De Markus Breef, Numma 43

Toom Läsen:  Markus 9:11-13
           "Un see fruagen am:  Wuarom sajen de Schreftjelieede, daut Elia ieescht komen mott?
               Jesus säd:  Elia kjemt ieescht, wada aules häatostalen.  Un wuarom steit dan noch jeschräwen, daut de Menschensän mott väl lieden un veschmäten woaren?
                Oba ekj saj junt:  Elia es aul jekomen, un see deeden met am, jrod waut see wullen, soo aus von am jeschräwen steit."
 
 
             Wie komen vondoag bat eene Schreftstäd waut fa mie kaun schwoa sennen toom vestonen.  Noch mol, wan wie enne Bibel läsen, komen wie bat ne Aufschnet waut blooss nich gaunz senn moakt.  Dan es daut Weis toom aundre Varzhen finjen, waut von daut Teema räden, un daut Wuat brucken toom daut Wuat kloa moaken.  Wie motten de gaunze Bibel em betracht nämen, nich blooss een kjlienet Poat doavon.
          Dit es fa mie een von soone Schreftstäda.  Wan wie blooss dit läsen, kaun daut schwoa sennen toom vestonen, waut Jesus hia meent, un waut daut bediet daut Elia must noch eemol komen.  Oba dise Jeschicht es uk aundatswäajen jeschräwen enne Schreft, en Matäus 17:10-13, un daut sajcht doa soo aus dit:
               "Dan fruagen de Jinja am:  Wuarom sajen de Schreftjelieede dan, daut Elia ieescht komen mott?
               Jesus auntwuad un säd to an:  Daut es soo daut Elia ieescht komen mott un aules trajchtstalen.  Oba ekj saj junt:  Elia es aul hia jewast, blooss see haben am nich aunerkjant un deeden met am krakjt waut see          wullen.  Un de Menschensän woat jrod soo derch an lieden motten.
                 Dan vestunden de Jinja, daut hee von Johanes de Deepa räd."
Dit sajcht ons hia daut Jesus räd nich werkjlich von Elia, oba von Johanes de Deepa.  Gott haud Johanes de Deepa jeroopt un jeschekjt, daut Gottesrikj to prädjen, un bekaunt to moaken daut Jesus wudd komen.  Oba von wua kjrieejen de Jinja un de Schreftjelieede dise Iedee äwahaupt, daut Elia komen must?
                Toom dit weeten mott wie no de Oole Testament dreien.  Wie läsen en Maleachi 3:23 waut Gott sajcht to Israel derch sienen Profeet:  "Horcht emol, ekj woa junt däm Profeet Elia schekjen, un daut ea däm Harn sienen grooten un schrakjeljen Dach kjemt."  Dit sajcht hia daut ea de Messias wudd komen, wudd Gott Elia schekjen, un Jesus sajcht daut Elia kjemt aules wada häatostalen.  Dan sajcht hee daut Elia es jekomen, un de Jinja woaren en daut hee rät von Johanes de Deepa.
               Woo schauft dit?  Ekj jleew dit haft to doonen met waut een Profeet siene Oabeit es.  Een Profeet siene Oabeit es emma toom Menschen trigj dreien no Gott.  Hee sajcht de Menschheit waut Gott haft jesajcht, un woarnt an waut woat woaren wan see nich horchen.  Jieda Profeet em Oolen Testament deed dit, un fa de Juden, es Elia aunjeseenen aus äa dolsta berumda Profeet, wiels hee storf nich, oba wort läwendich en een Wint Kjriesel no Himmel jebrocht.  Dit meent dan, daut wan Gott sajcht hee woat Elia schekjen, daut hee meent daut hee woat een huach berumda Profeet schekjen waut sien Wuat woat gaunz frie un openboa bekaunt moaken to de Menschheit.  Wan wie no Johanes de Deepa kjikjen, deed hee krakjt daut.  Johanes deed krakjt dee Oabeit waut Elia deed, met Gott sien Wuat bekaunt moaken.
           Doa sent noch aundre Städen en de Bibel waut von Johanes de Deepa räden.  En Jesaja 40:3 steit jeschräwen, "Doa schricht eene Stemm:  Moakt eenen Stich enne Wiltnis fa däm Harn; moakt eenen jlikjen Wajch enne Wiltnis fa onsen Gott!"  Dit es waut Johanes de Deepa von sikj selfst säd aus de Menschen am fruagen wäa hee wia.  Wie läsen de Jeschicht en Johanes 1:22-23, wua daut sajcht, "Dan säden see to am:  Wäa best du?, daut wie dee eene Auntwuat jäwen kjennen, dee ons jeschekjt haben.  Waut sajchst du von die selfst?  Hee säd:  "Ekj sie eenem siene Stemm, dee en de Wiltnis schricht:  Moakt däm Harn sien Wajch jlikj!", soo aus de Profeet Jesaja jesajcht haft."
                Waut meent daut dan, daut Elia must aules häastalen ea Jesus kjeem?  Johanes de Deepa kjeem eefoch toom een Stich reed moaken fa Jesus.  Hee kjeem ea, Gott sien Rikj bekaunt to moaken, daut wan Jesus ieescht kjeem wudden de Menschen am kjennen aunnämen.  Hee kjeem uk Menschen äare Hoaten reed moaken, daut see daut wudden seenen kjennen, daut Gott sien Rikj es nich een Rikj soo aus wie doaraun jleewen, oba leewa een Rikj von daut Hoat.  Daut es een Jeistlicha Rikj, wua wie Jesus aunbäden aus Har un Gott.
               Oba doa es uk een diera Pries toom en Gott sien Rikj nenn komen.  Wie motten ons läwen gaunz hanjäwen un oppjäwen, un nich mea fa ons selfst läwen.  Johanes de Deepa wort doot jemoakt wiels hee räd de Woarheit, un de Menschen wullen daut nich toostonen.  Krakjt soo, Jesus must uk väl lieden un wort uk doot jemoakt toom daut Gottesrikj brinjen.  Wan wie am nofoljen, dan woaren wie uk veleicht motten ons läwen soo oppjäwen.  Oba, wie haben doawäajen Hopninj, wiels soo aus Jesus opp stunt vom Doot, soo woaren wie uk oppstonen vom Doot.  Dan woaren wie fa emma läwen met Jesus en sien Rikj.