Andrew & Deanna Friesen

Kjikj Nopp!

Hoolt Faust Aun Gott Sien Wuat
"Well wie Jesus emma em Uag hoolen, dee dän Gloowen en ons aunjefongen haft, un uk foadich moaken woat.  Jesus haud kunt Freid haben, oba hee neem daut lieden aum Kjriez, un de Schaund, soo aus wan daut nuscht wia, un haft sikj aun de rajchte Sied von Gott sien Troon jesat."
Hebräa 12:2
  • Home
  • About Andrew and Deanna
  • Kjikj Nopp!
  • Updates
  • Contact

8/22/2018

Jesus, Ons Huagenpriesta

0 Comments

Read Now
 
​Toom Läsen:  Hebräa 4:14-16
            "Wiels wie Jesus, Gott sienen Sän, aus Huagenpriesta haben, dee derch dän gaunzen Himmel jegonen es, well wie aun ons Bekjantnis fausthoolen.  Wie haben nich eenen Huagenpriesta, dee nich met onse Schwakheiten metfeelen kaun, oba eenen, dee en aules krakjt soo vesocht worden es aus wie sent, oba onen to sindjen.  Doawäajen well wie voll vetruen nom Jnodentroon gonen, daut wie Metleet kjrieen un Jnod finjen to de rajchte Tiet, wan ons de Help needich fälen woat."
 
 
            Eenjemol hab wie dise Iedee daut Gott es wiet auf bowa ons em Himmel.  Wie jleewen daut Gott es nich werkjlich dichtbie ons soo aus de Schreft sajcht, wiels wie feelen ons auleen.  Daut feelt sikj soo aus wan hee een dolla Rechta es un wie haben eene schwoare Tiet jleewen daut hee ons werkjlich leeft.  Kaun hee ons werkjlich goot sennen?  De Schriewa von Hebräa vesteit woo ons daut noch mol jeit, un sajcht ons daut wie brucken ons nich enjsten fa ons himlischa Voda.  Wie kjennen oba leewa voll vetruen ver Gott komen, nich aus vedaumde Menschen, oba aus jerade Menschen, wiels Jesus, ons Huagenpriesta, haft siene Oabeit volbrocht.
            Gott es nich een Rechta wäa luat met eene Pitsch reed toom Menschen heiwen wan see Sindjen; hee es een Jnädja, Leeftolja, un perseenelja Gott wäm de Welt soo Leew haud, "...daut hee sienen eensjen Sän jeef, daut aul dee, dee aun am jleewen, nich veloaren gonen, oba daut eewje Läwen haben," (Johanes 3:16).  Wan Gott kaun soone Leew haben fa sindvolle Menschen, dan woo woat hee nich siene Kjinja loten ver am komen?  Hee woat!  De Schreft sajcht daut "wäaemma dän Harn en sien Nomen aunroopt, woat seelich woaren," (Reema 10:13).
            Oba waut meent daut daut Jesus ons Huagenpriesta es?  Well wie no dit kjikjen.  Gott jeef de Israeliten daut Jesaz von Moses toom wiesen woo een heiljet Läwen sull loten; daut Jesaz es waut Gott velangt.  1 Mose derch 5 Mose weesen ons woo een heiljet Läwen lat no Gott.  Oba wie finjen ut daut doa es kjeena oppe Welt waut kaun soo rajcht Läwen daut Gott gaunz tofräd es, wiels hee es soo Heilich, un wie sent Sinda.  Onse Sind kjemt eegol em Stich.  Dit es wuarom de Israeliten muaken een Bloot Opfa; daut Bloot von de Tieren bedakjt äare Sind un hilt Gott sien Oaja äwa Sind wajch.  Dan kjeem Jesus, un aules endad sikj.  Jesus läwd soo aus kjeena von ons kunn, gaunz onen Sind.  Hee wia gaunz Jerajcht ver Gott, un hee jeef sikj selfst opp aus een Opfa, daut Gotteslaum, toom fa de Sind betolen.  Soo aus de Priesta em Oolen Testament daut Opfa muak, soo muak Christus sikj toom een Opfa, opp eene Tiet fa aulemaun.  Gott wia tofräd met Jesus sien Opfa, un sien Oaja jäajen Sind wort doa foadich, soo daut wie nu kjennen Jesus aunnämen aus ons Heilant.  Jesus stunt dan opp vom Dooden, un hee haft jäajen aules jewonnen, un nu es hee em Himmel un vemeddelt fa ons ver däm Voda, un hee jeef ons sien Jeist.  Dit es waut een Huagenpriesta deit; hee jeit tweschen een Mensch un Gott toom Fräd moaken.  Dit es wuarom Hebräa sajcht, "Wiels wie Jesus, Gott sienen Sän, aus Huagenpriesta haben, dee derch dän gaunzen Himmel jegonen es, well wie aun ons Bekjantnis fausthoolen," (Hebräa 4:14).  Daut es blooss derch Jesus Christus daut wie kjennen no Gott komen.
            Wan wie haben daut friee Jeschenkj von de Radunk aunjenomen, dan es doa nuscht waut kaun ons trigj hoolen von Jemeenschoft haben met Gott ons Voda.  Wie sent dan Jefässa von Jnod un Erboarmen, leewa aus von Oaja un Uadeelunk.  "Wiels wie derch dän Gloowen jerajcht jeworden sent, hab wie Fräd met Gott derch onsen Harn Jesus Christus, derch dän ons de Wajch opjinkj no de Jnod, en dee wie stonen," (Reema 5:1-2).  Jesus aus Huagenpriesta jeft ons Fräd met Gott; "Dan es nu nuscht mea to vedaumen aun dee, dee en Christus Jesus sent," (Reema 8:1).  "Doawäajen well wie voll vetruen nom Jnodentroon gonen, daut wie Metleet kjrieen un Jnod finjen to de rajchte Tiet, wan ons de Help needich fälen woat," (Hebräa 4:16).  Dit es soonen wundavolla Vespräakjen fa ons; well wie daut woa nämen un en Jemeenschoft läwen met Gott, wiels hee jeft ons Jnod.

Share

0 Comments



Leave a Reply.

Details

    Schriewa

    Ekj sie Andrew Friesen.  Ekj un miene Fru, Deanna, sinj toop met D'Friesens wan wie oppe Reis sent, un tweschen en moak ekj Programs toom Menschen helpen waussen en daut Kjristen Läwen.  Ekj hop dit Program woat een Säajen sennen fa die!

    Picture
    Wan jie Froagen haben, ooda mie wellen Moot too sproaken, dan lot mie weeten!  Ekj woa soo schwind aus mäajlich eene Auntwuat haben fa die.  Jie kjenn mie hia uk weeten loten wan jie wellen ons Nies Breef kjrieen.  Wie proowen aule dree Moonat ooda soo een nieet Breef rut to schekjen äwa email, toom Menschen weeten loten waut ons drock helt.  Dankscheen!
    Wan jie aun ons denkjen, doot wellich uk bäden fa ons.  Ons fält soo väl Unjastettunk aus mäajlich!

      Lot mie Weeten!

    Submit

    Wan du dise Oabeit west met Jelt unjastetten, dan drekjt opp de Knups fuaz unja dise Wieed.  Daut woat die bat daut Blaut brinjen wua jeit Jelt to jäwen.  Go delenjd bat du Andrew and Deanna Friesen finjst, un daut äwaje es leicht jedonen!
    Ooda, du kaust mie een Whatsapp schekjen, un dan kjenn wie wieda beräden von doa!  Mien Numma es +1 204 361 6868.  Dankscheen sea, un Gottes Säajen met die!
    Unjastett Ons


​Thank you for Visiting. Come again soon!


Telephone

1 (204) 361-6868

Email

andrewanddeannafriesen@gmail.com
  • Home
  • About Andrew and Deanna
  • Kjikj Nopp!
  • Updates
  • Contact