De Markus Breef, Numma 48

​Toom Läsen:  Markus 9:42-50
 
            “Un wäa eent von dise kjliene, dee aun mie jleewen, eene Uasoak jeft to faulen, fa däm wia daut bäta, daut am een Molsteen aum Jenekj jehongen un em Mäa jeschmäten wort.  Un wan diene Haunt die veuasoakt to sindjen, hak dee auf!  Daut es fa die bäta, wan du en dit Läwen mau eene Haunt hast, aus beid Henj to haben un en de Hal to komen, wua daut Fia niemols utjeit, (wua äare Warm nich dootgonen un daut Fia nich utjeit).  Un wan dien Foot die veuasoakt to sindjen, hak dän auf!  Daut es fa die bäta, wan du lom derch dit Läwen jeist, aus beid Feet to haben un en de Hal jeschmäten to woaren, en daut Fia niemols utjeit, (wua äare Warm nich dootgonen un daut Fia niemols utjeit).  Un wan dien Uag die veuasoakt to sindjen, riet daut ut!  Daut es bäta fa die met een Uag en daut Gottesrikj to komen, aus twee Uagen to haben un en daut Halenfia jeschmäten to woaren, wua äare Warm nich dootgonen un daut Fia nich utjeit.
            Wie motten aula met Fia jesolten woaren.  (Un aule Opfa woaren met Solt jesolten).  Solt es goot; oba wan daut Solt ieescht nich mea soltich es, wuamet jeit daut wada soltich to moaken?  Habt Solt en junt selfst un hoolt Fräd unjarenaunda!“
 
 
            Waut wie hia vondoag läsen wiest ons vondoag woo oajch daut es met Sind, un woo schlajcht Gott kaun de Sind lieden.  Gott kaun Sind nich vedroagen, wiels Sind es aules waut jäajen Gott sien Karakta es.  Sind es de Uasoak wuarom Jesus kjeem ons to raden.  Wie wieren aula Sinda, un onen daut Jesus sikj selfst opfad fa ons kunn wie niemols Jemeenschoft haben met Gott.
            Daut ieeschte Dinkj waut wie vondoag seenen es daut Kjinja, un doch aul dee waut aun Jesus jleewen, sent am sea wichtich.  Oba besondasch Kjinja, wiels see sent oschuldich, un an jeit leicht irjent waut to beräden.  Doawäajen mott wie besondasch opp paussen, daut wie an nich Uasoak jäwen toom auf faulen.  Jesus sajcht daut wäaemma een Kjint soo aus dit Uasoak jeft to faulen, fa däm wia daut bäta daut hee em Mäa vesoop met een Molsteen romm Jenekj jehongen.  Daut es bie Gott sea wichtich daut wie ons met Kjinja rajcht behaundlen.  See sent oschuldich, un wäaemma een Kjint misbrukt ooda schlajcht behaundelt woat jerejcht woaren von Gott, un daut woat schrakjlich sennen.
            Jesus siene Wieed haben nich bloos to doonen, met woo wie Kjinja fiesisch behaundlen, oba uk met waut wie an lieren.  Wie motten uk secha moaken daut wie de Kjinja daut lieren waut Gott jefelt, un an lieren von waut Jesus fa ons aula haft jedonen.  Wie motten dit uk sea iernstlich nämen.  Daut es krakjt soo mäajlich toom een Kjint moaken auf faulen derch Lia aus derch schlajcht behaundlen; well wie dan opp paussen daut wie daut rajchte doonen bie an. 
            Wie kjennen uk eene Leksion nämen von dit en woo wie aundre Kjristen behaundlen.  Wan een Mensch jrod to Gloowen en Jesus jekomen es, es dän Mensch soo aus een kjlienet Bäbe em Jeist.  Wie waussen em jeistlichen krakjt soo aus wie em fiesischen doonen.  Ieescht sent wie kjlien, un wie waussen sachakjes jrata.  Well wie dan uk opp paussen woo wie Kjristen behaundlen, waut noch gaunz nie em Gloowen sent.  Wie sellen emma opp paussen, jo, oba daut es besondasch wichtich fa niee Kjristen, wiels äa Gloowen es noch gaunz kjlien un schwak.  Dise niee Kjristen fält uk met Leew un Wiesheit to lieren, woo daut Kjristen Läwen ut to läwen.  Un well wie an nich beleidjen un faulsch lieren, oba daut lieren waut enne Schreft jeschräwen steit, daut see een fausten Gloowen aun Jesus kjrieen.
            Dan jeft Jesus ons ne Sautz Bilda, von woo schlajcht de Sind es, un uk woo schrakjlich de Hall es.  Hee sajcht daut es bäta daut wie Lom sent ooda Blint en een Uag, un enne Himmel nenn komen, aus daut wie jesunt enne Hall nenn gonen.  Hee meent nich werkjlich daut wie ons nu sellen gonen de Beenen un de Henj auf haken, oba leewa daut wie sellen doa iernstlich aun denkjen, woo schlajcht Gott de Sind lieden kaun.  Wie sellen proowen soo to läwen, daut Gott daut jefelt, un daut kjenn wie bloos derch rajchten Gloowen doonen.  Wuaemma Sind en ons es, mott wie seenen daut fuat to doonen, un daut kjenn wie bloos wan wie Jemeenschoft haben met Gott.  Well wie iernstlich no ons selfst emma wada kjikjen, un de Sind auflajen waut en ons es.  Well wie doaraun denkjen, daut Jesus jeef sien Läwen han toom ons looss moaken von de Sind; woo kjenn wie dan wiede enne Sind läwen, wan wie siene nofolja sent?
            Un nu tolatst sajcht Jesus noch daut wie motten aula met Fia jesolten woaren, en Varsch 49.  Ekj jleew waut hee hia meent, es daut derch vesieekjungen gonen lia wie onse Sind auftolajen, un doaderch woa wie soltich.  Solt woat foaken jebrukt toom äten goot hoolen, un wan wie derch vesieekjungen derch komen bliewen wie uk goot, wiels de vesieekjungen brinjen äwadäl de Sinden waut wie motten oppriemen.  Well wie dan uk emma reed sennen, toom onse ieejne Sinden auflajen, un uk toom Jnod schenkjen aun aundre, daut wie aula toop kjennen oppjebut woaren.