Sieekjt Däm Harn

Toom Läsen:  2 Chronik 12:13-14
            "De Kjennich Rehabeam jewonn wada aun Macht en Jerusalem un rejieed wieda.  Rehabeam wia 41 Joa oolt, aus hee Kjennich wort, un rejieed 17 Joa en Jerusalem en de Staut, waut de Har jewält haud mank aule Städa en en Israel, daut hee sienen Nomen doa wonen leet.  Rehabeam siene Mutta heet Naama eene Amonitarin.  Oba hee deed schlajchte Doten, wiels hee nich no däm Harn sienen Wellen fruach."
 
 
            Hia es eene Woarheit bennen waut de Welt oba prooft to sajen es nich soo.  Een Mensch kaun nich werkjlich goodet doonen wan hee nich sien Hoat sat aun däm Harn sien Wellen sieekjen, wiels Gott es goot un von am kjemt aules waut goot es.  "Wiels de Har es goot un frintlich!  Siene truhoatje Leew blift eewich un hee woat nienich opphieren tru to sennen," (Psalmen 100:5).  Buta wie Gott vom Hoaten sieekjen, woa wie nich kjennen werkjlich goodet doonen;  veleicht kjennen wie waut doonen waut goot sitt, oba wan wie nich wellen Gott toom jefaulen läwen, un proowen am to ieren, dan es daut Sind.  Gott kjikjt nich blooss no daut waut wie doonen, oba uk no de Uasoak doa hinja.  "De Har recht nich soo aus de Mensch deit.  Een Mensch sitt woo eena von buten lat; oba de Har kjikjt no daut Hoat," (1 Samuel 16:7).
            Dit meent oba nich daut aundre Menschen nich kjennen goodet doonen wan see nich Gott perseenlich kjanen.  Wan wie Menschlich doa naun kjikjen, dan lat daut sea fein, soogoa wan Menschen daut doonen fa de orrajchte Uasoak.  Fa ons lat daut foaken goot, oba Gott sitt daut aundasch.  De Schriewa von 2 Chronik sajcht daut Kjennich Rehabeam deed goodet fa daut Launt Juda, oba mau fa dree Joa, "soo lang aus see en de Wäaj von David un Salomo waundelden," (2 Chronik 11:17).  Gott räd ieremol too Rehabeam, un jieda mau waut hee deed dreid Rehabeam wajch von siene schlajchte Wäaj, oba niemols fa sea lang.  Sea boolt dan jinkj hee trigj no sienen ieejnen wajch, un deed waut Gott nich jefoll.  Aus sien Kjennichrikj ieescht bestendich wort, dan dreid hee gaunz wajch von Gott; dit beweess sienen faulschet Hoat.  Wäajen dit kjeem de Ägiptischen Kjennich Schischak jäajen Juda.  Dan deed Rehabeam sikj deemootjen, toop met de Väaschte von Juda, un Gott rad an.  Wan Rehabeam haud vom Aunfank aun sikj jedeemooticht un haud no Gott sien Wellen jesocht, dan wudd Juda nich soonen Trubbel habt must derch gonen.
            Noch een Väabilt von een faulschet Hoat kjemt von daut Niee Testament, too Jesus siene Tiet.  De Farisäa un de Schreftjelieede wort soo jetalt aus Heilje un Ajchte Juden, un Jesus säd oba daut see wieren nuscht mea aus Heichla.  See deeden väle goode Dinja, soo aus jelt jäwen fa Gott sien Hus, un sea daut Jesaz waut Gott jeef Moses horchen un doonen.  Oba horch no waut Jesus sajcht äwa dee:  "See doonen aul äare Woakjen met dee Aufsecht, von de Menschen jeseenen to sennen... Wee junt, Schreftjelieede un Farisäa, jie Heichla, jie schluten daut Himmelrikj too ver de Menschen!  Jie komen doa nich nenn, un loten dee nich nenn, dee doa nenn wellen," (Matäus 23:5, 13).  Dit sajcht ons daut et es wichtich toom ons Hoat rajcht enjestalt haben ver Gott.  Wie sellen doawäajen Gott sien Wuat läsen, un studieren, oba nich soo daut wie kjennen nu aufwiesen.  Wie läsen un lieren Gott sien Wuat toom onse Läwes soo utfieren daut Gott woat jeieet woaren.  Aus de Menschen Jesus fruagen woonen Jeboot daut jratste wia em Jesaz, säd hee, " 'Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken.'  Dit es daut jratste un ieeschte Jeboot.  Un daut tweede Jeboot es met dit jlikj:  'Du saust dienen Noba jrod soo goot sennen aus die selfst.'  Opp dise beid Jebooten henjt daut gaunze Jesaz un uk de Profeeten,"  (Matäus 22:37-40).  Hoolt en denkj, daut Gott kjikjt no daut Hoat von een Mensch, oba Menschen kjikjen von buten naun.  Wie motten ons selfst beharschen un froagen aus daut goodet waut wie doonen es fa Gott jedonen, ooda soo daut aundre daut woaren seenen?  Well wie en denkj hoolen toom onse Hoaten soo enstalen daut wie ieeschte no Gott sieekjen, un am auleen; wan wie dit doonen, dan kjemt aul daut aundre hinjaraun.  Dan komen soone Woakjen äwadäl waut Gott ieren, wiels wie doonen daut fa am.  "Oba sieekjt daut ieeschte no Gott sien Rikj un no siene Jerajchtichkjeit.  Dan woa jie daut aundre uk aula kjrieen," (Matäus 6:33).
            Well wie emma Gott gaunz ieeschte sieekjen, leewa aus irjent sestwaut.  Well wie nich soo aus Rehabeam sennen, wäa deed blooss fa eene korte Tiet Gott siene Jebooten horchen un dan oba wajch dreid.  Lot aundre nich sajen daut wie haben schlajchtet jedonen wiels wie ons nich deeden enstalen toom Gott nofoljen.  Eendoont woo väl goodet Rehabeam deed; Menschen hoolen am en denkj aus een schlajchta Mensch.  Lot daut eene Lekzion sennen.  Wan wie wellen werkjlich goodet doonen, waut doa woat lang stonen bliewen, dan mott wie Gott gaunz nofoljen un hinjaraun sennen.