Kjikj em Spieejel Nenn

​Toom Läsen:  Jakobus 1:22-25
            "Jie motten oba uk doonen waut daut Wuat sajcht, wiels blooss hieren, rieekjt nich too, sest beschummel jie junt selfst.  Wäa daut Wuat blooss hieet un nich deit, waut daut sajcht, dee es aus een Mensch, dee sikj em Spieejel bekjikjt, un dan doavon jeit, un fuaz vejat, woo daut am utsach.  Wäa en daut volkomne Jesaz Gottes nenn kjikjt, waut ons frie moakt, wäa doabie blift un nich een vejätsoma hiera es, oba deit waut daut sajcht, dee woat bie sienem schaufen tofräd sennen."
 
 
            Wie aus Kjristen woaren emma vesocht von de Welt romm ons.  Wie kjennen leicht veleit woaren en onse Jedanken toom ons vejlikjen met aundre Menschen, besondasch met Sinda, toom seenen woo väl bäta daut jeit met ons aus daut deit met dee.  Wie kjikjen no dee waut Christus nich kjanen un wie denkjen, "Mien läwen es wiet scheena aus äat.  Ekj hab lang nich soo väl Trubbel aus see haben."  Wie motten oba em Denkj hoolen daut wan sie soont sajen kjennen, daut es blooss derch Gott siene Krauft.  Wan wie ons vejlikjen met daut orrajchtet, dan sent wie em jefaulen von Stolt sennen fa soont waut wie nich jedonen haben.  Wie haben nich ons selfst jerat; Jesus deed!  Wie dreiden ons ieejna läwen nich selfst trajcht; Gott deed!  Wäajen dit sajcht Jakobus daut wie sellen nich blooss daut Wuat hieren, oba uk doonen.
            Hee sajcht, "Jie motten oba uk doonen waut daut Wuat sajcht, wiels blooss hieren, rieekjt nich too, sest beschummel jie junt selfst," (1:22).  Hoolt em Denkj daut Jesus räd uk von dit en Matäus 13, wan hee rät von dee Maun waut deed seien.  En Varsch 22 rät hee von waut passieet no soona waut blooss horcht, un oba nich deit waut daut Wuat sajcht.  "Un daut waut manke Distlen jeseit wia, es soo:  Daut es eena dee daut Wuat hieet, oba de Sorjen en dise Welt un de Freid aum Rikjdom stekjen daut Wuat, un daut kaun nich Frucht droagen."  Soona waut blooss daut Wuat hieet licht sikj selfst väa wan hee daut nich ut eewen deit en sien Läwen.  Hee vejlikjt sikj met de Welt, un nich met waut daut en Gott sien heiljet Wuat sajcht.  "Wäa daut Wuat blooss hieet un nich deit, waut daut sajcht, dee es aus een Mensch, dee sikj em Spieejel bekjikjt un dan doavon jeit, un fuaz vejat, woo daut am utsach," (Jakobus 1:23-24).  Wan wie ons vejlikjen met Gott sien Wuat, un no woo Jesus läwd opp dise Ieed, dan see wie woo daut werkjlich es met ons.  Wie kjrieejen dan onse Sind un Schwienschet to seenen.  Oba wan wie ons no aundre rechten, dan jleew wie daut es nich soo oajch met ons, un daut ons lat werkjlich noch en bätje Schmok.  Dan vejät wie fuaz aulwada waut Gott sien Wuat säd.  Dit es von waut Jakobus hia rät!  Wie kjikjen blooss em orrajchten Spieejel nenn!  Wie motten en Gott sien Wuat nenn kjikjen, wiels daut wiest ons woo wie werkjlich sent, un sajcht uk woo wie ons kjennen endren.  Oba de eensja Wajch daut woat woaren es wan wie doonen waut daut Wuat sajcht.
            "Wäa en daut volkomne Jesaz Gottes nenn kjikjt, waut ons frie moakt, wäa doabie blift un nich een vejätsoma hiera es, oba deit waut daut sajcht, dee woat bie sienem schaufen tofräd sennen," (Jakobus 1:25).  Wan wie Gott sien Wuat loten onse Senn endren, un wie daut loten sikj en ons schaufen, dan woat Gott en ons eene Oabeit doonen waut ons fruchtboa moakt, un am ieet.  Dan sennen wie soo aus daut goode Ieed en Jesus siene Jeschicht en Matäus 13:23.  "Un daut waut opp goode Ieed jeseit wia, sajcht dit:  Daut es eena, dee daut Wuat hieet un vesteit un daut doano Frucht drajcht, un brinjt 100 ooda 60 ooda 30 mol soo väl aus jeseit wort."