De Markus Breef, Numma 46

Toom Läsen:  Markus 9:30-37
            "See veleeten doa dan un jinjen derch Galiläa.  Jesus wull nich haben, daut irjentwäa wist wua see wieren.  Hee lieed siene Jinja un säd:  De Menschensän woat de Menschen en de Henj jejäft woaren.  Dee woaren am doot moaken; oba om dree Doag woat hee oppstonen.
              Oba see vestunden nich waut hee meend un ferchten sikj, am to froagen.
            Dan kjeemen see no Kapernaum.  Un aus see ieescht em Hus bennen wieren, fruach hee an:  Wuaräwa streed jie junt hinjawäajes?
            See oba wieren stell; wiels see hauden sikj hinjawäajes doaräwa jesträden, wäa von an de jratsta wia.  Jesus sad sikj dol un roopt de Twalw un säd:  Wäa de jratsta sennen well, mott sikj selfst aus dän jerinjsten stalen un aulemauns Deena sennen.
           Dan neem hee een kjlienet Kjint un stald daut medden mank an.  Un aus hee daut opp däm Oarm neem, säd hee to an:  Wäa eent von dise kjliene Kjinja en mienen Nomen oppnemt, nemt mie opp; un wäa mie oppnemt, nemt nich mie opp, oba dän, dee mie jeschekjt haft."
 
 
            Vondoag see wie wada daut de School es nich emma leicht.  Daut es krakjt soo woa fa ons vondoagschen Dach aus fa de Jinja don to dee Tiet.  Jesus neem urzhent Tiet toom auleen met de Jinja sennen un an lieren, oba see hauden ne schwoare Tiet vestonen waut hee meend.  Daut es uk woo wie aus Menschen noch mol sennen.
            Jesus deed nich blooss lieren derch waut hee säd, oba uk derch waut hee deed.  Siene Wieed un siene Woakjen stemden emma toop, un hee brukt aule beid toom de Jinja halpen vestonen woo daut met de Himmelrikj steit.  De Trubbel waut de Jinja hauden, es noch krakjt de Trubbel waut wie haben, un daut es daut wie sent fiesisch jesonnen.  Wie denkjen äwa waut wie kjenn seenen un hieren un aunschieren, oba nich onbedinjt von jeistliche Sachen.  Wan wie daut nich seenen kjennen, ooda aunschieren kjennen, dan es daut schwoa fa ons toom vestonen.
            Dit es waut wie seenen vondoag wan wie en dise Schreftstäd läsen.  Jesus erkjläad soo kloa aus hee kunn too de Jinja, daut hee wudd stoawen un om dree Doag lota wada oppstonen, oba äare Uaren kunnen daut nich bejriepen.  See hauden sea wienich vestentnis äwa soone Sachen, wiels see wieren väl dolla besorjcht om fiesische Dinja.  See wieren väl dolla besorjcht om wäa von an de jratsta wia, aus waut Jesus wudd motten lieden daut hee ons aula kunn raden.  Gott selfst stunt bie an un lieed an, un see dochten aun sikj selfst leewa.  Soo sent wie uk!  Wie sent noch krakjt soo blint aus see wieren!  Daut fält daut Gott onse Uagen op moakt daut wie seenen kjennen, waut werkjlich wichtich es.  Dit es krakjt wuarom Jesus soo väl Tiet neem toom de Jinja lieren.
            Aus Jesus an daut haud vetalt, waut met am sull woaren, jinjen dee no eene aundre Städ, un hinjawäajes bewiesen de Jinja daut see haben daut nich bejräpen waut hee an proowd to lieren.  Dan, wiels see daut nich met äare Uaren vestunden, weess hee an waut hee meend.  Hee erkjläad to an daut en daut Gottesrikj, dee wäa sikj too een Deena moakt es groot.  Jesus es Gott selfst, un hee stunt mank an un lieed an woo toom een Deena sennen.
            Toom wiesen waut hee meend, neem hee een kjlienen Kjint oppem Oarm, un vetald de Jinja daut see musten sikj soo deemootjen, aus toom kjliene Kjinja aunnämen un bedeenen, wiels doaderch bewiesen see äare Leew fa Jesus selfst.  Wiels wan wie een Kjint oppnämen, dan nämen wie Jesus selfst opp, un uk de Voda, dee Jesus jeschekjt haft.  Wie bewiesen onse Leew fa Jesus met woo wie aundre doonen Leew bewiesen.  Wiels woon aundra Wajch es doa toom onse Leew fa Gott bewiesen?  Doa es kjeent.  Jesus sajcht en Matäus 22:37-40, “‘Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul deine Jedanken‘.  Dit es daut jratste un ieeschte Jeboot.  Un daut tweede es met dit jlikj:  ‘Du saust dienen Noba jrod soo goot sennen aus die selfst‘.  Opp dise beid Jebooten henjt daut gaunze Jesaz un uk de Profeeten.“  Dise Varzh sajen ons waut daut wichtichste Jeboot es un uk woo toom daut ut läwen.  Wan wie nich Leew haben fa Menschen, woo kjennen wie dan sajen daut wie Leew haben fa Gott?  Wie wiesen onse Leew fa Gott met woo wie aundre Menschen oppnämen.
            Dit es uk waut Jesus bewees met sien Läwen.  Hee muak sikj gaunz jerinj, un storf aum Kjriez fa die un fa mie, daut onse Sindenschult kunn aufjelascht woaren.  Hee muak sikj aus dän jerinjsten Deena, un noom onse Strof opp sikj selfst.  Dit es waut hee to de Jinja ekjläad vondoag en de ieescht Varzh waut wie deeden läsen.  See kunnen siene Wieed nich vestonen, un doawäajen bewees hee daut met een Kjint oppnämen.  Well wie vesieekjen soo to läwen aus Jesus deed, un onse Leew fa Gott bewiesen met woo wie de Menschen romm ons doonen oppnämen.