De Markus Breef, Numma 6

​Toom Läsen:  Markus 1:35-39
            "Un näakjsten Morjen tiedich bie diesta stunt Jesus opp, veleet daut Hus un jinkj no eene eensome Städ toom bäden.  Petrus un dee waut bie am wieren, sochten sikj am.  Un aus see am fungen säden see:  Aulemaun sieekjt no die!
            Jesus säd:  Well wie aundatwäajen hangonen, no de Darpa dee dicht bie sent, daut ekj doa uk prädjen kaun.  Daut es wuatoo ekj jekomen sie.
            Un doaropp reisd hee derch gaunz Galiläa, prädijd en äare Judenschoolen un dreef beese Jeista ut."
 
 
            Ekj hab hia aul ieremol jesajcht daut Jesus es Gott sien Sän, oba ekj mott daut noch emol kloa moaken daut Jesus läwd gaunz onen Sind aus hee oppe Welt läwd.  Hee es de eensja Mensch waut sikj nienich haft jäajen Gott veschulcht; dit es wuarom hee de eensja wia waut ons kunn raden.  Wiels hee fälalooss wia, un es, sell wie dan no sien Läwen kjikjen, aus een Väabilt fa ons.  Wie sellen sträwen toom soo läwen aus Jesus deed, heilich un onen Sind.
            De Schreftstäd fa vondoag jeft ons gooda Rot toom een heiljet Läwen fieren.  Daut sajcht daut "...tiedich bie diesta stunt Jesus opp, veleet daut Hus un jinkj no eene eensome Städ toom bäden," (Markus 1:35).  Wan wie wellen soo läwen daut wie Gott ieren dan mott wie Tiet nämen toom am aunbäden.  Jesus wia Gott sien Sän, un hee neem väl Tiet toom bäden.  Ekj saj nich daut wie motten nu aula bie diesta noch oppstonen toom lang bäden, oba wan wie wellen een heiljet Läwen fieren dan mott wie waut Tiet nämen aula Dach toom auleen gonen bäden.  Mie es daut soo Jesus stunt soo tiedich opp wiels daut wia de eensje Tiet wua Menschen am toch leeten.  Daut es baste wan wie kjennen bäden onen daut aundre ons komen vesiemen; daut meent wie sullen dan aula soon Tiet em Dach finjen wua wie kjennen auleen sennen fa een Stoot.
            Soo schwind aus de aundre oppstunden, sochten see aul fuaz no Jesus.  Hee must sikj soon Tiet utsieekjen wua kjeen aundra romm wia, wäajen aulemaun socht no am.  Soo schwind aus de Menschen opp wieren kjeemen see no Jesus; hee wist daut äwadach wudden see am nich toch loten.  Dit es een gooda Väabilt fa ons.  Leewa aus de Menschen wajch schekjen äwadach socht hee sikj een aundra Tiet, soo daut hee nich durf Menschen wajch schekjen.  Wan ekj meed sie, finj ekj daut sea leicht toom blooss veloten un de Menschen romm mie tochloten, oba Jesus deed nich soo.  Ekj hop emma daut ekj woa dolla soo woaren aus Jesus es, soo daut ekj uk kaun Menschen bäta too schekj halpen.
            Oba Jesus leet sikj uk nich aunbinjen no de Menschen äa Wol; leewa aus blooss bie de selwje Menschen emma bliewen reisd hee romm, daut väl mea kunn de Goode Norecht hieren.  Jesus sajcht, "Well wie aundatwäajen hangonen, no de Darpa dee dicht bie sent, daut ekj doa uk prädjen kaun.  Daut es wuatoo ekj jekomen sie," (Markus 1:38).  See wieren noch bie Simon (Petrus) siene Schwieemutta; ekj näm aun daut wudd ommaklich sennen wan doa eegol Menschen ver Däa wieren!  Jesus wull de Goode Norecht wiet un breet vekjindjen, nich blooss opp eene Städ.  Hee wia jekomen fa aule Menschen.
            Väajemol räd wie von woo Jesus siene Macht beweess, un daut deit hee hia uk noch.  Soogoa de gaunze Tiet waut hee prädijd deed hee uk Menschen heelen un beese Jeista ut driewen, wiels hee wia jekomen toom Menschen frie moaken von äare Lausten.  En Lukas 4 sajcht Jesus, "Dän Harn sien Jeist rut opp mie, wiels hee haft mie jewält, de oame daut Evangelium to prädjen.  Hee haft mie jeschekjt, dee met een jebroaknet Hoat to heelen, de faustjenomne to prädjen daut see frie un looss sent, un de blinje, daut see seenen kjennen, un dee, dee unjadrekjt sent, frie to stalen, un to sajen, daut Gott sien Jnodenjoa jekomen es," (Lukas 4:18-19), soo aus daut jeschräwen es en de Profeeten.  Dise Bootschoft räd hee romm wiet un breet, soogoa en gaunz Galiläa.  Jesus neem emma Tiet fa dee Menschen wäm Help fäld, soo aus wie woaren noakstemol uk seenen.  Hee es vondoag uk noch krakjt soo Frintlich, un hee well die uk siene Jnod jäwen.