De Markus Breef, Numma 72

Toom Läsen:  Markus 14:17-26
           
"Aus daut Owent wort, kjeem Jesus met de Twalw.  Aus see aum Desch sauten un eeten, säd Jesus:  Ekj saj junt de Woarheit:  Eena von junt, dee met mie toop at, woat mie veroden.
           
Daut muak an truarich, un see säden eena no däm aundren:  Oba doch nich ekj!
           
Hee säd:  Daut es eena von junt Twalw.  Daut es dee, dee sien Broot met mie toop en de Schiew endukt.  De Menschensän woat jrod soo hangonen, aus von am jeschräwen steit; oba wee dän Mensch, dee dän Menschensän verot!  Daut wudd fa däm bäta sennen, wan hee niemols wia jebuaren worden.
           
Un wäarent see eeten, neem Jesus Broot, dankt doafäa un bruak daut, jeef siene Jinja daut un säd:  Nämt un ät daut; dit es mien Kjarpa.
           
Dan neem hee uk daut Kuffel un dankt doafäa un jeef an daut; un see drunken aula doarut.  Hee säd:  Dit es mien Bloot vom nieen Bunt, daut fa väle vegoten woat.  Ekj saj junt de Woarheit:  Ekj woa von dise Wiendruwen Frucht nich mea drinkjen, bat ekj en daut Gottesrikj nieen Wien drinkjen woa.
           
Un aus see een Dankleet jesungen hauden, jinjen see rut no däm Oliewen Boajch."
 
 
           
Vondoag läs wie von woo Jesus un siene Jinja doonen daut Passafast toop fieren, un oba dit es uk eene Beschriewunk von waut gaunz nieet, un daut es Owentmol.  Dit waut wie vondoag läsen es de ieeschta Owentmol.  Fa Kjristen aulawäajen opp de Welt es dit eene sea besondre Lia.  Un dit es uk nich bloos eene Lia, oba uk een Dinkj waut wie enne Kjoakj doonen, waut ons aus Jlieda toop binjt un Eenichkjeit jeft.
           
Wie wellen vondoag kjikjen no woo daut Passamol een Bewies es von Jesus.  Doa es väl bennen, waut wie kjennen lieren von dit, oba wie wellen dollste kjikjen no woo daut Passalaum een Bilt es von de Oabeit waut Jesus kjeem toom doonen.
           
Toom aunfangen, daut Passafast es een Denkjmol Fast aun woo Gott haud de Israeliten jerat, aus see Sklowen wieren en Ägipten.  Gott haud derch Moses de Ägiptischen Kjennich jesajcht, daut hee sull de Israeliten gonen loten, oba de Kjennich wull daut nich doonen.  Dan deed Gott derch Moses väle groote Wunda en Ägipten doonen, soo aus Hoagel schekjen, un daut Wota em Riefa to Bloot moaken, un noch mea besied.  Dit jeit aula to läsen en 2 Mose 7-12.  Dit es de Jeschicht von woo Gott deed groote Wunda en Ägipten, un von daut ieeschte Passafast.
           
De Hauptsach waut wie wellen vondoag no kjikjen, es besondasch daut tieende Wunda waut Gott en Ägipten deed, un daut wia de Doodesenjel schekjen toom aul de ieeschtjebuarne en daut gaunze Launt doot moaken.  De Uasoak wuarom Gott dit deed, es wiels de Kjennich von Ägipten haud väle Joaren trigj een Jesaz jemoakt, daut aul de Junges waut to de Israeliten jebuaren wieren, sullen doot jemoakt woaren; met dit tieende Wunda, deed Gott sien Oaja utjeeten opp Ägipten.
           
Oba, wiels Gott es emma jnädich, leet hee een Wajch op, daut Menschen äare Famieljes kunnen jerat sennen.  Gott säd derch Moses to aul de Israeliten, daut wan see wudden een Laum schlachten fa jieda Famielje, un daut Bloot aun de Däarenposten naun foawen, dan wudd de Doodesenjel de Famielje tochloten, un jieda Mensch waut en daut Jebied wia, wua daut Bloot wort naunjeforwen.  Dan sullen see uk daut Fleesch von daut Laum koaken un äten, met onjesuade Brood toop.  Dit wort dan daut Passamol jenant, un en lotre Joaren, säd Gott to de Israeliten daut see dit Fast sullen jieda Joa hoolen, aus een Denkjmol aun de Radunk waut hee de Israeliten haud jebrocht.
           
Krakjt soo aus Gott dan jnädich wia to de Israeliten, es hee uk jnädich to aulemaun oppe Welt.  Jesus es daut Gotteslaum, waut sien Bloot jeef fa de Welt.  Sien Bloot dakjt ons von dän Doot, wan wie aun am jleewen, krakjt soo aus daut Bloot von daut Passalaum de Israeliten jedakjt haud en Ägipten.  Jesus jeef sienen Kjarpa opp aus een Opfa, daut wie kunnen loos komen von de Sind, krakjt soo aus daut Fleesch von daut Passalaum de Israeliten Krauft jeef toom Ägipten veloten.  Jieda Poat von de Passamol bewiest de Radunk waut Jesus brinjt, un wie haben nich Tiet toom no jieda kjlienet Dinkj kjikjen vondoag.  Daut es soo scheen toom seenen, woo Gott sien Plon volbrinjt.  Daut Passamol kjikjt verwoats no Jesus, un de Radunk waut hee wudd brinjen, un von de Radunk läs wie nu.
           
Jesus es de Erfellunk von aules waut daut Passafast bedieden deit, oba hee es uk mea aus daut.  Jesus funk uk eene niee Mood aun, un daut es Owentmol.  Hee muak een nieen Bunt, met daut Broot un met dän Kuffel, un säd siene Jinja daut see sullen dit emma doonen aus een Denkjmol aun sienen Doot.  Soo aus de Passalaum Radunk brocht vom fiesischen Doot, brinjt Jesus Radunk vom eewjen Doot, wan wie aun am jleewen.  Disen nieen Bunt, es een Tieekjen von de Gloowen waut Kjristen haben aun Jesus; un jiedatsmol waut wie Owentmol hoolen, bewies wie ons Gloowen aun am.
           
​Wie woaren opp eene aundre Tiet kjikjen, no Judas, un woo hee Jesus deed veroden, wiels wie haben nich Tiet toom no daut kjikjen vondoag.  Un ekj well uk bloos en kjlienet beskje sajen äwa dän nieen Bunt, daut et een Tieekjen es von daut Gottesrikj.  Owentmol es nich bloos eene Mood, waut wie aus Kjristen haben; daut es een Tieekjen, daut wie aula toop en Gott sien Rikj sennen.  Daut binjt Kjristen äwa de gaunze Welt toop, un de Schreft woarnt ons uk von Owentmol orrajcht begonen.  En 1 Korinta 11:17-33 schrift Paulus von Owentmol, woo daut rajcht to fieren, soo daut et Gott ieet un de Kjoakj toop binjt.  Ekj wudd junt aula too roden, dise Schreftstäd to läsen, un to unjasieekjen daut wie aula de rajchte Enstallunk haben äwa Owentmol.  Dit es soont waut de Har ons haft jejäft.  Wie haben nich Tiet toom doa deep nenn kjikjen vondoag, oba opp aundatsmol well wie doa noch nenn kjikjen.