De Markus Breef, Numma 8

​Toom Läsen:  Markus 2:1-12
            "Aus Jesus een poa Doag lota wada no Kapernaum kjeem, hieeden de Menschen, daut hee no Hus jekomen wia.  Dan kjeemen soo väl toop daut soogoa buten ver de Däa nich mea Rum wia, un hee prädijd daut Wuat.  Doa kjeemen uk vea Mana no am, dee eenen Jelämden druagen.  Un wiels doa soo väl Menschen wieren, daut see am nich bat Jesus brinjen kunnen, muaken see jrod bowa Jesus een Loch derch daut Dak un leeten dän Jelämden met Medrauz toop ver Jesus rauf.  Aus Jesus äaren Gloowen sach, säd hee to dän Jelämden:  Mien Sän, die sent diene Sinden vejäft.
            Doa sauten soone von de Schreftjelieede, dee bie sikj selfst dochten:  Wuarom rät dis Maun soo?  Daut es jelastat!  Wäa sest aus Gott kaun Sinden vejäwen?
            Jesus wist en sienem Jeist sea boolt, waut de Menschen bie sikj em Hoat dochten, un säd to an:  Wuarom denkj jie soo äwa de Sach?  Waut es leichta to dän Jelämden to sajen:  Die sent de Sinden vejäft, ooda to sajen:  Sto opp, nemm dien Bad un go?
            Oba daut jie weeten kjennen daut de Menschensän hia oppe Ieed de Krauft haft Sinden to vejäwen, säd hee to dän Jelämden:  Ekj saj die, sto opp, nemm dien Bad un go no Hus!
            Hee stunt opp, neem sien Bad un jinkj rut, soo daut see am aula seenen kunnen.  See wundaden sikj aula doaräwa un lowden Gott un säden:  Soowaut aus die hab wie noch niemols jeseenen."
 
 
 
            Wie haben dit latste Stoot väl jerät von Jesus siene Krauft, woo hee de Macht haft äwa beese Jeista, un Krankheit, un woo hee met jewault prädijd to de Menschen romm am.  En dise Varzh vondoag see wie de Uasoak wuaromm hee jekomen wia.  Wie weeten daut Jesus reisd romm un prädijd en väle Darpa, un hee bleef uk dolla en vietleftje Jäajenden wiels Menschen wieren soo nieschierich daut see leeten am nich toch.  Oba noch mol kjeem hee trigj no soone Staut wua mea Menschen wieren, soo aus wie läsen vondoag.  Menschen hieeden daut hee wia trigj no Hus jekomen, un doa kjeemen soo väl toop daut buten biem Hus ver de Däa wia nich Rum.  To dise groote Hoad prädijd hee daut Wuat.
            Vea Mana kjeemen doa han, un see druagen eenen Jelämden, oba doa wia nich Rum daut see kunnen no Jesus komen.  Oba dit meend nich daut see wudden nu blooss oppjäwen un veloten; nä, see muaken een Loch em Dak un leeten dän Jelämden doa derch ver Jesus rauf.  Woo jieren well wie no Jesus komen?  Hab wie soonen Gloowen aus waut dise Mana hauden?  Daut sajcht, "Aus Jesus äaren Gloowen sach, säd hee to dän Jelämden:  Mien Sän, die sent diene Sinden vejäft." (Markus 2:5).  De Mana waut dän Jelämden brochten hauden Gloowen, jo, oba daut meend nich daut Aulemaun doa haud.
            De Schreftjelieede waut doa sauten grunsden doa äwa, wuat Jesus säd, oba toom an aula bewiesen daut hee kunn Sinden vejäwen, heeld hee dän Jelämden uk.  Weet jie dit es wuarom Jesus soo väl Wunda deed; nich onbedinjd toom Menschen siene fiesische Macht bewiesen, oba toom Menschen wiesen daut hee an halpen kunn.  Hee heeld dän Jelämden toom Menschen wiesen daut hee kunn noch waut bätret doonen aus fiesisch heelen; hee kunn an seelich moaken!  De fiesische Heelunk wia een bewies von de jeistliche Reinjunk waut Jesus brinjt.  Aus Jesus dän Jelämden sach, wull hee am halpen, oba hee wist daut doa wia mea orrajcht met am aus daut hee nich gonen kunn.  Sien jratsta Trubbel wia ennalich, wiels hee, soo aus Aulemaun, must kjamfen met Sind.  Jesus kjeem nich blooss toom Menschen fiesisch heelen.  Hee kjeem daut de gaunze Welt kunn jeistlich jeheelt woaren.
            Oba toom de Reinjunk kjrieen, mott wie Gloowen haben.  Well wie ons gaunz opp am veloten toom ons ennalich uk heelen, soo daut de Menschen romm ons uk kjennen sajen waut de Menschen to dee Tiet säden:  "See wundaden sikj aula doaräwa un lowden Gott un säden:  Soowaut aus dit hab wie noch niemols jeseenen," (Markus 2:12).  Daut es een grootet Wunda wan een Mensch fiesisch jeheelt woat, oba daut es noch väl wijchtja un jrata een Wunda wan de Sinden woaren wajch jenomen.  Well wie nich vejäten doavon vondoag