De Markus Breef, Numma 68

Toom Läsen:  Markus 13:24-31
           
“Oba wan daut schrakjelje, en dee Doag, woat äwa sennen, woat de Sonn diesta woaren un de Mon uk dän Schien velieren.  De Stierns woaren vom Himmel faulen, un de Himmelskjraften woaren sikj bewäajen.  Dan woaren de Menschen dän Menschensän en de Wolkjen en groote Krauft un Harlichkjeit komen seenen.  Dan woat hee siene Enjel no aule vea Rechtungen en de Welt schekjen, siene utjewälde to saumlen, von soowiet aus Himmel un Ieed gonen.
           
Lieet vom Fiejenboom eene Lekzion:  Sooboolt, aus de Asta jalsta woaren un de Bläda rut komen, weet jie daut de Somma kjemt.  Jrod soo weet jie uk, wan dit aula passieet, daut daut dan gaunz dicht bie es.  Ekj saj junt de Woarheit:  Dise Jennerazion woat nich utstoawen, bat dit aula passieren woat.  Himmel un Ieed woaren vegonen; oba miene Wieed vegonen nich.“
 
 
           
Wie läsen wieda woo Jesus hia to siene Jinja rät von daut Enj, un aul de Dinja waut noch woaren komen.  Jesus rät besondasch vondoag von woo hee woat trigjkomen.  Wan aul daut aundret, waut wie nu fa daut latste Stoot haben von jehieet, ieescht jeworden es, woaren dee Dinja passieren waut wie vondoag läsen.  Dan woat de Sonn diesta woaren, un de Mon woat dän Schien velieren.  Wie kjenn weeten, daut daut Enj es noch nich bat hia, wiels de Sonn dacht noch, un de Mon schient uk noch emma.  Ekj kaun nich sajen, krakjt woo daut aula woat woaren, oba wie kjenn weeten, daut dise Dinja woaren noch passieren, wiels Jesus haft daut jesajcht.
           
Ekj weet uk nich woo daut woat loten, wan de Stierns ieescht woaren vom Himmel faulen, un wan de Himmelskjraften sikj woaren bewäajen; oba wan daut ieescht passieet, woaren wie nich twiewlen un wundren äwa waut nu aun jeit.  Wie woaren weeten waut passieet, wiels Jesus sajcht ons daut wie daut kjennen weeten.  Hee sajcht daut woat soo kloa to seenen sennen, aus wan de Bläda ieescht aunfangen rut to komen aun de Beem em Farjoa.  Wan dit passieet, weet wie, daut de Somma es dicht bie; jrod soo kjenn wie uk weeten wan dise Dinja ieescht passieren, daut daut Enj dan gaunz dicht bie es.
           
Hia es eene Leksion bennen fa ons.  Daut halpt nuscht toom ons gaunz drock moaken met Tieekjen von daut Enj proowen to finjen, wiels Jesus sajcht daut wan de Tieekjens ieescht hia sent, dan woaren dee uk kloa sennen.  Daut es sea leicht toom ons loten sorjen äwa woo daut Enj woat woaren, ooda woo de veschiedne Rejierunks ons woaren aula faust nämen un em Jefenkjniss stoppen, ooda molrajcht met woo Jesus de Kjoakj woat behaundlen wan hee ieescht trigj kjemt.  Wan wie ons gaunz en dise Dinja nenn loten, dan denkjen wie nich aun woo toom daut Evangelium vekjindjen, un daut es oba onse Oppgow hia opp Ieed.  De Kjoakj äare jratste Oppgow, es toom daut Evangelium prädjen äwa de gaunze Welt, daut aulemaun Jeläajenheit haft Jesus auntoroopen.  Wan wie daut nich doonen, dan eendoont woo fein de Dinja sent waut wie doonen, wie sent dan noch ojjehuarsom to Jesus.  Well wie nich ojjehuarsom sennen, un well wie drinjent schaufen toom daut Evangelium wiet un breet vekjindjen.
           
Wan aul de schrakjelje Dinja ieescht jeworden sent, dan woat Jesus en siene Harlichkjeit trigjkomen, un aulemaun woat daut toostonen, daut hee Har un Kjennich es.  Hee woat siene Kjoakj toop holen, toom doa sennen bie am.  Dit uk woat gaunz openboa sennen, un kjeena woat twiewlen äwa waut nu passieet; daut woat gaunz kloa to seenen sennen.  Eene aundre Schreftstäd waut von dit rät es Filippa 2:10-11, un daut sajcht doa soo aus dit:  “Em Nomen von Jesus sellen sikj aule Kjneeen em Himmel un opp de Ieed un unja de Ieed bieejen.  Un aule Tungen sellen to Gott siene Iea bekjanen, daut Jesus Christus Har es.“  Frind, dit woat woaren wan Jesus ieescht trigj kjemt.  Wie kjenn am entwäda nu bekjanen, daut wie lota met Freid ons ver am kjneeen, ooda wie kjenn ons hoat moaken jäajen am, un lota met Forcht kjneeen ver am.  Oba wie woaren kjneeen, un bekjanen, aus wie nu aun am jleewen ooda nich.  Dee wäa am nu bekjanen, woaren sikj freien lota, un woaren met am toop em Himmel sennen; oba dee wäa nich bekjanen, un läwen onen am to jefaulen, woaren sikj lota ferchten, un see woaren jerecht woaren un enne Hall nenn jeschmäten woaren.  Bitte doot jieren am nu bekjanen, daut jie kjenn met am toop enne Himmel sennen.
           
Ekj well uk noch een kjlient bät räden von noch een Dinkj waut Jesus hia sajcht.  Hee sajcht en Varsch 30:  “Ekj saj junt de Woarheit:  Dise Jennerazion woat nich utstoawen, bat dit aula passieren woat.“  Well wie em Denkj hoolen, daut Jesus vetald dise Dinja nich bloos to de Jinja waut krakjt doa bie am wieren, oba uk to aul de Kjristen waut lota wudden aun am jleewen un sien Wuat läsen.  Wie sent doa met en jetalt, wiels en Varsch 14 von Kapitel 13 es doa een kjlienet Aufschnett doa bennen, waut sajcht, lot däm Läsa vestonen.  Dit meent daut aul de Wieed waut Jesus doa vetald sent uk fa jieda Mensch waut Gott sien Wuat deit läsen.
           
​Waut meent daut dan, wan Jesus sajcht, daut dise Jennerazion nich woat utstoawen bat dit aula passieren woat?  Ekj jleew daut et meent, daut wan dise Tieekjens ieescht komen, daut dee woaren aula benna eene Jennarazion passieren.  Wan daut Enj ieescht aunfangt, woat daut bosich passieren, nich sachelkjes.  Daut woat kloa to seenen sennen, waut nu aun jeit, un daut woat haustich passieren, benna eene Jennarazion.  Ekj weet nich wanea dit aula woat aunfangen, ooda wanea daut Enj woat sennen, oba ekj weet, daut wie ons kjennen opp Jesus siene Wieed faust hoolen, un wie kjenn ons gaunz opp Gott sien Wuat veloten.  Jesus sajcht wieda, daut Himmel un Ieed woaren vegonen, oba siene Wieed woaren nich vegonen, wiels dee sent eewich.  Wan Gott waut haft jesajcht, dan kjenn wie neiw weeten, daut et woat passieren; wie brucken ons nuscht nich doaräwa twiewlen.  Well wie väasechtich sennen, un Jesus nu bekjanen aus Heilant un Har, un iernstlich läwen fa am, toom daut Evangelium vekjindjen.  Well wie ons uk gaunz faust hoolen aun Jesus un aun siene Wieed.