De Markus Breef, Numma 9

​Toom Läsen:  Markus 2:13-17
            "Jesus jinkj noch eemol rut no de Kaunt vom Mäa; un am kjeemen een grootet Schoof hinjaraun un hee lieed an doa.  Un aus hee wieda jinkj, sach hee Alfäus sien Sän Levi, een Takskollakjta, en sien Bood setten.  Jesus säd to am:  Folj mie no!
            Levi stunt opp un foljd am no.  Aus Jesus bie Levi em Hus to Meddach wia, eeten väl Takskollakjta un Sinda met am un siene Jinja toop; wiels doa wieren väl dee met am metkjeemen.  Aus de schreftjelieede Farisäa sagen, daut hee met de Takskollakjta un Sinda toop eet, fruagen see siene Jinja:  Wuarom at hee met Takskollakjta un Sinda toop?
            Aus Jesus dit hieed, säd hee to an:  De jesunde brucken dän Dokta nich; dän brucken mau de kranke.  Ekj sie nich jekomen de jerajchte entoloden oba de Sinda."
 
 
            Hia en dise Varzh läs wie wuarom Jesus jekomen wia.  "Ekj sie nich jekomen de jerajchte entoloden oba de Sinda," sajcht hee en Varsch 17.  Daut sent mau dee waut Sinda sent waut motten von Sind frie jemoakt.  Oba wie haben aul ieremol jesajcht daut Aulemaun kjamft met Sind.  Waut meent dit dan?  Sent doa Menschen waut nich brucken rein jemoakt?  Nä, de Bibel sajcht, "Doa es kjeen Unjascheet:  Aulemaun haft jesindicht un kjemt doarenn too kort, waut hee bie Gott sennen saul," (Reema 3:23).  Waut meent Jesus dan wan hee rät von de jesunde un kranke Menschen?
            Ea wie daut jlikj too auntwuaten mott wie een bät räden von Levi.  Dit wia een Takskollakjta, soona waut de Juden nich lieden kunnen.  Hee wia selfst een Jud, oba hee deed Jelt kollakjten fa de Reema, wiels Israel lied to dee Tiet unja de Staut Room.  Soone waut dan deeden Taks kollakjten fa de Reema wieren aunjeseenen aus Veroda.  See wieren Schlajchta aunjeseenen aus soona waut driest enne Sind läwd.  Daut Jesus sikj wudd woagen een Takskollakjta aunbeeden toom eent von siene Jinja sennen wia waut sea besondret.  Hee hieed oba nich doa opp; aus hee Levi jeroopen haud, eeten see toop, met väle von Levi siene Frind, waut uk Takskollakjta un Sinda wieren.
            Dit kunnen de Farisäa meist nich lieden; daut soona waut Menschen lieed wudd sikj loten met Sinda un Takskollakjta to doonen haben!  De Liera sullen doch heilich aunjeseenen sennen; dit meend see kunnen nich met jeweenelje Menschen toop sennen.  Jesus oba dreid dit gaunze Bilt äwa Kopp.  Krakjt dee Menschen wäm de Farisäa nich kunnen lieden wieren dee fa wäm Jesus jekomen wia.  Hee boot an de Goode Norecht aun, daut see kunnen äare Sinden looss woaren, un väle jinjen am hinjaraun.  Well wie noch eemol läsen waut hee to de Farisäa sajcht.  "Aus Jesus dit hieed, säd hee to an:  De jesunde brucken dän Dokta nich; dän brucken mau de kranke.  Ekj sie nich jekomen de jerajchte entoloden oba de Sinda," (1:17).
            Nu sent wie trigj bat wua wie aum Aunfank wieren:  doonen nich aule Menschen lieden unja Sind?  De Auntwuat es jo.  Aulemaun haft jesindicht jäajen Gott, un Aulemaun fält Vejäwunk.  Oba blooss soone waut weeten see sent krank gonen nom Dokta; aul dee, dee jleewen dee jesunt sennen, bliewen soo aus see sent.  De Farisäa, en äare Jedanken, wieren jerajcht; see dochten an fäld nich Help.  Oba de Takskollakjta un Sinda wisten daut see Sinda wieren, un daut an Help fäld, un doawäajen neemen see daut aun waut Jesus säd.  Dit es wuarom Levi met am met jinkj.  Hee wist daut hee nich een gooda Mensch wia, un hee wull bäta sennen.  Aus Jesus am roopt neem hee dee Jeläajenheit aun, toom sien oolet Läwen wajch schmieten, un een reinet Läwen fieren.  Oba nich blooss auleen; hee boot siene Frind dit uk aun, un see eeten met Jesus toop.  Waut de Farisäa nich kunnen seenen es daut an uk Help fäld.  An fäld uk dän Dokta!  Oba see jleewden daut nich.
            Vondoagschen Dach es daut noch emma soo.  Wie kjennen nich no Jesus komen buta wie daut weeten daut wie Sinda sent.  Wie kjennen nich rein woaren wan wie jleewen wie sent aul rein.  Ea wie kjennen Gott siene Jnod aunnämen mott wie enwoaren daut ons de Jnod fält.  Dit es de Goode Norecht:  daut Gott sindvolle Menschen soo leewd, daut hee sien Sän schekjt sien Läwen to jäwen toom an rein moaken, onen daut wie daut vedeenen kunn.  Jesus lot die vondoag uk noch en, toom no am komen.  Hee es de Dokta, un wan du weetst daut du krank best, dan go no am, un hee woat die halpen looss woaren von de Krankheit, waut heet Sind