De Markus Breef, Numma 78

Toom Läsen:  Markus 15:1-5
           
“Tiedich näakjsten Morjen hauden de Huagepriestasch eene Berodunk met de Eltestasch un Schreftjelieede, un met däm gaunzen Rot.  Un see bungen Jesus, leiden am wajch un jeewen am äwa aun Pilatus.  Dan fruach Pilatus am:  Best du de Juden äa Kjennich?
           
Un hee säd to am:  Daut es soo aus du sajchst.
           
De Huagepriestasch hauden väl, wuamet see am beschuljen, oba hee jeef an kjeene Auntwuat.  Dan fruach Pilatus am nochmol:  Jefst du kjeene Auntwuat?  Kjikj doch emol, met waut see die aules beschuljen!
           
Oba Jesus säd noch emma nuscht, soo daut Pilatus sikj wundad.“
 
 
 
           
Dit waut wie vondoag läsen passieet fuaz no daut waut wie deeden väajetmol läsen, wua Petrus deit daut dree mol velieejen, daut hee Jesus kjant.  Dit es jrod no däm waut de Judischa Rot haft Jesus faustjenomen, un see brochten am no de Tempel toom am Froagen aunstalen.  Wie haben aul jekjikjt no woo de Juden äare ieejne Jesazen bruaken, bloos daut see Jesus kunnen toom Doot beschuljen, un woo see am behaundelden no däm daut see am faulsch vedaumt hauden.  See haben Jesus hia aul met de Fusten jeheiwd, un see deeden opp am spieejen.  Jesus haud foaken en sien Läwen jäajen de Farisäa jerät, wiels see wieren bejierich un voll Hot, un see kunnen Jesus nich lieden.  Hee brocht äare schlajchte Jedanken un Doten ver daut Licht, un doawäajen wieren see soo doll äwa am.  Nu kjeem daut äwadäl, wäa see werkjlich wieren, un wie kjennen seenen daut doa wia nuscht nich heilich von an.  Ennalich wieren see krakjt soo sindvoll aus irjent een aundra Mensch, oba see stalden sikj soo opp aus wan see heilich wieren.
           
Nu daut see Jesus vedaumt haben un vekjielt haben, binjen see am faust un brinjen see am no Pilatus.  Pilatus wia een Reemascha Gowernia äwa de Staut Jerusalem, wiels de Juden wieren to Jesus siene Tiet de Reema unjadon.  De Reema hauden Pilatus doa han jestalt toom rejieren äwa de Juden, un wiels hee nich een Jud wia, kunnen de Juden am schlajcht lieden.  Oba, Pilatus wia de eensja enne Staut Jerusalem waut de Macht un Frieheit haud een Mensch doot to moaken nom Jesaz no, un doawäajen brinjen de Juden Jesus no am.
           
Dise Varzhen sajen daut de Juden hauden eene Berodunk met aul de veschiedne Gruppen von Juden Leidasch.  De Judischa Rot wia de Grupp waut Israel äare Jesazen deed moaken un hoolen, un see befolen uk de Menschen daut to doonen.  De Eltestasch un Schreftjelieede wieren de waut de jeweenelje Menschen deeden lieren vonne Schreft.  De Judischa Rot wia eene Grupp von Farisäa, Saduzäa, un de Huagepriestasch, un dise Rot wia dee waut Jesus haud denacht vedaumt toom Doot.  Nu brochten see äare Entsheidunk no de aundre Leidasch, de Eltestasch un Schreftjelieede, un see aula toop brochten Jesus dan no Pilatus.  Aul soo hia kjennen wie seenen, daut de gaunze Leidaschoft von de Juden, aul de veschiedne Gruppen, wieren sikj eenich en daut see Jesus wullen doot jemoakt haben.
           
Hia es noch waut intressauntet von de Juden:  See kunnen de Reema nich lieden.  De Juden wieren Gott sien utjewäldet Volkj, un to an haud Gott de Schreft un de Jesazen jejäft.  Äare Profeeten hauden jesajcht, daut een Dach wudden see aulwada frie sennen von de aundre Velkja äare Macht, un wudden wada äa ieejnet Launt haben wua see kunnen frie sennen.  De Reema stunden em Stich von disen Droom waut de Juden hauden.  Oba äare Hot fa Jesus wia jrata aus äa sträwen jäajen de Reema, un see muaken sikj jerinj to de Menschen wäm see nich kunnen lieden.
           
Pilatus frajcht Jesus hia, auf hee de Juden äa Kjennich es, un mie es daut intressaunt daut hee jeft Pilatus auntwuat, wan hee de Juden oba kjeene Auntwuat jeef.  Hee sajcht to Pilatus, daut et es soo; dit meent daut Jesus daut too steit, daut hee rajcht haft toom rejieren äwa de Juden; oba hee jeef dit opp, om daut hee kunn de Oabeit doonen to waut sien Voda am jeschekjt haud.  Hee es Kjennich un Har, un wan hee ieescht trigj kjemt woa wie daut seenen met onse ieejne Uagen, aul dee waut dan läwendich sennen.  Hee es Kjennich, oba sien Rikj es noch nich fiesisch woa hia opp Ieed; daut es een Rikj waut nich von dise Welt kjemt.  Dit es waut Jesus to Pilatus sajcht en Johanes 18:36, un daut sajcht soo aus dit:  “Jesus säd:  Mien Kjennichrikj es nich von dise Welt.  Wan mien Kjennichrikj von dise Welt wia, wudden miene Deena jekjamft haben, daut ekj von de Juden nich faust jenomen wort.  Oba mien Kjennichrikj es nich von dise Welt.“  Jesus sien Rikj es nich von dise Welt, oba een Dach woat daut fiesisch opp dise Welt jekomen sennen.
           
Tolatst sajcht daut hia vondoag, daut Pilatus sikj wundat, daut Jesus kjeene Auntwuat jeft to dee waut am beschuljen.  De mieeschte Menschen wudden besorcht sennen om an selfst wäaren fa waut aundre sajen, besondasch wan an faulsch beschuljcht woat, oba Jesus deit daut nich.  Hee lat an aul äare Läajes wieda vetalen, un hee lat an soone beese Dinja sajen äwa am aus see wellen, un hee deit nuscht trigj.  Pilatus wundad sikj wiels hee wist daut dit wia nich normal; dit wia nich waut jeweenelje Menschen deeden.
           
​Wan wie Kjristen sent, daut es goot mäajlich daut Menschen woaren aulahaunt faulschet sajen äwa ons, un ons vespotten.  Oba krakjt soo aus Jesus hia deed, sell wie nich an schlajchtet trigj tolen, oba leewa fa an bäden, un goodet doonen to an.  Dit es een Tieekjen von Jesus sienen nofolja sennen; wan wie dän Senn haben, waut Jesus haud.