De Markus Breef, Numma 81

Toom Läsen:  Markus 15:21-32
           
“Simon von Kiereen, Alexanda un Rufus äa Voda, kjeem jrod vom Launt un kjeem doa vebie; däm bedwungen see Jesus sien Kjriez to droagen.  Un see brochten am no eenem Plauz, Golgata jenant, daut meent:  een Schädelplauz.  Doa wullen see am Wien met betret Beteibungsstoff to drinkjen jäwen; oba hee neem daut nich.  Un aus see am jekjriezicht hauden, vedeelden see siene Kjleeda un trocken Lessa, om to seenen, waut een jiedra kjrieen wudd.  Daut wia Klock näajen zemorjes, aus see am kjriezijden.  Un bowen aum Kjriez schreewen see:  De Judenkjennich; daut wia waut see jäajen am hauden un wuawäajen see am kjriezijden.  See kjriezijden met am toop noch twee Merdasch, eenen aun de rajchte un eenen aun de linkje Sied.  (Soo kjeem daut rom, aus daut jeschräwen steit:  “Hee wort mank de Vebräakja jetalt.“)  Un dee doa vebie jinjen, scheddaden met de Kjap un lastaden un säden:  Aha! Du, dee du dän Tempel dolbrakjst un en dree Doag oppbust, rad die selfst un komm vom Kjriez rauf!
           
Jrod soo deeden uk de Huagepriestasch un Schreftjelieede unjaenaunda äwa am spotten un säden:  Hee haft aundre jeholpen, oba kaun sikj selfst nich halpen.  Lot dän Christus, dän Kjennich äwa Israel, nu vom Kjriez rauf komen, daut wie seenen un jleewen kjennen.
           
Un dee waut met am toop jekjriezicht wieren, schullen uk äwa am.“
 
 
 
           
Vondoag läs wie von woo Jesus jekjriezicht woat.  Wie haben aul jekjikjt no woo sea am vekjielt un vespott wort, ea see am deeden kjriezjen, oba dit waut wie vondoag läsen es noch oaja aus aul daut aundret waut hee soo wiet derch jinkj.  Wie haben väl toom no kjikjen vondoag.
           
Daut ieeschte Dinkj es dit:  Jesus wia too schwak toom sien ieejnen Kjriez droagen bat doa wua see am wullen kjriezjen.  Mieeschte Tieden, must de vedaumda sien ieejnen Kjriez droagen, aus ne Schaund jäajen dän Mensch; oba Jesus wia aul too schwak von aules waut hee derch jinkj, toom daut droagen.  Doawäajen muaken see eenen Simon von Kiereen daut droagen fa am.  De aundre Mana waut met Jesus toop jekjriezicht worden, deeden meist sechalich äare ieejne Kjriezen droagen, oba Jesus deed nich.
           
Daut tweede Dinkj waut wie wellen no kjikjen es daut aules waut Jesus hia derch jinkj, deed de Schreft erfellen.  Psalm 22 es von David jeschräwen, oba daut es vom Heiljen Jeist jedicht worden, wiels waut doa bennen jeschräwen es, es krakjt waut Jesus hia derch jinkj opp dän Kjriez.  Daut sajcht soogoa en Varsch 19 soo aus dit:  “See deelen sikj miene Kjleeda en, un lossen mienen Äwarock ut.“  De Soldoten trocken Lossen, toom seenen wäa Jesus siene Kjleeda wudd kjrieejen, krakjt soo aus dis Psalm sajcht.
           
Nich bloos daut; Näakjstet mol woa wie een bät wieda hia nenn kjikjen, wiels Jesus sajcht een Poat von dis Psalm wäarent hee opp daut Kjriez henjen deit, oba daut es en de näakjste Aufschnett.  Daut wijchtje Dinkj es daut Jesus sienen Doot aum Kjriez deed de Schreft erfellen.
           
Daut dredde Dinkj, waut wie wellen no kjikjen, es woo de Menschen romm Jesus deeden schullen äwa am.  Wan Menschen to dee Tiet jekjriezicht worden, wort daut en soonen Plauz, wua aulemaun daut seenen kunn, wiels poat von de Strof wia de Schaund von mank Menschen doot jemoakt woaren.  Doa wia eene groote Maussen Menschen doa runt om, un see kunnen aula seenen soo aus Jesus wort jekjriezicht, un dise Menschen wieren dee waut deeden äwa am spotten.
           
Hia es daut intressauntet Poat von dit aula:  de Dinja, waut de Menschen sajen toom spotten äwa Jesus, sent werkjlich de Woarheit.  Waut ekj meen es dit:  de Menschen spotten äwa Jesus, daut hee säd hee wudd dän Tempel dolbräakjen un en dree Doag wada oppbuen; oba daut es krakjt waut Jesus hia deed!  Jesus räd von sien ieejnen Kjarpa, aus hee daut säd; sien Kjarpa wia de Tempel von de Heilja Jeist, aus hee opp Ieed wia, un opp dän Kjriez, deed hee de Tempel von sienen Kjarpa dolbräakjen.  Dree Doag lota wudd hee oppstonen, un doamet wort de Tempel wada oppjebut; oba de Menschen waut spotten äwa am kunn dit nich weeten.  See säden uk, daut wan hee aundre raden kunn, sull hee dan uk sikj selfst kjennen raden; oba daut wia krakjt wiels hee aundre deed raden daut hee sikj selfst nich kunn raden.  Jesus storf fa de Menschen waut am deeden vespotten, oba see wisten daut nich.
           
Soo doonen uk de Huagepriestasch un Schreftjelieede, un hia stonen see daut too, daut Jesus de Christus es, un uk de Kjennich von Israel, oba see säden am auf, un wullen nuscht met am to doonen haben, un ut Aufgonst jeewen see am äwa toom jekjriezicht woaren.  Nu säden see noch, daut wan hee wudd vom Kjriez rauf komen, wudden see aun am jleewen, oba ekj sie mie secha daut daut wudd uk nich sennen jenuach jewast, toom äare Jedanken endren.  See wieren soo jäajen am jedreit, daut et hilt sikj jlikj woo väl Wunda see am sagen doonen; daut wia nich jenuach toom äare Hoaten endren.  Hee haud soogoa de Doodes oppjewakjt, un daut wia fa de Juden Leidasch nich jenuach; vom Kjriez rauf komen wudd uk nich een Unjascheet moaken.  Menschen motten ennalich endren, toom Jesus aunnämen; bloos Wunda von buten seenen es nich jenuach.  Daut Hoat mott sikj endren, wan eena saul Jesus kjennen aunnämen.
           
​Tolatst, well wie een kjlienet bät kjikjen, no de Reiba waut aum Kjriez hongen biesied Jesus; hia sajcht daut, daut see schullen aula beid äwa Jesus, oba wan wie en Lukas 23:39-43 läsen, finjen wie, daut eena von de Reiba endad noch sienen Senn äwa Jesus.  Wie woaren daut nich vondoag läsen wäajen de Tiet rant kort, oba denkjt aun dit:  wan Jesus Jnod haft, fa de Merda waut biesied am henjen deed aum Kjriez, dan haft hee uk Jnod fa die, wan du die woascht hanjäwen no am.  Soo lang aus du läfst, es doa noch Jeläajenheit toom die no Jesus dreien.