp, wua see auleen wieren, un doa ver an wort hee met eemol vewaundelt.  Siene Kjleeda worden witta aus Schnee, soo witt, aus dee kjeen Wauscha opp de Ieed moaken kaun.  Dan kjeem Elia met Moses doahan, un see unjahilden sikj met Jesus.  Petrus säd to Jesus:  Har, daut es goot daut wie hia sent.  Well wie hia dree Booden oppstalen, eene fa die, eene fa Moses un eene fa Elia.
            Hee enjst sikj soo, daut hee nich wist, waut hee sajen sull.  Dan kjeem eene Wolkj äwa an, soo daut see em Schauten wieren.  Un ut de Wolkj säd eene Stemm to an:  Dit es mien leewa Sän; doot waut hee sajcht!
              See kjikjten sikj fuaz om, oba sagen sest kjeenem mea bie an aus blooss Jesus.  Aus see vom Boajch rauf kjeemen, befool hee an, daut kjeenem to sajen, waut see jeseenen hauden, bat de Menschensän wudd vom Doot oppjestonen sennen.  Soo hilden see daut fa sikj selfst un fruagen sikj unjarenaunda, waut vom Doot oppstonen meenen kunn."
 
 
 
            Waut wie hia vondoag läsen es een wundaboaret Väabilt von waut wie aus Kjristen woaren seenen wan wie ieescht em Himmel sennen bie Jesus.  Dise dree Jinja, Petrus, Jakobus un Johanes wieren besondasch utjewält toom Jesus siene Harlichkjeit seenen, un een Dach, wan Jesus ieescht trigj kjemt, woaren aul dee dee aun am jleewen am soo aus dit seenen.  Aule Kjristen woaren Jesus seenen veharlicht woaren ver de gaunze Welt!  Dise Jeschicht vondoag moakt mie denkjen aun eene aundre Schreftstäd, en 1 Johanes 3:2, "Leewe Frind, wie sent nu aul Gott siene Kjinja.  Daut es oba noch nich verendach jekomen waut wie nohäa sennen woaren.  Wie weeten oba, wan hee komen woat, dan woa wie soo sennen, aus hee es, un wie woaren am soo seenen, aus hee es."
         Petrus, Jakobus un Johanes hauden Jeläajenheit toom Jesus seenen soo aus hee werkjlich es.  Dit wia toom besondasch bewiesen daut hee Gott sien Sän es, nich blooss een Profeet, oba werkjlich Gott sien Sän.  Nich blooss daut, dit bewiest uk daut Jesus es äwa Moses un Elia.  Moses es de Profeet derch wäm Gott sikj bekaunt muak to de Israeliten, un derch wäm hee de Israeliten frie muak von Ägipten.  Hee schreef uk de ieeschte fief Bieekja en de Bibel.  Daut Jesaz aun waut de Juden sikj fa dusende Joa aul haben faust jehoolen, kjeem von Moses.  Elia es fa de Juden uk een sea besondra Profeet, wiels hee deed derch Gott sien Jeist väle groote Wunda doonen, un hee deed niemols stoawen.  Gott neem am fiesisch nopp no Himmel en een Wint Kjriesel.  Beid von dise Menschen sent huach beaumt mank de Juden.
             Daut moakt waut wie hia läsen noch soo väl wichtja.  Gott rät met eene lude Stemm von eene Wolkj un sajcht, "Dit es mien leewa Sän; doot waut hee sajcht!" en Varsch 7.  Moses un Elia stonen doa ver de Jinja, un Gott sajcht daut see sellen Jesus horchen.  Doa jeit nich kloara uttospräakjen aus dit.  Jesus es Gott sien Sän, un es von Gott jekomen.  Hee es äwa Moses un Elia, un äwa aules, waut Gott haft jemoakt.  En Filippa 2:9-11 sajcht daut, "Doawäajen haft Gott am uk huach jehowen un am eenen Nomen jejäft, dee äwa aule Nomes steit.  Em Nomen von Jesus sellen sikj aule Kjneeen em Himmel un opp de Ieed un unja de Ieed bieejen.  Un aule Tungen sellen to Gott siene Iea bekjanen, daut Jesus Christus Har es."  Dit sent wundavolle Wieed.  Jesus Christus es werkjlich Har!  Wan hee Har es, dan haft hee uk Krauft, toom aules doonen waut hee sajcht daut hee woat doonen.  Wie kjenn ons doamet treesten.
           En daut ieeschte Varsch waut wie vondoag lausen sajcht Jesus, daut hia stonen eenje, dee nich woaren stoawen bat see daut Gottesrikj haben jeseenen en Krauft komen.  Waut meent dit soorajcht?
             Jesus rät hia ieeschtens von de Jinja, un woo see woaren am seenen stoawen, un dan wada vom Doot oppstonen.  Dit es wuarom hee lota to Petrus, Jakobus un Johanes sajcht daut see sellen kjeenem sajen waut see jeseenen un jehieet haben, bat hee vom Doot oppjestonen haft, en Varsch 9.  Hee rät oba uk von lota, wan hee ieescht trigj no Himmel foat, un hee sien Jeist schekjt.  Wan de Jeist ieescht kjemt, kjrieen de Jinja, un aul Jesus siene nofolja, Krauft vom Himmel, toom daut Gottesrikj buen un Jesus sien Nomen bekaunt moaken äwa de gaunze Welt.  Dit kjenn wie läsen en Aposteljeschicht.  Ieescht woaren de Jinja siene Krauft seenen, met woo hee vom Doot oppstonen woat, un dan woaren see de Krauft uk kjrieen derch de Heilje Jeist.
             Un hia es dan noch een Dinkj waut mie Moot jeft von de Schreft.  Petrus rät hia von Dinja waut hee nich vesteit, un noch mol sent wie soo aus Petrus.  De Schreft sajcht daut hee wist nich waut hee sajen sull, wiels hee enjst sikj soo sea!  Mie freit daut, daut Petrus uk blooss een jeweenelja Mensch wia.  De Jinja wieren aula blooss jeweenelje Menschen, un Jesus brukt an toom väl goodet doonen.  Hee kaun ons uk brucken, wan wie uk blooss jeweenelje Menschen sennen, wiels hee jeft ons siene Krauft derch sien Jeist.
            Dise Jeschicht vondoag es uk, soo aus ekj ieescht aul säd, een Väabilt von woo de Himmel woat sennen.  Wan wie Kjristen sent, dan kjenn wie weeten, daut wie woaren een Dach met Jesus toop sennen wua hee es, un wie woaren am seenen soo aus hee es.  Wie woaren am en aul siene Harlichkjeit seenen, un hee woat aule Tronen von onse Uagen weschen, soo aus daut sajcht en Openboarunk 21:4.  Woat daut nich wundascheen sennen?  Ekj kaun noch mol meist nich luaren bat dan.  Oba dän Tiet waut wie luaren, well wie truhoatich am deenen, un fa am läwen opp Ieed, bat Jesus wada kjemt.