De Markus Breef, Numma 5

​Toom Läsen:  Markus 1:29-34
            "Sooboolt aus see de Judenschool veleeten, jinjen Jesus, Jakobus un Johanes met Simon un Andreas met no äare Woninj.  Un see säden Jesus daut, daut Simon siene Schwieemutta krank em Bad wia, un Feeba haud.  Hee jinkj han, foot ar aun de Haunt un holp ar opp.  Daut Feeba veleet ar un see funk aun an to bedeenen.
            Aus daut dan zeowes ieescht de Sonn unja wia, worden aulahaunt kranke un besätne no Jesus jebrocht.  De gaunze Staut saumeld sikj ver de Däa.  Un Jesus heeld väl von äare veschiedne Krankheiten.  Hee dreef väl beese Jeista rut.  Hee leet de Jeista oba nich räden, wiels dee wisten wäa hee wia."
 
 
            Lats kjikjt wie no woo Jesus Macht haud äwa de beesa Jeist waut mank de Vesaumlunk wia en de Judenschool, aus Jesus deed doa lieren.  Wie kjikjten een bät no woo de Menschen sikj staunden äwa siene Lia, daut hee met Jewault prädjen deed, aundasch aus de Schreftjelieede.  Dit beweess daut Jesus wia Gott sien Sän, voll von Weisheit un Krauft.  Vondoag läs wie noch een bät wieda, un wie finjen daut Jesus haud uk Macht äwa Krankheit, soo daut hee Menschen heelen kunn.
            Jesus haud een velangen toom Menschen heelen, oba nich blooss von fiesische Krankheit; hee wull Menschen de Goode Norecht brinjen, daut see kunn frie sennen von äare Sinden.  Wie läsen daut aus Jesus daut enwort, daut Simon siene Schwieemutta krank em Bad wia, jinkj hee han un heeld ar.  Plazlich veleet äa Feeba, un see feeld sikj soo goot daut see funk aun an to bedeenen!  Jesus lieed met Jewault, un met Weisheit, un hee beweess uk siene Macht äwa beese Jeista un soogoa uk Krankheit!  De Menschen woaren sikj sea haben jewundat waut daut nu aules jeef.
            Ekj stal mie väa daut Menschen wieren daut enjeworden, daut hee Simon siene Schwieemutta haud jeheelt, wiels soo aus de Sonn unja jinkj, brochten Menschen äare Kranke doa no Jesus.  Daut sajcht de gaunze Staut saumeld sikj doa! (1:33).  Wiels Jesus Metleet haud fa de Menschen heeld hee an von äare veschiedne Krankheiten, un dreef väl beese Jeista rut.  Jesus haud een grootet Jaumahoat fa de Menschen.  Matäus 9:36 sajcht, "Un aus hee daut Volkj sach, jaumad am daut äwa an, wiels see wieren vejoacht un halplooss, soo aus Schop onen Hoad."  Jesus haud soone Leew fa Menschen daut et dreef am toom an heelen.
            Oba dit näakjste Poat es schwoa toom vestonen.  Daut sajcht, "Hee leet de Jeista oba nich räden, wiels dee wisten wäa hee wia," (Markus 1:34).  Ekj hab foaken mie jewundat äwa dit.  Wuarom wudd Jesus nich wellen haben daut de Menschen sullen weeten wäa hee wia?  Daut sajcht uk opp miere aundre Städen enne Schreft daut Jesus veboot Menschen un beese Jeista von aundre sajen wäa hee wia.  Hee kjeem doch toom Menschen frie moaken von Sind; wuarom sullen see dan stell sennen?
            Daut ieeschte Dinkj waut mie biefelt es daut Jesus wull haben daut Menschen sullen am aunnämen ut sikj selfst, nich blooss wiels see am sagen een Wunda doonen, ooda een beesa Jeist hieeden räden von am.  De beese Jeista wisten goot wäa hee wia, oba de Menschen sullen selfst doa äwa denkjen un een Entscheidunk moaken.  Menschen haben emma Trubbel met too sea aun fiesische Dinja denkjen; wan daut aulawäajen wort bekaunt jejäft daut de Messias hia wia dan wudden de Menschen wellen am to äa Kjennich moaken, un daut es oba nich wuarom hee no Ieed kjeem.  Christus wull Menschen von Jeistliche Trubbel frie moaken, väl mea aus blooss kranke Menschen heelen.  Siene Wunda betieekjend wäa hee wia, oba siene Oabeit wia nich waut Menschen dochten.  Israel haud aul lang wult een Messias haben wäa an wudd frie moaken von Room, un wada Israel oppstalen aus een Kjennichrikj.  Jesus wull haben daut Menschen am sullen aunseenen aus een Rada waut kunn äare Sinden wajch nämen.
            Daut aundre Dinkj waut mie biefelt es daut wiels Jesus haud Krauft äwa beese Jeista, noch een wajch toom daut bewiesen wia toom dee moaken stell sennen.  Menschen sullen leewa no am horchen aus no de beese Jeista, un met de Tiet wudd hee an noch sajen wäa hee wia.  Un nich blooss daut; Jesus beweess wäa hee wia met daut waut hee deed.  Siene Woakjen stemden gaunz met waut hee säd.  Hee säd foaken, "Wäa Uaren haft toom hieren, däm lot hieren," (Matäus 11:15).  De Menschen waut doa iernstlich äwa dochten wudden de Entscheidunk moaken wan see ieescht reed wieren, un nich ea.
            Un nu es doa noch waut fa ons toom doonen.  Wie weeten wäa Jesus es, dee Eensja Sän Gottes.  Onse Oppgow es nu toom Aundre von am vetalen un waut hee jedonen haft fa ons, un dan an loten de Entscheidunk moaken fa sikj selfst.  Wan see ieescht reed sent woaren see no Jesus komen.