De Markus Breef, Numma 69

Toom Läsen:  Markus 13:32-37
           
“Dän Dach ooda de Stund wanea daut passieren woat, weet kjeena, nich emol de Enjel em Himmel, uk nich de Sän.  Daut weet bloos de Voda.
           
Siet waka, siet väasechtich!  Wiels jie weeten nich wanea de Tiet komen woat.  Daut es soo aus wan een Maun wajch foat un siene Deena sien Hus aunvetrut un de Oabeida eenem jiedren siene Oppgow jeft un dän Däarenwajchta befält to woaken.  Blieft waka; wiels jie weeten nich wanea de Har vom Hus trigjkomen woat, auf zeowes ooda medden en de Nacht ooda wan de Hon kjreit, ooda zemorjes.  Sorjcht doafäa, daut jie nich schlopen woaren, wan hee met eemol onverhofs komen sull.  Waut ekj to junt saj, saj ekj to aule:  Woakt!“
 
 
           
Vondoag komen wie bat daut Enj von Markus Kapitel 13, un hia es wada väl bennen fa ons toom woa nämen.  Jesus siene Wieed hia sent wada fa siene Jinja, wäa krakjt doa wieren bie am aus hee dit säd, oba uk fa ons aula, wäa de Schreft läsen, wiels to latst sajcht Jesus daut hee sajcht dit to aule, en Varsch 37.  Well wie dit woa nämen daut Jesus uk to ons rät, un iernstlich horchen no siene Wieed vondoag.
           
Dise Wieed waut wie vondoag läsen sent noch emma poat von daut waut wie haben daut latste Stoot no jekjikjt, un daut es daut Enj von de Welt.  Jesus haft miere Dinja erkjläat äwa dit Teema, un hee haft ons uk väl jesajcht äwa waut mott komen ea daut Enj bat hia es.  Hee haft ons uk kloare Tieekjens jejäft, daut wan wie dee ieescht seenen, dan kjenn wie weeten, daut daut Enj es gaunz dicht bie.
           
Vondoag rät hee oba von een sea wichtjet Teema äwa daut Enj von de Welt, un dit us wua väle Menschen äwa de Joaren sent stäakjen jebläwen.  Hee sajcht hia oba gaunz kloa, daut kjeena kaun weeten, wanea daut Enj komen woat.  Nich emol Jesus wist wanea daut Enj wudd komen, un hee es Gott sien Sän!  Hee sajcht daut nich emol de Enjel em Himmel, dee wäa doa bie Gott sennen, weeten wanea daut Enj woat komen, un soogoa uk nich emol de Sän weet; daut weet bloos de Voda.
           
Doa sent emma soone Menschen, waut sikj dit aula proowen ut to jreblen, un see moaken sikj aulehaunt dietlich äwa woo daut Enj mott komen, un see räakjnen lang un proowed de krakjte Dotems ut to finjen; dit halpt äwahaupt nuscht.  De Bibel es gaunz kloa, daut kjeena kaun daut weeten; wuarom wudd wie dan ons wellen drock moaken met daut proowen ut to finjen, waut nich to weeten jeit?
           
Daut haupt von waut Jesus hia sajcht vondoag, es gaunz kloa, un dit sajcht hee to aulemaun.  Wie sellen woaken, daut wie reed sent, fa de Tiet wan Jesus woat trigj komen.  Wie motten ons selfst reed moaken, fa daut Enj, wan wie uk nich weeten wanea daut woat passieren.  Wie motten waka sennen, un väasechtich sennen, daut wie nich enschlopen un ful woaren met Gott siene Oabeit, waut hee ons jejäft haft to doonen.  Well wie nich ful sennen, daut wie met eemol nich reed sent wan de Har onverhofs un haustich kjemt.
           
Ekj well, wan daut schauft, dit kloa sajen soo aus mie daut sitt.  En eenen Wajch, haft Jesus to ons erkjläat, waut de Tieekjens von daut Enj woaren sennen; wan wie dee ieescht seenen, dan kjenn wie weeten, daut daut Enj dicht bie es.  Oba wie woaren niemol kjennen sajen woonen Dach daut woat sennen, wanea Jesus woat trigj komen, ooda waut vonne Stund, ooda Moonat, ooda irjent waut soo aus daut.  Foaken jleew wie veleicht, daut nu mott daut Enj aul boolt bat hia sennen, un veleicht es daut uk rajcht jesajcht.  Oba de Schreft sajcht ons wuarom daut noch nich jeworden es, un wie wellen daut nu läsen.  2 Petrus 3:9-10 sajen soo aus dit:  “De Har vetrakjt sien Vespräakjen nich too lang, soo aus eenje meenen.  Hee haft bloos Jedult met junt, wiels hee well, daut aulemaun sikj oppmoaken saul, un daut kjeena veloaren jeit.  Oba dän Harn sien Dach woat soo komen aus een Stäla en de Nacht.“  Petrus schrift dit krakjt wäajen Jesus sien wada komen, un doa wieren Menschen to dee Tiet waut aul ojjeduldich worden un wullen haben daut et mol sull woaren.  Dise Schreftstäd sajcht oba gaunz kloa, daut Gott haft Jedult met ons, un jieda Dach waut hee luaren deit es noch eene Jeläajenheit fa de Veloarne toom no Jesus komen.
           
Well wie dan Väasechtich sennen, un reed sennen, fa wan de Dach ieescht komen woat.  Woo kjenn wie reed sennen fa daut?  Daut ieeschte Poat es, daut wie motten Jesus perseenlich kjanen aus ons perseenelja Rada un Har.  Wan hee die nich haft de Sinden vejäft, dan best du nich reed fa dän Dach wan hee ieescht woat trigj komen.  Wie motten aula bekjanen, daut Jesus es Har, un daut too stonen, daut hee fa onse Sinden storf; un daut hee stunt opp vom Grauf toom ons leesen von de Sind, un uk busse doonen, un no siene Vejäwunk froagen.  Wan du daut hast jedonen, dan kaust du weeten, daut du best jerat, un daut Gott haft diene Sinden vejäft.
           
Daut tweede Poat von reed sennen es dit:  Waka sennen.  Waut meent dit?  Ekj jleew dit meent, daut wie en onse Senn weeten, daut Jesus kaun boolt trigj komen, un ons doaderch dan ermootjen, toom daut Evangelium vekjindjen.  Gott haft noch Jedult; well wie dee Jedult nich aufproowen!  Well wie schaufen, un daut Evangelium wiet un breet erkjläaren, daut aulemaun kaun Jesus aunnämen un jerat woaren.  Dit es onse Oppgow aus Kjristen, un dit es de Oabeit waut de Har siene Oabeida jeft.  Well wie jehuarsom sennen to Gott, un dee Oabeit drinjent doonen, to Gott siene Iea.  Mucht de Har siene Kjoakj säajnen toom dise Oabeit doonen, bat hee wada kjemt.